ಢಾಕಾ: ಪಾಕಿಸ್ತಾನದಲ್ಲಿ ಟಿ–20 ಪಂದ್ಯಗಳನ್ನು ಮಾತ್ರ ಆಡಲು ಸಿದ್ಧ. ಆದರೆ ಉದ್ದೇಶಿತ ಟೆಸ್ಟ್ ಸರಣಿಯನ್ನು ತಟಸ್ಥ ಸ್ಥಳದಲ್ಲಿ ನಡೆಸಬೇಕೆಂದು ಬಾಂಗ್ಲಾದೇಶ ಕ್ರಿಕೆಟ್ ಮಂಡಳಿ (ಬಿಸಿಬಿ) ಹೇಳಿದೆ. ಆ ಮೂಲಕ ತನ್ನ ನಿಲುವಿಗೇ ಅಂಟಿಕೊಂಡಿದೆ.
ಬಿಸಿಬಿ ಚೀಫ್ ಎಕ್ಸಿಕ್ಯುಟಿವ್ ನಿಜಾಮುದ್ದೀನ್ ಚೌಧುರಿ ಅವರು ಮಂಗಳವಾರ ಈ ಸಂದೇಶ ರವಾನಿಸಿದ್ದಾರೆ.
‘ತವರಿನ ಎಲ್ಲ ಸರಣಿಗಳನ್ನು ಸ್ವದೇಶದಲ್ಲೇ ಆಡುವುದು. ಇದರಲ್ಲಿ ಅನುಮಾನವೇ ಬೇಡ’ ಎಂದು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ಅಧ್ಯಕ್ಷ ಎಹ್ಸಾನ್ ಮಣಿ ಹೇಳಿದ ಮರುದಿನವೇ ಚೌಧರಿ ಈ ಪ್ರತಿಕ್ರಿಯೆ ನೀಡಿದ್ದಾರೆ.
‘ನಮ್ಮ ನಿಲುವು ಅಚಲವಾದುದು. ನಾವು ಪಾಕಿಸ್ತಾನದಲ್ಲಿ ಬರೇ ಟಿ–20 ಪಂದ್ಯಗಳನ್ನಷ್ಟೇ ಆಡುತ್ತೇವೆ. ಈ ಸರಣಿಗೆ ಸಂಬಂಧಿಸಿದ ಆಯೋಜಕರು ಪಾಕಿಸ್ತಾನದಲ್ಲಿ ದೀರ್ಘ ಮಾದರಿಯ ಕ್ರಿಕೆಟ್ ಆಡುವುದನ್ನು ಬಯಸಿಲ್ಲ’ ಎಂದು ನಿಜಾಮುದ್ದೀನ್ ಅವರನ್ನು ಉಲ್ಲೇಖಿಸಿ ‘ಡೇಲಿ ಸ್ಟಾರ್’ ಪತ್ರಿಕೆ ವರದಿ ಮಾಡಿದೆ.