ಸಿನಿಮಾದ ನಾಯಕನಟರನ್ನು ದೇವರಂತೆ ಆರಾಧಿಸುವ ಅಭಿಮಾನಿಗಳು ನಮ್ಮಲ್ಲಿ ಹೇರಳವಾಗಿದ್ದಾರೆ. ತೆರೆಯ ಮೇಲಿನ ಜನಪ್ರಿಯ ನಟನೊಬ್ಬನ ವೇಷಭೂಷಣ, ಹಾವಭಾವಗಳನ್ನು ಯಥಾವತ್ತಾಗಿ ನಿಜಜೀವನದಲ್ಲಿ ನಕಲು ಮಾಡುವವರ ದಂಡೇ ನಮ್ಮಲ್ಲಿದೆ. ಅಭಿಮಾನಿಗಳ ಈ ಅಂಧಾನುಕರಣೆಯ ಬಗ್ಗೆ ಕಲಾವಿದರು, ಅದರಲ್ಲೂ ವಿಶೇಷವಾಗಿ ನಾಯಕನಟರು ಜಾಗೃತರಾಗಿರಬೇಕು. ಈ ಮುಂಗಾಣುವಿಕೆ ಡಾ. ರಾಜ್‌ಕುಮಾರ್‌ ಅವರಿಗೆ ಇತ್ತು. ಆದಕಾರಣ ಅವರು ತಮ್ಮ ಸಿನಿಪಯಣದುದ್ದಕ್ಕೂ ಮದ್ಯಹೀರುವ, ಧೂಮಪಾನ ಮಾಡುವ ಅಥವಾ ಇನ್ನಾವುದೇ ಅನುಕರಣೀಯವಲ್ಲದ ದೃಶ್ಯಗಳಲ್ಲಿ ಪಾಲ್ಗೊಳ್ಳಲಿಲ್ಲ. ತಾವು ನಿರ್ವಹಿಸುತ್ತಿರುವ ಪಾತ್ರ ಅಂತಹದ್ದನ್ನು ಬಯಸುತ್ತದೆ ಎಂದೆನಿಸಿದರೆ ಅದನ್ನು ಜಾಣತನದಿಂದ ನಿಭಾಯಿಸುವ ಜವಾಬ್ದಾರಿ ಅವರಿಗಿತ್ತು. ಆದರೆ ಇಂದು ಬಹುತೇಕ ನಾಯಕರ ಚಿತ್ರಗಳು ಮದ್ಯದ ಹೊಳೆ, ಧೂಮದ ಮೋಡ, ಅಸಭ್ಯ ನಡವಳಿಕೆಗಳಿಂದ ತುಂಬಿಹೋಗಿರುತ್ತವೆ. ಅವರು ಅಭಿನಯಿಸುವ ಜಾಹೀರಾತುಗಳೂ ಇದಕ್ಕೆ ಹೊರತಾಗಿರುವುದಿಲ್ಲ.
