ಕೋವಿಡ್‌–19 ಹೋರಾಟಕ್ಕೆ ದಕ್ಷಿಣ ಕೊರಿಯಾ ಮಾದರಿ: ಗುಟೆರಸ್‌

ವಿಶ್ವಸಂಸ್ಥೆ: ‘ಕೋವಿಡ್–19 ವಿರುದ್ಧದ ಹೋರಾಟದಲ್ಲಿ ದಕ್ಷಿಣ ಕೊರಿಯಾ ಗಮನಾರ್ಹ ಯಶಸ್ಸು ಸಾಧಿಸಿದ್ದು, ವಿಶ್ವದ ಇತರ ದೇಶಗಳಿಗೆ ಮಾದರಿಯಾಗಿದೆ’ ಎಂದು ವಿಶ್ವಸಂಸ್ಥೆ ಪ್ರಧಾನ ಕಾರ್ಯದರ್ಶಿ ಅಂಟೊನಿಯೊ ಗುಟೆರಸ್‌ ಅಭಿಪ್ರಾಯಪಟ್ಟಿದ್ದಾರೆ. 

ಕೊರಿಯಾ ಗಣರಾಜ್ಯದಲ್ಲಿ ಯಾವುದೇ ಹೊಸ ಪ್ರಕರಣಗಳಿಲ್ಲ ಎಂದು ಅವರು ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ. 

‘ದಕ್ಷಿಣ ಕೊರಿಯಾ ಹವಾಮಾನ ಬದಲಾವಣೆ ಸಮಸ್ಯೆಗೆ ಕ್ರಮ ತೆಗೆದುಕೊಂಡಿದೆ. ಮಹತ್ವಾಕಾಂಕ್ಷಿ ಹಸಿರು ಕ್ರಾಂತಿಗೆ ಒತ್ತು ನೀಡಿದ್ದು, ಹೊಸ ಕಲ್ಲಿದ್ದಲು ಆಧರಿತ ಸ್ಥಾವರಗಳಿಗೆ ನಿಷೇಧ ಹೇರಿದೆ. ಈಗಿರುವ ಘಟಕಗಳಲ್ಲಿ ಹೊಗೆ ಉರಿಸುವ ಪ್ರಮಾಣವನ್ನು ಕಡಿಮೆ ಮಾಡಲಾಗಿದೆ. ಕೊರಿಯಾ ಗಣರಾಜ್ಯದ ಈ ನಿದರ್ಶನಗಳನ್ನು ವಿಶ್ವದ ಇತರ ದೇಶಗಳು ಅನುಸರಿಸುತ್ತವೆ ಎಂದು  ಭಾವಿಸುತ್ತೇನೆ’ ಎಂದು ಹೇಳಿದ್ದಾರೆ. 

‘ಇಲ್ಲಿಯವರೆಗೆ ದೇಶದಲ್ಲಿ ಒಟ್ಟು 10,765 ಮಂದಿ ಸೋಂಕಿತರಿದ್ದು, 247 ಮಂದಿ ಮೃತಪಟ್ಟಿದ್ದಾರೆ. 9,059 ಸೋಂಕಿತರು ಗುಣಮುಖರಾಗಿದ್ದಾರೆ’ ಎಂದು ಕೊರಿಯಾದ ರೋಗ ನಿಯಂತ್ರಣ ಮತ್ತು ತಡೆ ಕೇಂದ್ರ ಗುರುವಾರ ತಿಳಿಸಿತ್ತು.