‘ಸಲಿಂಗಿಗಳ ಹೆಮ್ಮೆಯ ನಡಿಗೆ’ : ನಾಲ್ಕು ಲಕ್ಷಕ್ಕೂ ಅಧಿಕ ಜನರು ಭಾಗಿ

ತೃತೀಯ ಲಿಂಗಿಗಳು, ಸಲಿಂಗಕಾಮಿಗಳ (ಎಲ್‌ಜಿಬಿಟಿ) ಹಕ್ಕುಗಳಿಗಾಗಿ ಹೋರಾಡಿದವರಿಗೆ ಈ ನಡಿಗೆಯನ್ನು ಸಮರ್ಪಿಸಲಾಗಿತ್ತು. ಅದರಲ್ಲೂ, ಯುರೋಪ್‌ನಲ್ಲಿ ಬಲಪಂಥೀಯ ವಿಚಾರಧಾರೆ ಮತ್ತೆ ಮುನ್ನೆಲೆಗೆ ಬರುತ್ತಿದ್ದು, ಸಲಿಂಗ ಕಾಮಕ್ಕೆ ವಿರೋಧ ವ್ಯಕ್ತವಾಗುತ್ತಿರುವ ಸಂದರ್ಭದಲ್ಲಿ ಈ ಕಾರ್ಯಕ್ರಮ ನಡೆಯುತ್ತಿರುವುದು ಗಮನಾರ್ಹ.

’ಇತಿಹಾಸ, ಹೋರಾಟ ಹಾಗೂ ಸ್ಮರಣೆ‘ ಎಂಬುದು ಈ ವರ್ಷದ ಧ್ಯೇಯವಾಕ್ಯವಾಗಿದ್ದು, ಸಲಿಂಗ ಕಾಮಿಗಳ ಹಕ್ಕುಗಳಿಗಾಗಿ 1969ರಲ್ಲಿ ನ್ಯೂಯಾರ್ಕ್‌ನಲ್ಲಿ ನಡೆದ ಸಂಘರ್ಷವನ್ನು ಈ ಸಂದರ್ಭದಲ್ಲಿ ಸ್ಮರಿಸಲಾಯಿತು.

ಸ್ವತಃ ಸಲಿಂಗ ಕಾಮಿಯೂ ಆಗಿರುವ ಸ್ಪೇನ್‌ನ ಆಂತರಿಕ ವ್ಯವಹಾರಗಳ ಸಚಿವ ಫರ್ನ್ಯಾಂಡೊ ಗ್ರ್ಯಾಂಡೆ ಮರ್ಲಾಸ್ಕ, ‘ನಾವು ಎಲ್‌ಜಿಬಿಟಿ ಸಮುದಾಯದವರ ಹಕ್ಕುಗಳಿಗಾಗಿ ಹೋರಾಟ ನಡೆಸುತ್ತಿದ್ದೇವೆ ಎಂದರೆ ಅದು ಮಾನವ ಹಕ್ಕುಗಳಿಗಾಗಿನ ಹೋರಾಟವೇ ಆಗಿದೆ. ನಮ್ಮನ್ನು ವಿರೋಧಿಸುವವರು ಈ ಅಂಶವನ್ನು ಅರ್ಥ ಮಾಡಿಕೊಳ್ಳುತ್ತಿಲ್ಲ‘ ಎಂದು ದೂರಿದರು.