ರಾಹುಲ್ ತ್ರಿಪಾಠಿ ಕ್ಯಾಚ್; ಕೆ.ಎಲ್. ರಾಹುಲ್ ಔಟ್ ಅಥವಾ ನಾಟೌಟ್?

ರೋಚಕ ಹಂತದಲ್ಲಿ ಕೆಕೆಆರ್ ಬೌಲರ್ ಶಿವಂ ಮಾವಿ ಎಸೆದ ಇನ್ನಿಂಗ್ಸ್‌ನ 19ನೇ ಓವರ್‌ನ ಮೂರನೇ ಎಸೆತದಲ್ಲಿ ಪಂಜಾಬ್ ನಾಯಕ ಕೆ.ಎಲ್. ರಾಹುಲ್ ಹೊಡೆದ ಚೆಂಡನ್ನು ಫೀಲ್ಡರ್ ರಾಹುಲ್ ತ್ರಿಪಾಠಿ ಮುಂದಕ್ಕೆ ಡೈವ್ ಹೊಡೆದು ಹಿಡಿದಿದ್ದರು.

ಇದನ್ನೂ ಓದಿ:IPL 2021: ಪಂಜಾಬ್ ಗೆಲುವಿನಲ್ಲಿ ಕನ್ನಡಿಗರ ಮಿಂಚು; ಪ್ಲೇ-ಆಫ್ ಕನಸು ಜೀವಂತ!

ಮೊದಲ ನೋಟಕ್ಕೆ ಎಲ್ಲರೂ ಔಟ್ ಎಂದು ಭಾವಿಸಿದ್ದರು. ರಾಹುಲ್ ತ್ರಿಪಾಠಿ ಕೂಡ ಸಹ ಆಟಗಾರರೊಂದಿಗೆ ಸಂಭ್ರಮವನ್ನು ಆಚರಿಸಿದರು.

ಬಳಿಕ ರಿಪ್ಲೇ ಪರಿಶೀಲಿಸಿದ ಮೂರನೇ ಅಂಪೈರ್‌, ಸ್ವಲ್ಪ ಹೊತ್ತಿನ ಬಳಿಕ ನಾಟೌಟ್ ಎಂದು ಘೋಷಿಸಿದ್ದರು. ಇದರಿಂದಾಗಿ ರಾಹುಲ್ ಬ್ಯಾಟಿಂಗ್ ಮುಂದುವರಿಸಲು ಸಾಧ್ಯವಾಯಿತು.

ಇದು ಮಾಜಿಗಳಿಂದ ಟೀಕೆಗೆ ಕಾರಣವಾಗಿದೆ. ಕೋಲ್ಕತ್ತ ತಂಡದ ಮಾಜಿ ನಾಯಕ ಗೌತಮ್ ಗಂಭೀರ್, ಈ ಕುರಿತು ಅಸಮಾಧಾನವನ್ನು ವ್ಯಕ್ತಪಡಿಸಿದ್ದಾರೆ.

'ನಿಜಕ್ಕೂ ಆಘಾತ ತಂದಿದೆ. ತಂಡವೊಂದರ ಅಭಿಯಾನವು ಇಲ್ಲಿಗೆ ಕೊನೆಗೊಳ್ಳುತ್ತಿತ್ತು. ಐಪಿಎಲ್‌ನಂತಹ ಟೂರ್ನಿಯಲ್ಲಿ ಅಂಪೈರ್‌ನಿಂದ ಇಂತಹ ತಪ್ಪು ಆಗಬಾರದು. ಕೇವಲ ಆಟಗಾರ ಮಾತ್ರವಲ್ಲ, ಇಡೀ ಫ್ರಾಂಚೈಸಿಗೆ ಇದರಿಂದ ಅನ್ಯಾಯವಾಗಿದೆ' ಎಂದು ಹೇಳಿದ್ದಾರೆ.

ಇಂಗ್ಲೆಂಡ್ ಮಾಜಿ ಸ್ಪಿನ್ನರ್ ಗ್ರೇಮ್ ಸ್ವಾನ್ ಕೂಡ ಧ್ವನಿಗೂಡಿಸಿದ್ದಾರೆ. 'ಇದು ನನ್ನ ಜೀವನದಲ್ಲಿ ನೋಡಿರುವ ಅತ್ಯಂತ ಕೆಟ್ಟ ನಿರ್ಣಯಗಳಲ್ಲಿ ಒಂದಾಗಿದೆ. ರಾಹುಲ್ ತ್ರಿಪಾಠಿ ಅದ್ಭುತ ಕ್ಯಾಚ್ ಹಿಡಿದಿದ್ದರು' ಎಂದು ಹೇಳಿದ್ದಾರೆ.

ಕೋಲ್ಕತ್ತ ನಾಯಕ ಏಯಾನ್ ಮಾರ್ಗನ್ ಕೂಡ ರಿಯಲ್ ಟೈಮ್ ನೋಡುವಾಗ ಔಟ್ ಎಂದು ಭಾಸವಾಗಿತ್ತು ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಅಂತಿಮವಾಗಿ ಕೆ.ಎಲ್. ರಾಹುಲ್ ಅರ್ಧಶತಕದ (67) ಬಲದೊಂದಿಗೆ ಕೆಕೆಆರ್ ವಿರುದ್ಧ ಐದು ವಿಕೆಟ್ ಅಂತರದ ಗೆಲುವು ದಾಖಲಿಸಿರುವ ಪಂಜಾಬ್, ಪ್ಲೇ-ಆಫ್ ಕನಸನ್ನು ಜೀವಂತವಾಗಿರಿಸಿದೆ.