ವಿಜಯಪುರ: ಸಾವಳಸಂಗ ಸಾಲು ಬೆಟ್ಟಗಳಲ್ಲಿ ಚಾರಣ

ಪುಟ್ಟ–ಪುಟ್ಟ ಬೆಟ್ಟಗುಡ್ಡಗಳಿಂದ ಕೂಡಿದ ಇಂಡಿ ತಾಲ್ಲೂಕಿನ ಸಾವಳಸಂಗ ಇತ್ತೀಚಿನ ದಿನಗಳಲ್ಲಿ ಸಾಹಸಿ ಯುವಜನರನ್ನು ಕೈಬೀಸಿ ಕರೆಯುತ್ತಿದೆ. ಜೊತೆಗೆ ಪ್ರವಾಸಿಗರನ್ನೂ ಆಕರ್ಷಿಸುತ್ತಿದೆ. ಈ ಮಳೆಗಾಲದಲ್ಲಿ ಸಾವಳಸಂಗಕ್ಕೆ ಭೇಟಿ ನೀಡಲು ಹೇಳಿ ಮಾಡಿಸಿದ ಸಮಯ.

‘ಕೆಲವೊಮ್ಮೆ ಒಂದೇ ದಿನದ ಚಾರಣ ಮಾಡೊಣ ಅಥವಾ ಇವತ್ತು ಹೊರಟು ನಾಳೆ ಬಂದು ಬಿಡೋಣ. ಆದರೆ, ಆಫ್ ಬೀಟ್ ಇರಬೇಕು. ಅದರಲ್ಲಿ ಪರ್ವತ ಕಣಿವೆ ಇರಬೇಕು, ಫೋಟೊ ಸೆಲ್ಫಿಗೆ ಎಲ್ಲಿ ನಿಂತರೂ ಸೈ ಎನ್ನಬೇಕು. ದಾರಿ ಹೋದಷ್ಟೂ ಚೆಂದ ಇರಬೇಕು, ದಾರಿ ಹೋಗಿ ತಲುಪಲು ಒಂದಷ್ಟು ಅನುಕೂಲಕರ ಎನ್ನುವ ವಾಹನ ಸೌಕರ್ಯಕ್ಕೆ ದಕ್ಕುವಂತಿರಬೇಕು. ಇದೆಲ್ಲ ಇದ್ದೂ ಜೇಬಿಗೂ ಭಾರವಾಗದಂತಿರಬೇಕು. ಎಂದೆಲ್ಲ ಲೆಕ್ಕ ಹಾಕುವವರಿಗೆ ಸಾವಳಸಂಗ ಬೆಟ್ಟಗಳ ಸಾಲು ಚಿಕ್ಕ, ಚೊಕ್ಕ ವಿಹಾರ ಮತ್ತು ಚಾರಣ ಎರಡಕ್ಕೂ ಹೇಳಿ ಮಾಡಿಸಿದ ತಾಣವಾಗಿದೆ' ಎನ್ನುತ್ತಾರೆ ಚಾರಣಿಗ ವಿಜಯಪುರದ ವಿನೋದ ಕುಮಾರ ಮಣೂರ.

‘ಸಾವಳಸಂಗ ಬೆಟ್ಟಗಳ ಸಾಲಿನಲ್ಲಿ ಚಾರಣ ಮಾಡಿದರೆ ಮೈ–ಮನ ಎರಡೂ ತಣಿಸಿಕೊಳ್ಳಬಹುದು. ಅಲ್ಲಿನ ಚಾರಣ ದುಡ್ಡು ಉಳಿಸುತ್ತದೆ ಜೊತೆಗೆ ವಾರಗಟ್ಟಲೇ ಸುತ್ತುವ ಅಗತ್ಯವೂ ಇರುವುದಿಲ್ಲ. ದಿನಕ್ಕೆ ಹತ್ತಾರು ಕಿ.ಮೀ.ನಡೆಯುವ ಉತ್ಸಾಹ, ಅಭ್ಯಾಸ ಇದ್ದರೆ ಸಾಕು. ದಿಬ್ಬವೇರುವ, ಇಳಿಯುವ ಆಫ್ ಬೀಟ್ ಟ್ರಾವೆಲ್ ಮಾಡಲು ಬಹಳ ಖುಷಿಯಾಗುತ್ತದೆ’ ಎನ್ನುತ್ತಾರೆ ಮಣೂರ.

‘ನಾವು ಗೆಳೆಯರೆಲ್ಲರು ಸೇರಿ ಕಳೆದ ಶನಿವಾರ ಸಂಜೆ ಹೊರಟು ರಾತ್ರಿ ಸಾವಳಸಂಗ ಬೆಟ್ಟದಲ್ಲೇ ಕ್ಯಾಂಪಿಂಗ್ ಮಾಡಿ ಭಾನುವಾರ ಬೆಳಿಗ್ಗೆ ಅರಣ್ಯ ಇಲಾಖೆ ಅಧಿಕಾರಿ ಧನರಾಜ ಮುಜಗೊಂಡ ಅವರ ಮಾರ್ಗದರ್ಶನದಲ್ಲಿ ಚಾರಣ ಮುಗಿಸಿ ಮಧ್ಯಾಹ್ನದ ಒಳಗಾಗಿ ವಿಜಯಪುರಕ್ಕೆ ಮರಳಿದೆವು. ಮನಸ್ಸಿಗೆ ಬಹಳ ಖುಷಿ ನೀಡಿತು’ ಎನ್ನುತ್ತಾರೆ ವಿನೋದ್‌.

ವಾರಪೂರ್ತಿ ಜನ:

‘ವಿಜಯಪುರ, ಇಂಡಿ, ಸಿಂದಗಿ, ಅಫಜಪುರ, ಚಡಚಣ, ಮಹಾರಾಷ್ಟ್ರದಿಂದಲೂ ವಾರದಲ್ಲಿ ಸುಮಾರು 400 ಜನರು ತಂಡೋಪ ತಂಡವಾಗಿ ಬರುತ್ತಾರೆ. ವಿಶೇಷವಾಗಿ ಛಾಯಾಗ್ರಾಹಕರು, ಚಾರಣಿಗರು, ಮಠಕ್ಕೆ ತೆರಳುವ ಭಕ್ತರು, ಪ್ರವಾಸಿಗರು ಪಕ್ಷಿಪ್ರಿಯರು ಬರುತ್ತಾರೆ’ ಎನ್ನುತ್ತಾರೆ ಅರಣ್ಯ ಇಲಾಖೆ ಹೊರ್ತಿ ವಿಭಾಗದ ಗಸ್ತು ವನ ಪಾಲಕ (ಬೀಟ್ ಫಾರೆಸ್ಟರ್) ಧನರಾಜ ಮುಜಗೊಂಡ.

‘ಸಾವಳಸಂಗಕ್ಕೆ ಚಾರಣಕ್ಕೆ ಬರುವವರಿಗೆ ಅರಣ್ಯ ಇಲಾಖೆಯಿಂದ ವಿಶೇಷ ಅನುಮತಿ ಎಂಬುದು ಇಲ್ಲ.  ತಿರುಗಾಡಬಹುದು, ರಾತ್ರಿ ಉಳಿಯಬಹುದು. ಆದರೆ, ಇಲ್ಲಿಗೆ ಬರುವವರು ಯಾವುದೇ ಕಾರಣಕ್ಕೂ ಪ್ಲಾಸ್ಟಿಕ್‌, ಕಾಗದ ಮತ್ತಿತರರ ತ್ಯಾಜ್ಯವನ್ನು ಬಿಸಾಡುವಂತಿಲ್ಲ’ ಎನ್ನುತ್ತಾರೆ ಅವರು.