ಕೊಪ್ಪಳ | ಬಲ್ದೋಟ ಉಕ್ಕಿನ ಕಾರ್ಖಾನೆ: ಸಂಘರ್ಷಕ್ಕೆ ತಿರುಗಿದ ಹೋರಾಟ

ಕೊಪ್ಪಳ: ಮೂರು ದಿನಗಳ ಹಿಂದೆ ಬಲ್ಡೋಟಾ ಕಂಪನಿಯ ಆವರಣದಲ್ಲಿ ಜಾನುವಾರು ನುಗ್ಗಿಸಿದ ಕಾರಣಕ್ಕಾಗಿ ಒಂಬತ್ತು ಜನ ಹೋರಾಟಗಾರರ ಮೇಲೆ ಕೊಪ್ಪಳ ಗ್ರಾಮೀಣ ಪೊಲೀಸ್‌ ಠಾಣೆಯಲ್ಲಿ ಗುರುವಾರ ದೂರು ದಾಖಲಾಗಿದೆ. ಹೋರಾಟಗಾರರಾದ ಬಂಡಾಯ ಸಾಹಿತಿ ಅಲ್ಲಮಪ್ರಭು ಬೆಟ್ಟದೂರು ಹನುಮಂತಪ್ಪ ಕಲ್ಕೇರಿ ಮಂಗಳೇಶ್ ರಾಥೋಡ್‌ ಮುದುಕಪ್ಪ ಹೊಸಮನಿ ಕೆ.ಬಿ. ಗೋನಾಳ್‌ ಯಮನೂರಪ್ಪ ಪೂಜಾರ ಮಂಜುನಾಥ ಗೊಂಡಬಾಳ ಭೀಮೇಶ ಕಲಕೇರಿ ಮತ್ತು ಎ.ಗಫಾರ್‌ ವಿರುದ್ಧ ಎಫ್‌ಐಆರ್‌ ದಾಖಲಾಗಿದೆ.  

ಕೊಪ್ಪಳ: ಬಲ್ಡೋಟಾ ಕಂಪನಿ ಮುಂಭಾಗದಲ್ಲಿ ಶುಕ್ರವಾರ ನಡೆದ ಗಲಾಟೆಗೆ ಸಂಬಂಧಿಸಿದಂತೆ ಗ್ರಾಮೀಣ ಪೊಲೀಸ್‌ ಠಾಣೆಯಲ್ಲಿ ದೂರು ಹಾಗೂ ಪ್ರತಿದೂರು ದಾಖಲಾಗಿದೆ. ಗಾಯಗೊಂಡ ಕುರಿಗಾಯಿ ನೀಡಿದ ದೂರಿನಲ್ಲಿ ‘ಕುರಿಗಳಿಗೆ ನೀರು ಕುಡಿಸಲು ಒಳಗಡೆ ಹೋಗಲು ಬಿಡದೆ ಬಲ್ಡೋಟಾ ಕಂಪನಿಯ ಭದ್ರತಾ ಸಿಬ್ಬಂದಿ ಸುರೇಶ ಬಾದಾಮಿ ಬಸವರಾಜ ಪಟ್ಟಣಶೆಟ್ಟಿ ವ್ಯವಸ್ಥಾಪಕ ಎಂ. ಮಹೇಶ ವಿಠ್ಠಲರಾಜ ಕಂಪನಿ ವ್ಯವಸ್ಥಾಪಕರಾದ ಪ್ರಭು ಪ್ರವೀಣ ಸೇರಿದಂತೆ 25 ಜನ ಅಡ್ಡಗಟ್ಟಿ ಹಲ್ಲೆ ಮಾಡಿದ್ದಾರೆ’ ಎಂದು ತಿಳಿಸಿದ್ದಾರೆ.  ಪ್ರತಿದೂರು ದಾಖಲಿಸಿರುವ ಕಂಪನಿಯ ಭದ್ರತಾ ಸಿಬ್ಬಂದಿ ‘ದನ ಹಾಗೂ ಕುರಿಗಳನ್ನು ಬಲವಂತವಾಗಿ ಕಂಪನಿಯ ಆವರಣದಲ್ಲಿ ನುಗ್ಗಿಸಿದ್ದನ್ನು ತಡೆಯಲು ಹೋದ ನಮ್ಮ ಸಿಬ್ಬಂದಿ ಮಂಜುನಾಥ ರೆಡ್ಡೇರ ಮೇಲೆ ಹಲ್ಲೆ ಮಾಡಲಾಗಿದೆ. ದೇವಪ್ಪ ಹಾಲಳ್ಳಿ ಮಲ್ಲಪ್ಪ ವೆಂಕಟೇಶ ಲಿಂಗದಳ್ಳಿ ಮತ್ತು ಇತರೆ 25 ಜನ ಅವಾಚ್ಯವಾಗಿ ಬೈಯ್ದು ಹೊಡೆದು ಜೀವಬೆದರಿಕೆ ಒಡ್ಡಿದ್ದಾರೆ’ ಎಂದು ದೂರಿನಲ್ಲಿ ಆರೋಪಿಸಿದ್ದಾರೆ.