ಟೊಮೆಟೊ ಮೂರು ವರ್ಷಗಳ ಕನಿಷ್ಠ ದರ: ಪ್ರತಿ ಕೆ.ಜಿಗೆ ₹3–10

ಬೆಂಗಳೂರು: ಕೋವಿಡ್‌–19 ಬಿಕ್ಕಟ್ಟು, ಲಾಕ್‌ಡೌನ್‌ ಹಾಗೂ ಬೇಸಿಗೆ ಟೊಮೆಟೊ ಬೆಳೆಗಾರರಿಗೆ ತೀವ್ರ ಪೆಟ್ಟು ನೀಡಿದೆ. ದೇಶದಲ್ಲಿ ಟೊಮೆಟೊ ದರ ಮೂರು ವರ್ಷಗಳ ಕನಿಷ್ಠಕ್ಕೆ ಕುಸಿದಿದೆ. ಶುಕ್ರವಾರ ಬೆಂಗಳೂರು, ದೆಹಲಿ ಹಾಗೂ ಹೈದರಾಬಾದ್‌ ಸಗಟು ಮಾರುಕಟ್ಟೆಗಳಲ್ಲಿ ಪ್ರತಿ ಕೆ.ಜಿ.ಗೆ ₹3–10ಕ್ಕೆ ಇಳಿದಿದೆ. 

ಕಳೆದ ವರ್ಷ ಮೇ 22ರಂದು ದೆಹಲಿಯ ಆಜಾದ್‌ಪುರ್‌ ಸಗಟು ಮಾರಾಟ ಮಂಡಿಯಲ್ಲಿ ಪ್ರತಿ ಕೆ.ಜಿ ಟೊಮೆಟೊಗೆ ₹14.30 ಇತ್ತು. ಅದೇ ಬೆಂಗಳೂರು ಹಾಗೂ ಹೈದರಾಬಾದ್‌ನಲ್ಲಿ ಪ್ರತಿ ಕೆ.ಜಿ.ಗೆ ₹30 ದಾಟಿತ್ತು. ಬೇಸಿಗೆಯಲ್ಲಿ ಬಹುಬೇಗ ಕೊಳೆಯುವ ಟೊಮೆಟೊ ಪೂರೈಕೆ ಹೆಚ್ಚಳವಾಗಿದ್ದು, ಬೇಡಿಕೆ ಕುಸಿದಿದೆ. 

ಕರ್ನಾಟಕದ ಕೋಲಾರದಲ್ಲಿನ ಟೊಮೊಟೊ ಮಾರಾಟ ಕೇಂದ್ರಗಳಲ್ಲಿ ಗುಣಮಟ್ಟ ಹಾಗೂ ಟೊಮೆಟೊ ತಳಿಯನ್ನು ಆಧರಿಸಿ ಪ್ರತಿ ಕೆ.ಜಿ.ಗೆ ₹3–8ರಲ್ಲಿ ಮಾರಾಟವಾಗಿದೆ. ವರ್ಷದ ಹಿಂದೆ ಇದೇ ಅವಧಿಯಲ್ಲಿ ಪ್ರತಿ ಕೆ.ಜಿ. ಟೊಮೆಟೊಗೆ ₹14–35ಗೆ ಮಾರಾಟವಾಗಿತ್ತು. ಬೆಂಗಳೂರಿನ ಮಾರುಕಟ್ಟೆಯಲ್ಲಿ ಟೊಮೆಟೊ ಪ್ರತಿ ಕೆ.ಜಿ.ಗೆ ₹10ರ ವರೆಗೂ ಮಾರಾಟವಾಗಿದೆ. ಕಳೆದ ವರ್ಷ ಪ್ರತಿ ಕೆ.ಜಿ.ಗೆ ₹30ರ ವರೆಗೂ ಮಾರಾಟವಾಗಿತ್ತು. 

ಆಹಾರ ಸಂಸ್ಕರಣಾ ಸಚಿವಾಲಯದ ಮಾಹಿತಿ ಪ್ರಕಾರ, 'ಆಜಾದ್‌ಪುರ್‌ನಲ್ಲಿ ಪ್ರಸ್ತುತ ಪ್ರತಿ ಕ್ವಿಂಟಾಲ್‌ ಟೊಮೆಟೊ ₹440ರಲ್ಲಿ ವಹಿವಾಟು ನಡೆದಿದೆ. ಅಷ್ಟೇ ಪ್ರಮಾಣದ ಟೊಮೆಟೊ ಕಳೆದ ವರ್ಷ ₹1,258ಕ್ಕೆ ಬಿಕರಿಯಾಗಿತ್ತು.' ದೆಹಲಿಗೆ ಹರಿಯಾಣ, ಉತ್ತರ ಪ್ರದೇಶ, ಮಧ್ಯ ಪ್ರದೇಶ ಹಾಗೂ ರಾಜಸ್ಥಾನದಿಂದ ಟೊಮೆಟೊ ಪೂರೈಕೆಯಾಗುತ್ತಿದೆ. 

ಹೈದರಾಬಾದ್‌ನ ಬೌಯನ್‌ಪಲ್ಲಿ ಮಾರುಕಟ್ಟೆಯಲ್ಲಿ ಶುಕ್ರವಾರ ಪ್ರತಿ ಕೆ.ಜಿ. ಟೊಮೆಟೊ ₹5ಕ್ಕೆ ಮಾರಾಟವಾಗಿದೆ,  ಕಳೆದ ವರ್ಷ ಪ್ರತಿ ಕೆ.ಜಿ.ಗೆ ₹34ರಲ್ಲಿ ಮಾರಾಟವಾಗಿತ್ತು. 

ಆಹಾರ ಸಂಸ್ಕರಣಾ ಸಚಿವಾಲಯ ಗುರುತಿಸಿರುವ 52 ಜಿಲ್ಲೆಗಳ ಪೈಕಿ 40 ಜಿಲ್ಲೆಗಳಲ್ಲಿ ಟೊಮೆಟೊ ಸಗಟು ಮಾರಾಟ ದರ ಮೂರು ವರ್ಷಗಳ ಕನಿಷ್ಠಕ್ಕೆ ಕುಸಿದಿದೆ. 

ಆಂಧ್ರ ಪ್ರದೇಶ ಹಾಗೂ ಕರ್ನಾಟಕ ದೇಶದಲ್ಲಿ ಅತಿ ಹೆಚ್ಚು ಟೊಮೆಟೊ ಬೆಳೆಯುವ ರಾಜ್ಯಗಳಾಗಿವೆ. ಈ ವರ್ಷ ಎರಡೂ ರಾಜ್ಯಗಳಿಂದ ಅಂದಾಜು 42 ಲಕ್ಷ ಟನ್‌ ಟೊಮೆಟೊ ಉತ್ಪಾದನೆಯಾಗಿದೆ. ದೇಶದಲ್ಲಿನ ವಾರ್ಷಿಕ ಟೊಮೆಟೊ ಬೇಡಿಕೆ 111 ಲಕ್ಷ ಟನ್‌ಗಳಿಷ್ಟಿದೆ. 

ಸಚಿವಾಲಯದ ಮಾಹಿತಿ ಪ್ರಕಾರ, 2019–20ರಲ್ಲಿ ದೇಶದಲ್ಲಿನ ಒಟ್ಟು ಟೊಮೆಟೊ ಉತ್ಪಾದನೆ 193.28 ಲಕ್ಷ ಟನ್‌.