ಸಂದರ್ಶನ | ಯಡಿಯೂರಪ್ಪ ಸಾಧನೆಗಳೇ ಶ್ರೀರಕ್ಷೆ: BJP ಅಭ್ಯರ್ಥಿ ಡಾ.ಧನಂಜಯ ಸರ್ಜಿ

ಬಿಜೆಪಿ ಮೊದಲಿನಿಂದಲೂ ಶಿಸ್ತಿಗೆ ಹೆಸರಾದ ಪಕ್ಷ. ಚುನಾವಣೆಯ ಸಿದ್ಧತೆಯೂ ಶಿಸ್ತುಬದ್ಧವಾಗಿದೆ. ಇದು ಕಾರ್ಯಕರ್ತರ ಚುನಾವಣೆ. ನಮ್ಮ ಚುನಾವಣೆ ಎಂದೇ ಭಾವಿಸಿ ಕಾರ್ಯಕರ್ತರು ಓಡಾಡುತ್ತಿದ್ದಾರೆ.

ಬಿಜೆಪಿ ಸಂಸದೀಯ ಮಂಡಳಿ ಸದಸ್ಯ ಬಿ.ಎಸ್.ಯಡಿಯೂರಪ್ಪ ಮುಖ್ಯಮಂತ್ರಿ ಆಗಿದ್ದಾಗ ನೌಕರರ ಸ್ನೇಹಿ ಆಡಳಿತ ನೀಡಿದ್ದರು. ವೇತನ ಆಯೋಗದ ವರದಿ ಜಾರಿಗೊಳಿಸಿದ್ದರು. ಬಿಜೆಪಿ– ಜೆಡಿಎಸ್ ಮೈತ್ರಿ ಸರ್ಕಾರವಿದ್ದಾಗ ಪದವೀಧರರ– ವಿಶೇಷವಾಗಿ ಶಿಕ್ಷಕರು, ಉಪನ್ಯಾಸಕರಿಗೆ ಹಾಗೂ ಖಾಸಗಿ ಸಂಸ್ಥೆಗಳಲ್ಲಿ ಉದ್ಯೋಗ ಮಾಡುತ್ತಿರುವವರಿಗೆ ವಿವಿಧ ಭತ್ಯೆಗಳು, ಆರೋಗ್ಯ ಸೌಲಭ್ಯಗಳು, ಮಹಿಳಾ ನೌಕರರಿಗೆ 6 ತಿಂಗಳ ಶಿಶುಪಾಲನಾ ರಜೆ, ರಾಜ್ಯ ಸರ್ಕಾರಿ ನೌಕರರ ಪ್ರಭಾರ ಭತ್ಯೆ ಹೆಚ್ಚಳ ಹಾಗೂ ವಿವಿಧ ಪದವೀಧರರಿಗೆ ಸರ್ಕಾರದ ವಿವಿಧ ಇಲಾಖೆಗಳಲ್ಲಿ ನೇಮಕಾತಿ ಮಾಡಿದ್ದಾರೆ. ಈ ಸಾಧನೆಗಳನ್ನು ಮುಂದಿಟ್ಟುಕೊಂಡು ಮತ ಯಾಚಿಸುತ್ತಿದ್ದೇವೆ. 

ಕ್ಷೇತ್ರದಲ್ಲಿ ನನ್ನ ಮಾರ್ಗದರ್ಶಕರಾದ ಡಿ.ಎಚ್. ಶಂಕರಮೂರ್ತಿ ಆರು ಬಾರಿ ಗೆದ್ದು ಬಂದಿದ್ದರು. ಅವರ ಅವಧಿಯಲ್ಲಿ ಪದವೀಧರರು, ವಿಶೇಷವಾಗಿ ಸರ್ಕಾರಿ ನೌಕರರಿಗೆ ಅನೇಕ ಸವಲತ್ತುಗಳು ದೊರೆತಿವೆ. ನನಗೆ ಕೆಲಸ ಮಾಡುವ ಉತ್ಸಾಹ ಇದೆ. ಪದವೀಧರರ ಕಲ್ಯಾಣಕ್ಕೆ ಪಕ್ಷದೊಂದಿಗೆ ನಾನೂ ಬದ್ಧ. ಪ್ರವಾಸೋದ್ಯಮ, ಐಟಿ ಪಾರ್ಕ್, ಮತ್ಸ್ಯೋದ್ಯಮ, ಸ್ಟಾರ್ಟ್ ಅಪ್‌ಗಳಿಗೆ ಹೆಚ್ಚಿನ ಒತ್ತು ಕೊಟ್ಟು ಯುವಕರು ಉದ್ಯೋಗವನ್ನು ಅರಸಿ ಬೇರೆಡೆ ಹೊಗುವುದನ್ನು ತಡೆಯುವೆ. ಈ ಕಾರಣಕ್ಕೆ ನನಗೇ ಮತ ನೀಡುತ್ತಾರೆಂಬ ನಂಬಿಕೆ ಇದೆ.

ಅನುಭವದ ವಿಷಯ ಬಹಳ ಸೂಕ್ಷ್ಮವಾದುದು. ಅದಕ್ಕೆ ಮಿತಿ ಹೇರಬಾರದು. ನಮ್ಮ ಪಕ್ಷದ ಸಾಂಘಿಕ ಅನುಭವಿದೆಯಲ್ಲಾ ಪ್ರಾಯಶಃ ಅದಕ್ಕಿಂತ ಬೇರೆ ಅನುಭವವಿರಲಾರದು. ನಾನು ಸಾಂಘಿಕ ಅನುಭವದಲ್ಲಿ ನಂಬಿಕೆ ಇಟ್ಟಿದ್ದೇನೆ. ಒಬ್ಬ ವೈದ್ಯನಾಗಿ ಸಾಮಾಜಿಕ, ಶೈಕ್ಷಣಿಕ, ಸಂಘ ಸಂಸ್ಥೆಗಳಲ್ಲಿ ಕೆಲಸ ಮಾಡಿದ್ದೇನೆ. ಆರ್‌ಎಸ್‌ಎಸ್‌ನಲ್ಲೂ ನಾನು ಹಳಬ. 10ನೇ ವಯಸ್ಸಿನಿಂದಲೂ ಸ್ವಯಂ ಸೇವಕ. ಐಟಿಸಿ ಮತ್ತು ಒಟಿಸಿ ಕೋರ್ಸ್ 30 ವರ್ಷಗಳ ಹಿಂದೆಯೇ ಮುಗಿದಿದ್ದು, ಒಂದು ಶಾಖೆಯ ಮುಖ್ಯ ಶಿಕ್ಷಕನಾಗಿ, ಹಲವು ಜವಾಬ್ದಾರಿಗಳನ್ನು ನಿರ್ವಹಿಸಿ, ವಿಕಾಸ ಟ್ರಸ್ಟ್ ಅಧ್ಯಕ್ಷನಾಗಿ ಕೆಲಸ ಮಾಡಿದ್ದೇನೆ. ಪಕ್ಷದಲ್ಲೂ ಸಕ್ರಿಯನಾಗಿದ್ದೇನೆ.

ಕರಾವಳಿ ಭಾಗ ಹೇಳಿಕೇಳಿ ಬಿಜೆಪಿಯ ಭದ್ರಕೋಟೆ. ಕಾರಣಾಂತರಗಳಿಂದ ಎದುರಾಗಿರುವ ಮುನಿಸಿಗೆ ಪಕ್ಷ ಹಾಗೂ ಸಂಘ ಶಮನಕಾರಿ ಮದ್ದು ಅರೆದಾಗಿದೆ. ರಘುಪತಿ ಭಟ್ ಅವರನ್ನು ಪಕ್ಷ ಈಗಾಗಲೇ ಉಚ್ಛಾಟನೆ ಮಾಡಿದೆ. ಇಲ್ಲಿ ಪಕ್ಷ ಮುಖ್ಯವೇ ಹೊರತು ವ್ಯಕ್ತಿಯ ಪ್ರತಿಷ್ಠೆಯಲ್ಲ. ಅವರ ಬಂಡಾಯಕ್ಕೆ ಸೋಲಾಗಲಿದೆ.

ಟಿಕೆಟ್ ಆಕಾಂಕ್ಷಿಗಳ ಸಂಖ್ಯೆ ಹೆಚ್ಚಿದ್ದಾಗ ಇಂತಹ ಆರೋಪಗಳು ಸಹಜ. ಅದರಲ್ಲಿ ಯಾವುದೇ ಹುರುಳಿಲ್ಲ. ಈ ಬಾರಿ ನನ್ನ ಮೇಲೆ ವಿಶ್ವಾಸ ಇಟ್ಟು ಟಿಕೆಟ್ ಕೊಟ್ಟಿದ್ದಾರೆ.

ಲೋಕಸಭಾ ಚುನಾವಣೆ ವೇಳೆ ಪಕ್ಷದಿಂದ ಉಚ್ಛಾಟನೆಗೊಂಡಿರುವ ಈಶ್ವರಪ್ಪ, ಈಗ ‍‍ಪರಿಷತ್ ಚುನಾವಣೆ ವೇಳೆ ಉಚ್ಚಾಟನೆಗೊಂಡಿರುವ ರಘುಪತಿ ಭಟ್ ಇಬ್ಬರೂ ಇಲ್ಲಿಯವರೆಗೆ ಸ್ವತಂತ್ರವಾಗಿ ಬೆಳೆದವರಲ್ಲ. ಇಬ್ಬರಿಗೂ ಇದ್ದದ್ದು ಪಕ್ಷದ ಬಲ. ಅವರ ಬೆಳವಣಿಗೆಗೆ ಪಕ್ಷವೇ ತಾಯಿ ಬೇರು. ಇದೀಗ ತಾಯಿ ಬೇರನ್ನೇ ತುಂಡರಿಸಿಕೊಂಡವರಿಗೆ ನಾನೇನು ಹೇಳಲಿ. ಪ್ರಜ್ಞಾವಂತ ಜನರೇ ಸೂಕ್ತ ಉತ್ತರ ಕೊಡಲಿದ್ದಾರೆ.