ಯಾದಗಿರಿ | ಏರುತ್ತಿರುವ ತಾಪಮಾನ: ಕಲ್ಲಂಗಡಿಗೆ ಬೇಡಿಕೆ

ಬಿಸಿಲು ನಗರ ಎಂಬ ಖ್ಯಾತಿ ಪಡೆದ ಕಲ್ಯಾಣ ಕರ್ನಾಟಕ ಭಾಗದ ಜಿಲ್ಲೆಗಳಾದ ಕಲಬುರಗಿ, ಬೀದರ್, ಯಾದಗಿರಿ, ರಾಯಚೂರು, ಬಳ್ಳಾರಿ, ವಿಜಯನಗರ ಜಿಲ್ಲೆಗಳಲ್ಲಿ ಬೇಸಿಗೆ ವೇಳೆ ತಾಪಮಾನ ಹೆಚ್ಚಾಗಿರುತ್ತದೆ. ಜನರು ತಾಪಮಾನ ತಗ್ಗಿಸಲು ಕಲ್ಲಂಗಡಿ, ತಂಪು ಪಾನೀಯ, ಎಳನೀರು, ಕಬ್ಬಿನ ಹಾಲು ಇತ್ಯಾದಿಗಳಿಗೆ ಜನ ಮಾರುಹೋಗುತ್ತಿದ್ದಾರೆ.

ಗರಿಷ್ಠ 36 ಡಿಗ್ರಿ ಸೆಲ್ಸಿಯಸ್‌, ಕನಿಷ್ಠ ಡಿಗ್ರಿ 22 ಸೆಲ್ಸಿಯಸ್‌ ತಾಪಮಾನ ಜಿಲ್ಲೆಯಲ್ಲಿ ದಾಖಲಾಗುತ್ತಿದೆ. ಇನ್ನೂ ಮೂರು ತಿಂಗಳ ಕಾಲ ಭರ್ಜರಿ ಬಿಸಿಲು ಇರಲಿದೆ. ಆರಂಭದಲ್ಲೇ ತಾಪಮಾನ ಹೆಚ್ಚಿದೆ. ಈ ಬಾರಿ ಬರಗಾಲ ಇರುವುದರಿಂದ ಮತ್ತಷ್ಟು ಬಿಸಿಲಿನ ಬೇಗೆ ಹೆಚ್ಚಾಗುವ ಸಾಧ್ಯತೆ ಇದೆ.

ನಗರ ಹೊರವಲಯದಲ್ಲಿ ಕಳೆದ ಒಂದು ವಾರದಿಂದ ಯಾದಗಿರಿ-ಶಹಾಪುರ ರಾಜ್ಯ ಹೆದ್ದಾರಿಯ ಗುರುಸಣಿಗಿ ಕ್ರಾಸ್ ಬಳಿ ಕಲ್ಲಂಗಡಿ ಹಣ್ಣುಗಳ ಮಾರಾಟದ ವ್ಯಾಪಾರ ಭರ್ಜರಿಯಿಂದ ನಡೆದಿದೆ. ಹೆದ್ದಾರಿ ಮೇಲೆ ಸಂಚರಿಸುವ ವಾಹನ ಸವಾರರು, ಕಾರು ಪ್ರಯಾಣಿಕರು, ಪ್ರವಾಸಿಗರು ಕಲ್ಲಂಗಡಿ ಹಣ್ಣುಗಳನ್ನು ಖರೀದಿಸುವ ದೃಶ್ಯ ಸಾಮಾನ್ಯವಾಗಿ ಕಂಡುಬರುತ್ತಿದೆ.

ದರ ನಿಗದಿ:

ಹೆದ್ದಾರಿಯಲ್ಲಿ ಸಂಚರಿಸುವ ಸವಾರರು ತಾಪಮಾನದ ದಾಹ ತೀರಿಸಿಕೊಂಡು, ಮುಂದೆ ಪ್ರಯಾಣ ಬೆಳೆಸುತ್ತಿದ್ದಾರೆ. ಜಿಲ್ಲೆಯ ಹತ್ತಿಕುಣಿ, ಗುಂಜನೂರ, ಖಾನಾಪುರ ಇತ್ಯಾದಿ ಊರುಗಳ ರೈತರ ಜಮೀನುಗಳಿಗೆ ತೆರಳಿ ಕಲ್ಲಂಗಡಿ ಹಣ್ಣುಗಳು ವ್ಯಾಪಾರಸ್ಥರು ಖರೀದಿಸುತ್ತಾರೆ. ಬೇಸಿಗೆಯಲ್ಲಿ ವ್ಯಾಪಾರಸ್ಥರು ವಹಿವಾಟು ನಡೆಸುತ್ತಾರೆ. ಹಣ್ಣಿನ ಗಾತ್ರದ ಮೇಲೆ ದರ ನಿಗದಿಯಾಗಿದೆ. ಸಣ್ಣ ಗಾತ್ರದ ಹಣ್ಣಿಗೆ ₹20, ₹50ಗೆ ಎರಡು, ದೊಡ್ಡ ಗಾತ್ರದ 1 ಹಣ್ಣಿಗೆ ₹50 ರಿಂದ ₹70 ರೂ ತನಕ ದರ ನಿಗದಿ ಮಾಡಲಾಗಿದೆ.

‘ಜಿಲ್ಲೆಯ ಹತ್ತಿಕುಣಿ, ಗುಂಜನೂರು, ಖಾನಾಪುರ ಹಲವಾರು ಗ್ರಾಮಗಳಲ್ಲಿ ರೈತರ ಜಮೀನುಗಳಲ್ಲಿ ನೇರವಾಗಿ ಹೋಗಿ ಕಲ್ಲಂಗಡಿ ಹಣ್ಣುಗಳನ್ನು ಖರೀದಿ ಮಾಡುತ್ತೇವೆ. ಗ್ರಾಹಕರ ಕೈಗೆಟುಕುವ ದರದಲ್ಲಿ ಹಣ್ಣಿನ ಗಾತ್ರದಂತೆ ದರ ನಿಗದಿಗೊಳಿಸಿದ್ದೇವೆ. ಇದರಿಂದ ಹೆಚ್ಚಿನ ಗ್ರಾಹಕರನ್ನು ಸೆಳೆಯಲು ಸಾಧ್ಯವಾಗಿದೆ ಎನ್ನುತ್ತಾರೆ ಹಣ್ಣಿನ ವ್ಯಾಪಾರಿಗಳು.

‘ಕೆರೆಯಲ್ಲಿ ನೀರು ಬೇಗ ಖಾಲಿಯಾಗಿದ್ದರಿಂದ ಬೇಗನೇ ಸೀಸನ್‌ ಆರಂಭವಾಗಿದ್ದು, ಉತ್ತಮ ಇಳುವರಿ ಬಂದಿದೆ. ಹೀಗಾಗಿ ವ್ಯಾಪಾರಕ್ಕೆ ಇಳಿದಿದ್ದೇವೆ. ಹಣ್ಣುಗಳ ಮಾರಾಟದ ಮೂಲಕ ಆದಾಯ ಪಡೆಯಲು ಮುಂದಾಗಿದ್ದೇವೆ’ ಎನ್ನುತ್ತಾರೆ ರವಿ ಹತ್ತಿಕುಣಿ.