ಹರಪನಹಳ್ಳಿ: ಬರದಿಂದ ತತ್ತರ, 40 ಗ್ರಾಮಗಳಿಗೆ ಖಾಸಗಿ ಕೊಳವೆಬಾವಿ ನೀರೇ ಗತಿ

ರಾಜೀವ್‌ ಗಾಂಧಿ ಸಬ್‌ಮಿಷನ್‌ ಯೋಜನೆಯಡಿ ಮೂರು ಹಂತದ ಬಹುಗ್ರಾಮ ಕುಡಿಯುವ ನೀರಿನ ಯೋಜನೆಯ ಕಾಮಗಾರಿಗಳು ಸಮರ್ಪಕ ಅನುಷ್ಠಾನಗೊಂಡಿಲ್ಲ. ಚುನಾವಣೆ ಪೂರ್ವದಲ್ಲಿ 56 ಕೆರೆಗಳಿಗೆ ನೀರು ತುಂಬಿಸುವ ಪ್ರಯೋಗ ಯಶಸ್ವಿಯಾಯಿತು ಎನ್ನುವಷ್ಟರಲ್ಲಿ ನದಿಯಲ್ಲಿ ನೀರು ಕ್ಷೀಣಿಸಿ, ಜನರಿಗೆ ನಿರಾಸೆಯಾಯಿತು.

ಕಳೆದ ವರ್ಷಗಳಲ್ಲಿ ತಾಲ್ಲೂಕಿಗೆ ಕುಡಿಯುವ ನೀರು ಪೂರೈಸಲು ಮುಂಜೂರಾಗಿರುವ ಕೋಟ್ಯಂತರ ಅನುದಾನ ಈವರೆಗೂ ಫಲ ಕೊಡದಿರುವ ಕೊರಗು ಕ್ಷೇತ್ರದ ಜನರನ್ನು ಕಾಡುತ್ತಿದೆ.

ಈ ಕ್ಷೇತ್ರಕ್ಕೆ ಶಾಸಕರಾದವರು ತುಂಗಭದ್ರಾ ನದಿ ಆಶ್ರಯದಲ್ಲಿ ಗರ್ಭಗುಡಿ ಬ್ರಿಡ್ಜ್‌ ಕಂ ಬ್ಯಾರೇಜ್‌ ಯೋಜನೆಗೆ ಮರುಜೀವ ನೀಡುತ್ತಲೇ ಬಂದಿದ್ದಾರೆ. ಪ್ರತಿ ಸಲವೂ ಕ್ರಿಯಾಯೋಜನೆ, ಬಜೆಟ್‌ ಗಾತ್ರ ಹೆಚ್ಚಿಸಿದ್ದಾರೆ. ಆದರೆ ಕಾಮಗಾರಿ ಪೂರ್ಣಗೊಳ್ಳುತ್ತಿಲ್ಲ. ಈಗ ಶಾಸಕರಾಗಿರುವ ಎಂ.ಪಿ.ಲತಾ ಮಲ್ಲಿಕಾರ್ಜುನ್‌ ಅವರು ವಿಳಂಬವಾಗಿರುವ ಎಲ್ಲ ಯೋಜನೆ ಪೂರ್ಣಗೊಳಿಸಲು ಬೆನ್ನತ್ತಿದ್ದಾರೆ.

ಪಟ್ಟಣದ ಜನಸಂಖ್ಯೆ ಅನುಸಾರ 29 ಕಿ.ಮೀ. ದೂರದಲ್ಲಿರುವ ತುಂಗಭದ್ರಾ ನದಿಯಿಂದ 2ನೇ ಹಂತದ ಕುಡಿಯುವ ನೀರಿನ ಯೋಜನೆ ಜಾರಿಗೆ ಸತತ ಪ್ರಯತ್ನ ನಡೆಸುತ್ತಿದ್ದಾರೆ. ಅಂದುಕೊಂಡಂತೆ ಎಲ್ಲ ಯೋಜನೆಗಳು ಸಾಕಾರಗೊಂಡರೆ ಜಲಮೂಲಗಳು ಭರ್ತಿಯಾಗುತ್ತವೆ. ಕೊಳವೆಬಾವಿಗಳು ಪುನಶ್ಚೇತನಗೊಂಡು ಕುಡಿಯುವ ನೀರಿನ ಸಮಸ್ಯೆಗೆ ಶಾಶ್ವತ ಮುಕ್ತಿ ದೊರಕುತ್ತದೆ. ಇಲ್ಲವಾದರೆ ಪ್ರತಿವರ್ಷ ನೀರಿನ ಬವಣೆ ತಪ್ಪಿದ್ದಲ್ಲ.

41 ಖಾಸಗಿ ಕೊಳವೆಬಾವಿ ಬಾಡಿಗೆ

ಬೆಣ್ಣಿಹಳ್ಳಿ ನಿಲುವಂಜಿ ಕೆ.ಕಲ್ಲಹಳ್ಳಿ ಚಿಗಟೇರಿ ಚಿರಸ್ತಹಳ್ಳಿ ಹಾರಕನಾಳು ಕನ್ನನಾಯ್ಕನಹಳ್ಳಿ ಹುಲಿಕಟ್ಟೆ ಹಾರಕನಾಳ ಸಣ್ಣತಾಂಡಾ ಜೋಷಿಲಿಂಗಾಪುರ ಪಾವನಪುರ ಕಡಬಗೆರೆ ಹಿಕ್ಕಿಮಗೇರಿತೊಗರಿಕಟ್ಟೆ ಬಾಪೂಜಿನಗರ ಉದ್ಗಟ್ಟಿ ತಾಂಡ ಹಾಗೂ ಅರಸೀಕೆರೆ ಹೋಬಳಿ ವ್ಯಾಪ್ತಿಯ ಅಣಜಿಗೆರೆ ಹುಣಸಿಕಟ್ಟೆ ಶ್ರೀನಿವಾಸಪುರ ಗಡಿಗುಡಾಳ್ ಹನುಮನಹಳ್ಳಿ ಯು.ಕಲ್ಲಹಳ್ಳಿ ಹಿರೆಮೇಗಳಗೆರೆ ಬೂದಿಹಾಳ್ ಕಂಚಿಕೇರಿ ಪುಣಬಗಟ್ಟ ಚೆನ್ನಾಪುರ ಕಮ್ಮತ್ತಹಳ್ಳಿ ಕ್ಯಾರಕಟ್ಟೆ ಯರಬಳ್ಳಿ ಬೇವಿನಹಳ್ಳಿ ಉಚ್ಚಂಗಿದುರ್ಗ ಕೋಟೆ ಕ್ಯಾಂಪ್‌ನ ಜನತೆಗೆ ನೀರು ಪೂರೈಸಲು 41 ರೈತರ ಮನವೊಲಿಸಿ ಕೊಳವೆ ಬಾವಿ ಬಾಡಿಗೆ ಪಡೆಯಲಾಗಿದೆ ಎಂದು ಕುಡಿಯುವ ನೀರು ಸರಬರಾಜು ಮತ್ತು ನೈರ್ಮಲ್ಯ ಇಲಾಖೆ ಎಇಇ ಕಿರಣ್‌ ನಾಯ್ಕ ಮಾಹಿತಿ ನೀಡಿದರು.