ಲಾಕ್‌ಡೌನ್‌: ಜಿಡಿಪಿಗೆ ₹ 8 ಲಕ್ಷ ಕೋಟಿ ನಷ್ಟ

ನವದೆಹಲಿ: ದೇಶದಾದ್ಯಂತ ಜಾರಿಯಲ್ಲಿ ಇರುವ 21 ದಿನಗಳ ಲಾಕ್‌ಡೌನ್‌ ಕಾರಣಕ್ಕೆ ಒಟ್ಟು ಆಂತರಿಕ ಉತ್ಪಾದನೆಯಲ್ಲಿ (ಜಿಡಿಪಿ) ಶೇ 4ರಷ್ಟು ಕೊರತೆ ಉಂಟಾಗಲಿದೆ.

ದೇಶದ ವಾರ್ಷಿಕ ಜಿಡಿಪಿಯು ಅಂದಾಜು ₹ 210 ಲಕ್ಷ ಕೋಟಿಗಳಷ್ಟಿದೆ. ಆರ್ಥಿಕ ಮತ್ತು ಸಾಮಾಜಿಕ ಚಟುವಟಿಕೆಗಳ ದಿಗ್ಬಂಧನ ಅವಧಿಯಲ್ಲಿನ ಉತ್ಪಾದನೆ ನಷ್ಟದಿಂದಾಗಿ ಜಿಡಿಪಿಗೆ ₹ 8 ಲಕ್ಷ ಕೋಟಿಗಳಷ್ಟು ನಷ್ಟ ಉಂಟಾಗಲಿದೆ ಎಂದು ಅಂದಾಜಿಸಲಾಗಿದೆ.  ತಿಂಗಳೊಂದರಲ್ಲಿ ಜಿಡಿಪಿಯ ಶೇ 8ರಿಂದ ಶೇ 9ರಷ್ಟು ಸರಾಸರಿ ಉತ್ಪಾದನೆಯಾಗುತ್ತದೆ. ಒಂದು ವೇಳೆ ಈ ದಿಗ್ಬಂಧನವು 10 ವಾರಗಳವರೆಗೆ ಮುಂದುವರೆದರೆ ದೇಶಿ ಆರ್ಥಿಕತೆಯು ಸಂಪೂರ್ಣವಾಗಿ ಕುಸಿದು ಬೀಳಲಿದೆ ಎಂಬ ಆತಂಕ ವ್ಯಕ್ತವಾಗುತ್ತಿದೆ.

ಗಣಿಗಾರಿಕೆ, ಕಟ್ಟಡ ನಿರ್ಮಾಣ, ತಯಾರಿಕೆ ಮತ್ತು ಸೇವಾ ವಲಯಗಳಲ್ಲಿ 10 ಕೋಟಿ ಜನರು ಉದ್ಯೋಗ ಕಳೆದುಕೊಳ್ಳಲಿದ್ದಾರೆ ಎಂದು ಆರ್ಥಿಕ ವ್ಯವಹಾರಗಳ ಮಾಜಿ ಕಾರ್ಯದರ್ಶಿ ಸುಭಾಷ್‌ ಚಂದ್ರ ಗರ್ಗ್‌ ಅಂದಾಜಿಸಿದ್ದಾರೆ.