ಎಬೋಲಾ ವೈರಸ್‌ ಆಮದು ಮಾಡಿಕೊಂಡ ಜಪಾನ್‌: ಏನಿದರ ಮರ್ಮ?
ಟೋಕಿಯೊ(ಜಪಾನ್‌): ಒಲಿಂಪಿಕ್‌ ಕ್ರೀಡಾ ಕೂಟಕ್ಕೆ ದೊಡ್ಡ ಮಟ್ಟದ ಸಿದ್ಧತೆ ಮಾಡಿಕೊಳ್ಳುತ್ತಿರುವ ಜಪಾನ್‌ ಕಳೆದ ವಾರ ಎಬೋಲ ಸೇರಿದಂತೆ ಐದು ಅತ್ಯಂತ ಅಪಾಯಕಾರಿ ವೈರಸ್‌ಗಳನ್ನು ಆಮದು ಮಾಡಿಕೊಂಡಿದೆ.
2020ರಲ್ಲಿ ಟೊಕಿಯೊದಲ್ಲಿ ಒಲಿಂಪಿಕ್‌ ಕ್ರೀಡಾ ಕೂಟ ನಡೆಯಲಿದೆ. ಈ ಕೂಟಕ್ಕೆ ಜಾಗತ್ತಿನ ಸಾವಿರಾರು ಕ್ರೀಡಾಳುಗಳು, ಪ್ರವಾಸಿಗರು ಆಗಮಿಸುತ್ತಾರೆ. ಈ ವೇಳೆ ವೈರಸ್‌ಗಳಿಂದ ಎದುರಾಗಬಹುದಾದ ಯಾವುದೇ ದೊಡ್ಡ ಅಪಾಯಗಳನ್ನು ತಡೆಯಲು ನಿರ್ಧರಿಸಿರುವ ಜಪಾನ್‌ ಅಪಾಯಕಾರಿ ವೈರಸ್‌ಗಳ ಮೇಲೆ ಸಂಶೋಧನೆಗೆ ಮುಂದಾಗಿದೆ.
ಈ ಕುರಿತು ಮಾತನಾಡಿರುವ ಜಪಾನ್‌ ಆರೋಗ್ಯ ಇಲಾಖೆ ಸಚಿವರು, ‘ ಎಬೋಲಾ, ಮರ್ಬರ್ಗ್‌, ಲಸ್ಸಾ ವೈರಸ್‌ಗಳು, ದಕ್ಷಿಣ ಅಮೆರಿಕ ಮೂಲದ ರಸ್ತಸ್ರಾವ ಯುಕ್ತ ಜ್ವರ ತರುವ ಮತ್ತು ಕ್ರಿಮಿಯನ್-ಕಾಂಗೋ ರಕ್ತಸ್ರಾವ ಜ್ವರ ಉಂಟು ಮಾಡುವ ವೈರಸ್‌ಗಳನ್ನು ಆಮದು ಮಾಡಿಕೊಳ್ಳಲಾಗಿದೆ. ವೈರಸ್‌ಗಳನ್ನು ತಜ್ಞರು ಅಧ್ಯಯನ ಮಾಡಲಿದ್ದಾರೆ,’ ಎಂದು ಅವರು ತಿಳಿಸಿದ್ದಾರೆ.
ಜೀವಸುರಕ್ಷಾ ಹಂತ –4 (ಬಿಎಸ್ಎಲ್–4) ಅಡಿಯಲ್ಲಿ ಬರುವ ಈ ಅಪಾಯಕಾರಿ ವೈರಸ್‌ಗಳನ್ನು ಜಪಾನ್‌ನ ರಾಷ್ಟ್ರೀಯ ಸೋಕು ಅಧ್ಯಯನ ಸಂಸ್ಥೆಯಲ್ಲಿ (ಎನ್‌ಐಐಡಿ) ಇರಿಸಲಾಗಿದೆ. ಬಿಎಸ್ಎಲ್–4 ವೈರಸ್‌ಗಳನ್ನು ಅಧ್ಯಯನ ಮಾಡುವ ಲ್ಯಾಬ್‌ಗಳನ್ನು ಜಪಾನ್‌ ಎನ್‌ಐಐಡಿ 1980ರರಲ್ಲೇ ನಿರ್ಮಿಸಿದೆಯಾದರೂ, ಆ ವೈರಸ್‌ಗಳನ್ನು ಅಲ್ಲಿಗೆ ತರುತ್ತಿರುವುದೇ ಇದೇ ಮೊದಲು ಎಂದೂ ಜಪಾನ್‌ ಹೇಳಿಕೊಂಡಿದೆ.
ಸದ್ಯ ಈ ವೈರಸ್‌ಗಳ ಮೇಲಿನ ಅಧ್ಯಯನ ನಡೆಸುವ ಜಪಾನ್‌ ಸರ್ಕಾರದ ನಿರ್ಧಾರವನ್ನು ಅಲ್ಲಿನ ವೈದ್ಯಕೀಯ ವಿಜ್ಞಾನ ಸಂಸ್ಥೆಯು ಸ್ವಾಗತಿಸಿದೆ. ಬಿಎಸ್ಎಲ್–4 ಹಂತದ ಜೀವಂತ ವೈರಸ್‌ಗಳ ಮೇಲಿನ ಅಧ್ಯಯನದಿಂದಾಗಿ ಮುಂದೆ ಎದುರಾಗಬಹುದಾದ ದಿಢೀರ್‌ ಆಪತ್ತಿನಿಂದ ಪಾರಾಗಲು ದೇಶಕ್ಕೆ ಸಾಧ್ಯವಿದೆ ಎಂದು ಅದು ಹೇಳಿಕೊಂಡಿದೆ.
