ಗೋಪನಹಳ್ಳಿಯಲ್ಲಿ 8 ಜನ ದಂಪತಿ ನಾಮಪತ್ರ: ಹಿಂದೆ ಸರಿದ 6 ಜನ ಪತಿಯರು

ಚಳ್ಳಕೆರೆ: ‌ನಾಮಪತ್ರ ತಿರಸ್ಕೃತವಾದರೆ ಚುನಾವಣೆಗೆ ಸ್ಪರ್ಧಿಸುವ ಅವಕಾಶ ಕೈ ತಪ್ಪುತ್ತದೆ ಎಂಬ ಕಾರಣದಿಂದ ತಾಲ್ಲೂಕಿನ ಗೋಪನಹಳ್ಳಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಗೋಪನಹಳ್ಳಿ ಒಂದನೇ ಬ್ಲಾಕ್‍ನಲ್ಲಿ 4 ಸಾಮಾನ್ಯ ಮೀಸಲು ಸ್ಥಾನಕ್ಕೆ 8 ಜನ ದಂಪತಿ ನಾಮಪತ್ರ ಸಲ್ಲಿಸಿದ್ದು, ಈಗ 6 ಜನ ಪತಿಯರು ನಾಮಪತ್ರ ಹಿಂಪಡೆದಿದ್ದಾರೆ. 

ಸಾಮಾನ್ಯ ಮೀಸಲು ಸ್ಥಾನಕ್ಕೆ ಒಟ್ಟು 17 ಜನ ನಾಮಪತ್ರ ಸಲ್ಲಿಸಿದ್ದರು. ನಾಮಪತ್ರ ಹಿಂಪಡೆಯಲು ಕೊನೆಯ ದಿನವಾದ ಶನಿವಾರ ಉಮೇದುವಾರಿಕೆ ಸಲ್ಲಿಸಿದ್ದ ಎಂಟು ಜನ ದಂಪತಿಯಲ್ಲಿ 6 ಜನ ಪತಿಯರು, ಒಬ್ಬ ಮಹಿಳೆ ನಾಮಪತ್ರ ವಾಪಸ್‌ ಪಡೆದಿದ್ದು, ಒಂದು ಜೋಡಿ ಮಾತ್ರ ಕಣದಲ್ಲಿ ಉಳಿದಿದೆ. 11 ಜನ ಅಂತಿಮವಾಗಿ ಸ್ಪರ್ಧೆಯಲ್ಲಿ ಉಳಿದಿದ್ದಾರೆ.

ಉಮೇಶ್, ಭವಾನಿ ದಂಪತಿ ಕಣದಲ್ಲಿ ಉಳಿದಿದ್ದಾರೆ. 6 ಜನ ಪತಿಯರು ನಾಮಪತ್ರ ವಾ‍‍ಪಸ್‌ ಪಡೆದ ಕಾರಣ ಅವರ ಪತ್ನಿಯರಾದ ರಾಧಮ್ಮ, ತಿಮ್ಮಕ್ಕ, ಲಕ್ಷ್ಮೀ, ಶರಾವತಿ, ಸುಮಿತ್ರಮ್ಮ, ಲತಾ ಸೇರಿ ಒಟ್ಟು 6 ಜನ ಪತ್ನಿಯರು ಅಂತಿಮ ಸ್ಪರ್ಧೆಯಲ್ಲಿದ್ದಾರೆ. ಶರಣಪ್ಪ, ಶಿವಣ್ಣ, ವಾಸುದೇವಮೂರ್ತಿ, ಮಂಜುನಾಥ, ದೇವರಾಜ ಸೇರಿ ಒಟ್ಟು 11 ಜನ ಹುರಿಯಾಳುಗಳು ಅಂತಿಮ ಕಣದಲ್ಲಿದ್ದಾರೆ.
ಸುಮಾ ಎಂಬ ಅಭ್ಯರ್ಥಿ ನಾಮಪತ್ರ ಹಿಂಪಡೆಯುವ ಮೂಲಕ ಪತಿ ದೇವರಾಜ ಅವರನ್ನು ಕಣಕ್ಕಿಳಿಸಿದ್ದಾರೆ.