ತುಮಕೂರು | ಬಾಳೆಹಣ್ಣು ದುಬಾರಿ; ಒಣದ್ರಾಕ್ಷಿ ಗಗನಮುಖಿ

ತುಮಕೂರು : ತರಕಾರಿ ದರ ಇಳಿಕೆಯತ್ತ ಮುಖ ಮಾಡಿದ್ದರೆ, ಸೊಪ್ಪು ಮತ್ತಷ್ಟು ಅಗ್ಗವಾಗಿದೆ. ಧಾನ್ಯ ಅಲ್ಪ ಕಡಿಮೆಯಾಗಿದ್ದು, ಬಾಳೆಹಣ್ಣು ಸೇರಿದಂತೆ ಹಣ್ಣುಗಳು ದುಬಾರಿಯಾಗಿವೆ. ಒಣದ್ರಾಕ್ಷಿ ಗಗನಮುಖಿಯಾಗಿದ್ದು, ಮೂರು ತಿಂಗಳ ಅಂತರದಲ್ಲಿ ದುಪ್ಪಟ್ಟಾಗಿದೆ.

. ಏರಿಕೆಯಾಗಿದ್ದ ತರಕಾರಿ ಬೆಲೆ ಈ ವಾರ ಇಳಿಕೆಯತ್ತ ಸಾಗಿದೆ. ಬೀನ್ಸ್ ಬೆಲೆ ತಗ್ಗಿದ್ದು, ಆಲೂಗಡ್ಡೆ, ತೊಂಡೆಕಾಯಿ ಕಡಿಮೆಯಾಗಿದೆ. ಹಾಗಲಕಾಯಿ, ಕ್ಯಾಪ್ಸಿಕಂ ಅಲ್ಪ ಏರಿಕೆಯಾಗಿರುವುದನ್ನು ಹೊರತುಪಡಿಸಿದರೆ ಇತರೆ ತರಕಾರಿ ದರದಲ್ಲಿ ಹೆಚ್ಚಿನ ವ್ಯತ್ಯಾಸವಾಗಿಲ್ಲ.

. ಜಿಗಿತ ಕಂಡಿದ್ದ ಟೊಮೆಟೊ ದರ ಒಂದೇ ವಾರದಲ್ಲಿ ಮತ್ತೆ ಹಿಮ್ಮುಖವಾಗಿ ಸಾಗಿದ್ದು, ಕೆ.ಜಿ ₹20–25ಕ್ಕೆ ಇಳಿಕೆಯಾಗಿದೆ.

. ಸೊಪ್ಪು ಇಳಿಕೆ: ಎರಡು ವಾರಗಳ ಕಾಲ ಉತ್ತಮ ಬೆಲೆ ಕಂಡುಕೊಂಡಿದ್ದ ಸೊಪ್ಪು ಮತ್ತೆ ಕುಸಿತದತ್ತ ಮುಖಮಾಡಿದೆ. ಕೊತ್ತಂಬರಿ ಸೊಪ್ಪು ಕೆ.ಜಿ ₹20–30, ಸಬ್ಬಕ್ಕಿ ಕೆ.ಜಿ ₹30–40, ಮೆಂತ್ಯ ಸೊಪ್ಪು ಕೆ.ಜಿ ₹25–30, ಪಾಲಕ್ ಸೊಪ್ಪು (ಕಟ್ಟು) ₹30ಕ್ಕೆ ತಗ್ಗಿದೆ.

. ಬಾಳೆಹಣ್ಣು ದುಬಾರಿ: ಆಷಾಢದ ಸಮಯದಲ್ಲಿ ಏಲಕ್ಕಿ ಬಾಳೆಹಣ್ಣು ಮತ್ತಷ್ಟು ದುಬಾರಿಯಾಗಿದ್ದು, ದಾಳಿಂಬೆ, ಪೈನಾಪಲ್, ಕಲ್ಲಂಗಡಿ, ದ್ರಾಕ್ಷಿ ಧಾರಣೆ ಏರಿಕೆಯಾಗಿದೆ. ಸೀತಾಫಲ ಒಮ್ಮೆಲೆ ದುಪ್ಪಟ್ಟಾಗಿದ್ದು, ಡ್ರ್ಯಾಗನ್ ಫ್ರೂಟ್ ಮಾತ್ರ ಕಡಿಮೆಯಾಗಿದೆ.

. ಅಡುಗೆ ಎಣ್ಣೆ: ಪಾಪಾಯಿಲ್ ದರ ತುಸು ಏರಿಕೆಯಾಗಿದ್ದರೆ, ಕಡಲೆಕಾಯಿ ಎಣ್ಣೆ ಕೊಂಚ ಕಡಿಮೆಯಾಗಿದೆ. ಗೋಲ್ಡ್ವಿನ್ನರ್ ಕೆ.ಜಿ ₹145–148, ಪಾಮಾಯಿಲ್ ಕೆ.ಜಿ ₹115–129, ಕಡಲೆಕಾಯಿ ಎಣ್ಣೆ ಕೆ.ಜಿ ₹160–165ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಸಿಗುತ್ತಿದೆ.

. ಬೇಳೆ ಧಾನ್ಯ: ಕಾಳುಗಳ ಧಾರಣೆ ಅಲ್ಪ ತಗ್ಗಿದ್ದು, ಹೆಸರುಕಾಳು ಹೊರತುಪಡಿಸಿದರೆ ಅಲಸಂದೆ, ಅವರೆಕಾಳು, ಹುರುಳಿಕಾಳು ಕೊಂಚ ಕಡಿಮೆಯಾಗಿದೆ. ಸಕ್ಕರೆ ಮತ್ತೆ ಹೆಚ್ಚಳವಾಗಿದೆ. ಬೇಳೆ ಯಥಾಸ್ಥಿತಿ ಕಾಯ್ದುಕೊಂಡಿದೆ.

. ದ್ರಾಕ್ಷಿ ದುಬಾರಿ: ಒಣ ಹಣ್ಣುಗಳ ಬೆಲೆ ಕಡಿಮೆ ಆಗುವಂತೆ ಕಾಣುತ್ತಿಲ್ಲ. ಒಣದ್ರಾಕ್ಷಿ ಆಕಾಶದತ್ತ ಮುಖ ಮಾಡಿದ್ದು, ಬಾದಾಮಿ, ಗೋಡಂಬಿ ಸಹ ದುಬಾರಿಯಾಗಿದ್ದು, ಗಸಗಸೆ, ಏಲಕ್ಕಿ ಕೊಂಚ ತಗ್ಗಿದೆ.

. ಧನ್ಯ ಕೆ.ಜಿ ₹110–120, ಬ್ಯಾಡಗಿ ಮೆಣಸಿನಕಾಯಿ ಕೆ.ಜಿ ₹220–230, ಗೌರಿಬಿದನೂರು ಖಾರದ ಮೆಣಸಿನಕಾಯಿ ಕೆ.ಜಿ ₹165–180, ಹುಣಸೆಹಣ್ಣು ₹150–180, ಬೆಲ್ಲ ಕೆ.ಜಿ ₹50–55, ಕಾಳುಮೆಣಸು ಕೆ.ಜಿ ₹720–750, ಜೀರಿಗೆ ಕೆ.ಜಿ ₹240–260, ಚಕ್ಕೆ ಕೆ.ಜಿ ₹250–260, ಲವಂಗ ಕೆ.ಜಿ ₹830–850, ಗುಣಮಟ್ಟದ ಗಸಗಸೆ ಕೆ.ಜಿ ₹1,650–1,700, ಏಲಕ್ಕಿ ಕೆ.ಜಿ ₹3,300–3,400, ಬಾದಾಮಿ ಕೆ.ಜಿ ₹850–900, ಗೋಡಂಬಿ ಕೆ.ಜಿ ₹850–900, ಒಣದ್ರಾಕ್ಷಿ ಕೆ.ಜಿ ₹450–480ಕ್ಕೆ ಮಂಡಿಪೇಟೆ ಮಾರುಕಟ್ಟೆಯಲ್ಲಿ ಮಾರಾಟವಾಗುತ್ತಿದೆ.

. ಕೋಳಿ : ಕೋಳಿ ಮಾಂಸದ ಬೆಲೆ ಯಥಾಸ್ಥಿತಿ ಕಾಯ್ದುಕೊಂಡಿದ್ದು, ಬ್ರಾಯ್ಲರ್ ಕೋಳಿ ಕೆ.ಜಿ ₹120, ರೆಡಿ ಚಿಕನ್ ಕೆ.ಜಿ ₹180, ಸ್ಕಿನ್ಲೆಸ್ ಕೆ.ಜಿ ₹200, ಮೊಟ್ಟೆಕೋಳಿ (ಫಾರಂ) ಕೆ.ಜಿ ₹120ಕ್ಕೆ ಸಿಗುತ್ತಿದೆ.

. ಮೀನು ದುಬಾರಿ : ಮೀನುಗಳು ಬಹುತೇಕ ದುಬಾರಿಯಾಗಿವೆ. ಬಂಗುಡೆ ಕೆ.ಜಿ ₹480, ಬೂತಾಯಿ ₹410, ಬೊಳಿಂಜರ್ ₹240, ಅಂಜಲ್ ಕೆ.ಜಿ ₹1,230, ಬಿಳಿಮಾಂಜಿ ಕೆ.ಜಿ 1,320, ಕಪ್ಪುಮಾಂಜಿ ₹850, ಇಂಡಿಯನ್ ಸಾಲ್ಮನ್ ₹1,100, ಸೀಗಡಿ ಕೆ.ಜಿ ₹510–720, ಏಡಿ ಕೆ.ಜಿ ₹380ಕ್ಕೆ ನಗರದ ಮತ್ಸ್ಯದರ್ಶಿನಿಯಲ್ಲಿ ಮಾರಾಟವಾಗುತ್ತಿದೆ.