ಪುಸ್ತಕ ವಿಮರ್ಶೆ: ಲೆಬನಾನಿನವನ ನೆನಪುಗಳು

ಬರಹವನ್ನೇ ಬದುಕುಕಬೇಕು, ಆಡಿದ ಮಾತಿನಲ್ಲಿ ಮೂಡಿದ ಆದರ್ಶ, ಕ್ರಿಯೆಯಲ್ಲಿಯೇ ಸಾರ್ಥಕವಾಗುವುದು ಎಂದು ನಂಬಿ ಬದುಕಿದ್ದ ಖಲೀಲ್‌ ಗಿಬ್ರಾನ್‌ ಕುರಿತು ಹಲವು ಪುಸ್ತಕಗಳು ಬಂದಿವೆ. ಅವುಗಳಲ್ಲಿ ‘ದಿಸ್‌ ಮ್ಯಾನ್ ಫ್ರಮ್‌ ಲೆಬನಾನ್’ ವಿಶೇಷವಾದದ್ದು. ಈ ಪುಸ್ತಕಕ್ಕಿರುವ ವೈಶಿಷ್ಟ್ಯ ಅದರ ಲೇಖಕಿಯ ಜೊತೆಗೇ ಅಂಟಿಕೊಂಡಿದೆ. ಬಾರ್ಬರಾ ಯಂಗ್ ಎನ್ನುವ ಕಾವ್ಯನಾಮದಿಂದ ಪರಿಚಿತರಾಗಿರುವ ಹೆನ್ರಿಯೆಟಾ ಬ್ರೆಕನ್‌ ರಿಜ್‌ ಬಾಟನ್‌ ಸ್ವತಃ ಕವಯತ್ರಿ ಮತ್ತು ಕಲಾ ವಿಮರ್ಶಕಿ. ಚರ್ಚೊಂದರಲ್ಲಿ ಗಿಬ್ರಾನನ ‘ದ ಪ್ರಾಫೆಟ್‌’ ಪುಸ್ತಕದ ಪಠಣ ಕೇಳಿದ ಅವರು, ಅದರಿಂದ ಆಕರ್ಷಿತರಾಗಿ ಈ ಬರಹಗಾರನನ್ನು ಭೇಟಿಯಾಗಲೇಬೇಕು ಎಂದು ಗಿಬ್ರಾನನನ್ನು ಸಂಪರ್ಕಿಸುತ್ತಾರೆ. ಹಾಗೆ ಶುರುವಾದ ಅವರ ಸ್ನೇಹ, ಮುಂದಿನ ಏಳು ವರ್ಷಗಳವರೆಗೆ, ಗಿಬ್ರಾನ್‌ ತೀರಿಹೋಗುವವರೆಗೂ ಮುಂದುವರಿಯುತ್ತದೆ. ಗೆಳತಿಯಾಗಿಯಷ್ಟೇ ಅಲ್ಲ, ಗಿಬ್ರಾನನ ಸೃಜನಶೀಲ ಸೃಷ್ಟಿಕ್ರಿಯೆಯಲ್ಲಿಯೂ ಬಾರ್ಬರಾ ಅವರ ಪಾಲಿದೆ. ಅವರು ಗಿಬ್ರಾನನಿಗೆ ಲಿಪಿಕಾರ್ತಿಯಾಗಿದ್ದರು. ಅವನು ಆಡಿದ ಅಕ್ಷರಗಳ ಬರಹಗಾರ್ತಿಯಷ್ಟೇ ಅಲ್ಲ; ಅವನ ಮನಸ್ಸಿನಾಳದ ಕುದಿಜ್ವಾಲೆಯನ್ನು ಅನುವಾದಕಿಯೂ ಆಗಿದ್ದರು.

ಗಿಬ್ರಾನನ ಜೊತೆಗಿನ ಏಳು ವರ್ಷಗಳ ತನ್ನ ಒಡನಾಟದಲ್ಲಿ ತಾನು ಕಂಡುಕೊಂಡ ವ್ಯಕ್ತಿತ್ವದ ಚಿತ್ರಣವನ್ನು ಆಧರಿಸಿ ಅವರು‘ದಿಸ್‌ ಮ್ಯಾನ್ ಫ್ರಮ್‌ ಲೆಬನಾನ್’ ಬರೆದಿದ್ದಾರೆ. ಇದು ಗಿಬ್ರಾನನ ಜೀವನಚರಿತ್ರೆ ಅಲ್ಲ ಅಥವಾ ಅವನ ಸಾಧನಾ ಚಿತ್ರಣವಷ್ಟೆ ಕೂಡ ಅಲ್ಲ. ಬದಲಿಗೆ ತನ್ನ ಕಣ್ಣಿಗೆ ಕಂಡ ಹಾಗೆ ಅವನ ಕೃತಿ ಮತ್ತು ವ್ಯಕ್ತಿತ್ವ ಎರಡನ್ನೂ ಬೆರೆಸಿ, ತನ್ನ ಒಳನೋಟಗಳನ್ನು ಸೇರಿಸಿ ಹೆಣೆದ ವಿಶಿಷ್ಟ ಪುಸ್ತಕ. ಹಾಗಾಗಿ ಇಲ್ಲಿ ಗಿಬ್ರಾನನ ಕೃತಿಗಳ ಉಲ್ಲೇಖಗಳಿವೆ, ಹಾಗೆಯೇ ಅವನ ವ್ಯಕ್ತಿತ್ವವನ್ನು ಸೂಚಿಸುವ ಹಲವು ಅಪರೂಪದ ಘಟನೆಗಳೂ ಇವೆ. ಅವನ ಚಿತ್ರಗಳ ಕುರಿತು ಉಲ್ಲೇಖವಿದೆ. ಅವನ ಕೃತಿರಚನೆಯ ಹಂತಗಳ ವಿವರಣೆ ಇದೆ. ಈ ಎಲ್ಲವೂ ಸೇರಿ ಒಂದು ವಿಶಿಷ್ಟ ಕೃತಿಯಾಗಿ ಹೊಮ್ಮಿದೆ.

ಈ ಕೃತಿಯನ್ನು ಎನ್‌. ಸಂಧ್ಯಾರಾಣಿ ಅವರು ಕನ್ನಡಕ್ಕೆ ಅನುವಾದಿಸಿದ್ದಾರೆ. ಖಲೀಲ್‌ ಕನ್ನಡದ ಮನಸ್ಸುಗಳಲ್ಲಿಯೂ ಸುಲಲಿತವಾಗಿ ಇಳಿಯುವಂತೆ ಮಾಡಿದ ಅನುವಾದದ ಶ್ರಮ ಎದ್ದು ಕಾಣಿಸುತ್ತದೆ. ಗಿಬ್ರಾನ್‌ನ ಮೇಲಿನ ಪ್ರೀತಿ ಮತ್ತು ಆ ಪ್ರೀತಿಯನ್ನು ಇತರರೊಂದಿಗೆ ಹಂಚಿಕೊಳ್ಳುವ ಹಂಬಲ ಈ ಅನುವಾದದ ಹಿಂದೆ ಕೆಲಸ ಮಾಡಿದೆ.

ಕೃತಿ: ಇವ... ಲೆಬನಾನಿನವ

ಮೂಲ: ಬಾರ್ಬರಾ ಯಂಗ್

ಅನುವಾದ: ಎನ್‌. ಸಂಧ್ಯಾರಾಣಿ

ಪು: 196 ಬೆ: ₹ 200

ಪ್ರಕಾಶನ: ನುಡಿ ಪುಸ್ತಕ ದೂ: 8073321430