ಗ್ರೀನ್ ಬೇ(ಅಮೆರಿಕ): ‘ಇಲ್ಲಿನ ಗ್ರೀನ್ ಬೇ ಕ್ಯಾಸಿನೊದಲ್ಲಿ ಬಂದೂಕುಧಾರಿಯೊಬ್ಬ ನಡೆಸಿದ ಗುಂಡಿನ ದಾಳಿಯಲ್ಲಿ ಇಬ್ಬರು ಮೃತಪಟ್ಟಿದ್ದಾರೆ. ಒಬ್ಬರಿಗೆ ಗಂಭೀರ ಗಾಯಗಳಾಗಿವೆ. ಬಳಿಕ ಅಪರಿಚಿತನನ್ನು ಪೊಲೀಸರು ಗುಂಡಿಕ್ಕಿ ಕೊಂದರು’ ಎಂದು ವಿಸ್ಕನ್ಸಿನ್ ಅಧಿಕಾರಿಗಳು ತಿಳಿಸಿದರು.
ಗ್ರೀನ್ ಬೇ ಪ್ರದೇಶದ ಪಶ್ಚಿಮ ಭಾಗದಲ್ಲಿರುವ ಒನಿಡಾ ಕ್ಯಾಸಿನೊದಲ್ಲಿ ಶನಿವಾರ ಸಂಜೆ 7 ಗಂಟೆಗೆ ಈ ಘಟನೆ ನಡೆದಿದೆ.
‘ಬಂದೂಕುಧಾರಿ, ನಿರ್ದಿಷ್ಟ ವ್ಯಕ್ತಿಯ ಮೇಲೆ ದಾಳಿ ನಡೆಸಲು ಯೋಜನೆ ರೂಪಿಸಿದ್ದ. ಆದರೆ ಆ ವೇಳೆ ಕ್ಯಾಸಿನೊದಲ್ಲಿ ಆತ ಇರಲಿಲ್ಲ. ಹಾಗಾಗಿ ಆ ವ್ಯಕ್ತಿಯ ಸಹೋದ್ಯೋಗಿ ಮತ್ತು ಸ್ನೇಹಿತರ ಮೇಲೆ ದಾಳಿ ನಡೆಸಿರಬಹುದು’ ಎಂದು ಶಂಕಿಸಲಾಗಿದೆ.