ಸುಳ್ಳುಸುದ್ದಿಯನ್ನು ಗಂಭೀರವಾಗಿ ಪರಿಗಣಿಸದ ಫೇಸ್ಬುಕ್, ಟ್ವಿಟರ್!
ಟಿಕ್‌ಟಾಕ್ ಮತ್ತು ರೆಡ್ಡಿಟ್‌ಗೆ ಹೋಲಿಸಿದರೆ ಸಾಮಾಜಿಕ ತಾಣಗಳಲ್ಲಿ ಸುಳ್ಳುಸುದ್ದಿ ಹರಡುವುದನ್ನು ನಿಯಂತ್ರಿಸುವ ವಿಚಾರದಲ್ಲಿ ಫೇಸ್ಬುಕ್, ಟ್ವಿಟರ್ ಮತ್ತು ಯೂಟ್ಯೂಬ್ ತುಂಬಾ ಹಿಂದುಳಿದಿವೆ ಎಂದು ವರದಿಯೊಂದು ಹೇಳಿದೆ.
2020ರ ದ್ವಿತೀಯಾರ್ಧದಲ್ಲಿ ನಡೆಸಲಾದ ಅಧ್ಯಯನವನ್ನು ಬಳಸಿಕೊಂಡು ಜಾಹೀರಾತು ಏಜೆನ್ಸಿ ಐಪಿಜಿ ಮೀಡಿಯಾಬ್ರ್ಯಾಂಡ್ಸ್, ಮೀಡಿಯಾ ರೆಸ್ಪಾನ್ಸಿಬಿಲಿಟಿ ಇಂಡೆಕ್ಸ್ (ಮಾಧ್ಯಮ ಜವಾಬ್ದಾರಿ ಸೂಚ್ಯಂಕ) ಬಿಡುಗಡೆ ಮಾಡಿದೆ. ಈ ಪೈಕಿ, ಮಕ್ಕಳ ಹಕ್ಕುಗಳ ರಕ್ಷಣೆ, ಹೆಚ್ಚು ಸ್ಪಷ್ಟ, ನಿಖರ ಮತ್ತು ಪಾರದರ್ಶಕ ಸುದ್ದಿ ಪ್ರಸಾರ, ಸುಳ್ಳು ಸುದ್ದಿ ತಡೆ ಹೀಗೆ 10 ವಿವಿಧ ಅಂಶಗಳನ್ನು ಬಳಸಿಕೊಂಡು ಪ್ರಮುಖ ಸಾಮಾಜಿಕ ಜಾಲತಾಣಗಳ ಅಧ್ಯಯನ ನಡೆಸಲಾಗಿದೆ.
ಹೊಸ ಸೂಚ್ಯಂಕದಲ್ಲಿ 9 ಸಾಮಾಜಿಕ ಮಾಧ್ಯಮ ತಾಣಗಳು ಭಾಗವಹಿಸಿವೆ. ತಪ್ಪು ಮಾಹಿತಿ ಹರಡುವುದನ್ನು ತಡೆಯುವುದು, ಅಂತಹ ಪೋಸ್ಟ್ ಇದ್ದರೆ ತೆಗೆದುಹಾಕುವುದು ಹಾಗೂ ಸೂಕ್ತ ಕ್ರಮ ಕೈಗೊಳ್ಳುವುದನ್ನು ಯಾವ ತಾಣಗಳು ಸಮರ್ಥವಾಗಿ ನಿರ್ವಹಿಸುತ್ತವೆ ಎನ್ನುವುದನ್ನು ಗಮನಿಸಿ, ವರದಿ ಪ್ರಕಟಿಸಲಾಗಿದೆ.
ಈ ಪೈಕಿ ಫೇಸ್ಬುಕ್, ಸುಳ್ಳು ಸುದ್ದಿ ತಡೆಗೆ ಸುಧಾರಿತ ಕ್ರಮ ಕೈಗೊಳ್ಳುತ್ತಿದೆ. ಯೂಟ್ಯೂಬ್ ಮಕ್ಕಳ ಕುರಿತ ಕಂಟೆಂಟ್ ವಿಚಾರದಲ್ಲಿ ಕ್ರಮ ಕೈಗೊಂಡಿದ್ದರೂ, ಇತರ ಸಂಗತಿಗಳಲ್ಲಿ ಯಾವುದೇ ಕ್ರಮ ಕೈಗೊಂಡಿಲ್ಲ. ಆದರೆ ಟಿಕ್‌ಟಾಕ್, ಈ ವಿಚಾರದಲ್ಲಿ ಇತರ ಎಲ್ಲ ಸಾಮಾಜಿಕ ತಾಣಗಳಿಗಿಂತ ಮುಂದಿದ್ದು, ಅನಗತ್ಯ ವಿಚಾರಗಳನ್ನು ತೆಗೆದುಹಾಕಿದೆ ಎಂದು ಮೀಡಿಯಾಬ್ರ್ಯಾಂಡ್ಸ್ ಹೇಳಿದೆ.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.