ಬುಧವಾರ, 28 ಫೆಬ್ರುವರಿ 2024
×
ADVERTISEMENT
ಈ ಕ್ಷಣ :
ADVERTISEMENT
ADVERTISEMENT

ಅಕಾಲಿಕ ಮಳೆಯಿಂದ ಕಂಗಾಲಾದ ಕಾಫಿ ಬೆಳೆಗಾರರು: ಕೊಯ್ಲಿಗೂ ಮುನ್ನವೇ ಅರಳಿದ ಹೂಗಳು!

Published 14 ಜನವರಿ 2024, 7:29 IST
Last Updated 14 ಜನವರಿ 2024, 7:29 IST
ಅಕ್ಷರ ಗಾತ್ರ

ನಾಪೋಕ್ಲು: ಕೆಲವು ದಿನಗಳ ಹಿಂದೆ ಸುರಿದ ಮಳೆಯಿಂದಾಗಿ ಹೋಬಳಿ ವ್ಯಾಪ್ತಿಯ ಹಲವೆಡೆ ತೋಟಗಳಲ್ಲಿ ಕಾಫಿಯ ಹೂಗಳು ಅರಳಿದ್ದು ಘಮಘಮಿಸುತ್ತಿವೆ.

ಸಾಮಾನ್ಯವಾಗಿ ಫೆಬ್ರುವರಿ ಕೊನೆಯ ವಾರದಲ್ಲಿ ಅಥವಾ ಮಾರ್ಚ್ ಮೊದಲ ವಾರದಲ್ಲಿ ‘ಹೂಮಳೆ’ಯಾಗಿ ಕಾಫಿ ತೋಟಗಳಲ್ಲಿ ಹೂಗಳು ಅರಳುತ್ತಿದ್ದವು. ಇದೀಗ ಅಕಾಲಿಕ ಮಳೆಯಿಂದಾಗಿ ಅಲ್ಲಲ್ಲಿ ಕಾಫಿ ಹೂಗಳು ಭಾಗಶಃ ಅರಳಿದ್ದು, ಕಾಫಿ ಕೊಯ್ಲಿಗೆ ತೊಡಕಾಗಿದೆ.

ಮಳೆ ದೂರವಾಗಿ ಬಿಸಿಲು ಕಾಣಿಸಿಕೊಂಡಿರುವುದರಿಂದ ಕಾಫಿ ಬೆಳೆಗಾರರು ಕಾಫಿ ಕೊಯ್ಲು ಮಾಡಲು ಉತ್ಸುಕರಾಗಿದ್ದಾರೆ. ಆದರೆ, ಕಾಫಿಯ ತೋಟಗಳಲ್ಲಿ ಅರಳಿರುವ ಹೂಗಳು ಕೊಯ್ಲಿಗೆ ತೊಡಕಾಗಿರುವುದರಿಂದ ಕೆಲವೆಡೆ ಬೆಳೆಗಾರರು ಕೊಯ್ಲು ಮಾಡುವುದನ್ನು ಸ್ಥಗಿತಗೊಳಿಸಿದ್ದಾರೆ.

‘ಅರಳಿರುವ ಹೂಗಳು ಉದುರಿ ಮುಂದಿನ ವರ್ಷದ ಇಳುವರಿ ಮೇಲೆ ಪರಿಣಾಮ ಬೀರುವುದರಿಂದ ಕೊಯ್ಲು ಮಾಡಲಾಗುತ್ತಿಲ್ಲ. ಒಂದೆಡೆ ಬಿಸಿಲು ಕಾಣಿಸಿಕೊಂಡಿದ್ದು ಕಾಫಿ ಒಣಗಿಸಲು ಸೂಕ್ತವಾಗಿದ್ದರೆ, ಮತ್ತೊಂದಡೆ ಹೂಗಳು ಉದುರದಂತೆ ಎಚ್ಚರಿಕೆಯಿಂದ ಕೊಯ್ಲು ಮಾಡಬೇಕಾಗಿದೆ’ ಎಂದು ನೆಲಜಿ ಗ್ರಾಮದ ಬೆಳೆಗಾರ ನಂಜಪ್ಪ ಹೇಳಿದರು.

ಪ್ರತಿ ವರ್ಷ ಕಾಫಿ ಕೊಯ್ಲು ಪೂರ್ಣಗೊಂಡ ನಂತರ ಬೆಳೆಗಾರರು ಹೂ ಮಳೆಗಾಗಿ ಕಾತರಿಸುತ್ತಾರೆ. ಫೆಬ್ರುವರಿ 15ರ ನಂತರ ಮಳೆ ಬಂದರೆ ಸೂಕ್ತ ಎಂಬುದು ಬೆಳೆಗಾರ ಅಭಿಪ್ರಾಯ.

ನೀರಿನ ಸೌಕರ್ಯ ಉಳ್ಳವರು ನೀರಾವರಿ ಮೂಲಕ ಕಾಫಿ ಹೂವರಳಿಸಿ ಹೆಚ್ಚಿನ ಇಳುವರಿ ತೆಗೆಯುತ್ತಿದ್ದಾರೆ. ನಿಗದಿತ ಅವಧಿಯಲ್ಲಿ ಕಾಫಿಗೆ ನೀರುಡಿಸಿ ಬ್ಯಾಕಿಂಗ್ ನೀರನ್ನು ಒದಗಿಸಿ ಇಳುವರಿ ಹೆಚ್ಚಾಗುವಂತೆ ನೋಡಿಕೊಳ್ಳುತ್ತಾರೆ. ಇತ್ತೀಚಿನ ವರ್ಷಗಳಲ್ಲಿ ಮಳೆ ಏರುಪೇರು ಆಗುತ್ತಿದ್ದು, ಸಣ್ಣ ಮತ್ತು ಮಧ್ಯಮ ಬೆಳೆಗಾರರು ಉತ್ತಮ ಇಳುವರಿ ಪಡೆಯಲು ಸಾಧ್ಯವಾಗುತ್ತಿಲ್ಲ.

ಈ ವರ್ಷ ಸುರಿದ ಅಕಾಲಿಕ ಮಳೆಯಿಂದ ಮುಂದಿನ ವರ್ಷ ಕಾಫಿ ಬೇಗನೆ ಹಣ್ಣಾಗಲಿದೆ. ಒಂದೇ ಗಿಡದಲ್ಲಿ ಕಾಫಿಕಾಯಿಗಳು, ಹಣ್ಣು ಇರುವ ಸಾಧ್ಯತೆಯಿದ್ದು ಕೊಯ್ಲಿಗೆ ತೊಡಕಾಗಲಿದೆ ಎಂದು ಮತ್ತೋರ್ವ ಬೆಳೆಗಾರ ಅಪ್ಪಚ್ಚು ಅಭಿಪ್ರಾಯಪಟ್ಟರು.

‘ಹೂ ಅರಳಿರುವ ಕಡೆ ಕೊಯ್ಲನ್ನು ಸ್ವಲ್ಪ ಮುಂದೂಡಬೇಕಾಗುತ್ತದೆ’ ಎಂದು ಕಾಫಿ ಮಂಡಳಿಯ ಉಪನಿರ್ದೇಶಕ ಚಂದ್ರಶೇಖರ್ ತಿಳಿಸಿದರು.

ನಾಪೋಕ್ಲು  ಸಮೀಪದ ನೆಲಜಿ ಗ್ರಾಮದಲ್ಲಿ ಕಾಫಿಯ ಗಿಡಗಳಲ್ಲಿ ಹೂಗಳು ಅರಳಿವೆ.. 
ನಾಪೋಕ್ಲು  ಸಮೀಪದ ನೆಲಜಿ ಗ್ರಾಮದಲ್ಲಿ ಕಾಫಿಯ ಗಿಡಗಳಲ್ಲಿ ಹೂಗಳು ಅರಳಿವೆ.. 
ಶನಿವಾರಸಂತೆ ಮಾರುಕಟ್ಟೆಯ ಜಾಗದಲ್ಲಿ ಕಾಫಿ ಒಣಗಿಸುತ್ತಿರುವ ದೃಶ್ಯ ಶನಿವಾರ ಕಂಡು ಬಂತು
ಶನಿವಾರಸಂತೆ ಮಾರುಕಟ್ಟೆಯ ಜಾಗದಲ್ಲಿ ಕಾಫಿ ಒಣಗಿಸುತ್ತಿರುವ ದೃಶ್ಯ ಶನಿವಾರ ಕಂಡು ಬಂತು
ಪ್ರತಿ ವರ್ಷ ಫೆಬ್ರುವರಿ, ಮಾರ್ಚ್‌ನಲ್ಲಿ ಅರಳುತ್ತಿದ್ದ ಕಾಫಿ ಹೂ ಜನವರಿ ಮೊದಲ ವಾರದಲ್ಲಿ ಸುರಿದ ಮಳೆ ಕಾಫಿ ಹಣ್ಣಿನ ಮಧ್ಯೆಯೆ ಹೂಗಳ ರಾಶಿ
ಈ ವರ್ಷದ ಮಳೆಯಿಂದ ಕಾಫಿ ಬೆಳೆಗಾರರು ಅತಂತ್ರ ಸ್ಥಿತಿಗೆ ಒಳಗಾಗಿದ್ದಾರೆ. ಕಳೆದ 3 ವರ್ಷಗಳಿಂದ ಬರುತ್ತಿರುವ ಅಕಾಲಿಕ ಮಳೆಯಿಂದಾಗಿ ಕಾಫಿ ಕೊಯ್ಲು ಮಾಡಲಾಗದೆ ತೋಟಗಳಲ್ಲೇ ಕಾಫಿ ನಾಶವಾಗುತ್ತಿದೆ
-ಎ.ಎಂ.ಆನಂದ್ ಅಪ್ಪಶೆಟ್ಟಳ್ಳಿ ಶನಿವಾರಸಂತೆ
ಗೊಂದಲಕ್ಕೆ ಸಿಲುಕಿದ ಕಾಫಿ ಬೆಳೆಗಾರರು
ಎಚ್.ಎಸ್.ಶರಣ್ ಶನಿವಾರಸಂತೆ: ಕಳೆದ ವಾರ ಸುರಿದ ಅಕಾಲಿಕ ಮಳೆಯಿಂದ ಹೋಬಳಿಯ ಬಹುತೇಕ ಭಾಗಗಳ ಕಾಫಿ ತೋಟಗಳಲ್ಲಿ ಕಾಫಿ ಹೂಗಳು ಅರಳಿವೆ. ಈ ವರ್ಷದ ಕಾಫಿ ಪಸಲನ್ನು ಇನ್ನು ಹಲವು ರೈತರು ಕೊಯ್ಲು ಮಾಡಿಲ್ಲ. ಈ ಹಂತದಲ್ಲೇ ಹೂ ಅರಳಿರುವುದರಿಂದ ಕಾಫಿ ಬೆಳೆಗಾರರು ಗೊಂದಲಕ್ಕೆ ಒಳಗಾಗಿದ್ದಾರೆ. ಈಗ ಬಿಟ್ಟಿರುವ ಕಾಫಿ ಹೂವಿನಿಂದ ಮುಂದಿನ ವರ್ಷದ ಫಸಲು ಸಿಗುತ್ತದೆಯೋ ಇಲ್ಲವೋ ಎಂಬ ಗೊಂದಲದಲ್ಲಿ ಕಾಫಿ ಬೆಳಗಾರರು ಇದ್ದಾರೆ. ಕಳೆದ ವರ್ಷ ಅಕಾಲಿಕ ಮಳೆ ಬಂದಿದ್ದರೂ ಇಷ್ಟರಮಟ್ಟಿಗೆ ಹೂವು ಅರಳಿರಲಿಲ್ಲ. ನಂತರ ಫೆಬ್ರುವರಿ ಮಾರ್ಚ್ ತಿಂಗಳಿನಲ್ಲಿ ಬಂದಂತ ಅಲ್ಪ ಪ್ರಮಾಣದ ಮಳೆಯಿಂದ ಕಾಫಿ ಹೂವು ಅರಳಿ ಈ ವರ್ಷದ ಕಾಫಿ ಪಸಲು ಯಥಾ ಸ್ಥಿತಿಯಲ್ಲಿ ಇತ್ತು. ಈಗ ಬಂದಿರುವ ಅಕಾಲಿಕ ಮಳೆಯಿಂದಾಗಿ ಕಾಫಿ ಬೆಳೆಗಾರರು ಕಾಫಿ ಗಿಡದಲ್ಲಿ ಬಿಟ್ಟಿರುವ ಫಸಲನ್ನು ತೆಗೆಯಲಾಗದೆ ಮುಂದಿನ ವರ್ಷದ ಫಸಲನ್ನು ಉಳಿಸಿಕೊಳ್ಳಲೂ ಆಗದೇ ಚಿಂತೆಗೀಡಾಗಿದ್ದಾರೆ. ಶನಿವಾರಸಂತೆ ಮತ್ತು ಕೊಡ್ಲಿಪೇಟೆ ಹೋಬಳಿ ಭಾಗದ ಕಾಫಿ ಬೆಳೆಗಾರರು ರೊಬೊಸ್ಟಾ ಕಾಫಿ ಪಸಲು ಪಡೆದ ಕೆಲವೇ ದಿನಗಳ ಬಿಡುವಿನ ನಂತರ ತಮ್ಮ ತೋಟಗಳಿಗೆ ತುಂತುರು ನೀರಾವರಿಯ ಮೂಲಕ ನೀರು ಸಂಪಡಿಸಿ ಕಾಫಿ ಹೂ ಅರಳಿಸಲು ಮುಂದಾಗುತ್ತಿದ್ದರು. ಅರೇಬಿಕ ಕಾಫಿಗಿಡಕ್ಕೆ ಮಾರ್ಚ್ ಮತ್ತು ಏಪ್ರಿಲ್ ತಿಂಗಳ ಮಳೆಯ ಆಶ್ರಯದಿಂದಲೇ ಕಾಫಿ ಹೂ ಮಾಡಲು ಬಯಸುತ್ತಿದ್ದರು. ಆದರೆ ಈ ವರ್ಷದ ಜನವರಿ ಮೊದಲನೇ ವಾರದಲ್ಲೇ ಬಂದಿರುವ ಅಕಾಲಿಕ ಮಳೆಯಿಂದ ಬೆಳೆಗಾರರ ಗೊಂದಲಕ್ಕೆ ಒಳಗಾಗಿದ್ದಾರೆ. ಈಗ ಬಂದಿರುವ ಹೂವಿನಿಂದ ಈ ವರ್ಷದ ಮುಂಗಾರು ಮಳೆಯ ಅವಧಿಯಲ್ಲೇ ಕಾಫಿ ಹಣ್ಣು ಬರುವ ಸಾಧ್ಯತೆ ಇದೆ ಎಂಬ ಭೀತಿಯೂ ಬೆಳೆಗಾರರನ್ನೂ ಕಾಡುತ್ತಿದೆ. ಈ ಗೊಂದಲದ ಪರಿಹಾರಕ್ಕಾಗಿ ಪರಿಣಿತ ಅಧಿಕಾರಿಗಳು ವೈಜ್ಞಾನಿಕವಾಗಿ ಕಾಫಿ ಬೆಳಗಾರರಿಗೆ ಸೂಕ್ತವಾದ ಮಾಹಿತಿ ನೀಡುವ ಅಗತ್ಯತೆ ಇದೆ. ಮತ್ತೊಂದೆಡೆ ಕೆಲವು ಬೆಳೆಗಾರರು ಕಾಫಿ ಕೊಯ್ಲು ಮಾಡಲು ವ್ಯಾಪಾರಿಗಳಿಂದ ಮುಂಗಡ ಹಣ ಪಡೆದಿದ್ದಾರೆ. ಹಣ ನೀಡಿದವರು ಒಣಗಿದ ಕಾಫಿ ಬೀಜಗಳನ್ನು ಮಾರಾಟ ಕೇಂದ್ರಕ್ಕೆ ತರುವಂತೆ ಒತ್ತಡವನ್ನೂ ಹಾಕುತ್ತಿದ್ದಾರೆ. ಹೂ ಅರಳಿರುವುದರಿಂದ ಕೊಯ್ಲು ಮಾಡಲಾಗದೇ ಬೆಳೆಗಾರರು ಪರಿತಪಿಸುವಂತಾಗಿದೆ.

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT