ಮಂಗಳೂರು: ಯಶೋವರ್ಮರಿಗೆ ಭಾವಾಭಿವ್ಯಕ್ತಿಯ ನಮನ

ಉಜಿರೆಯ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ವಿದ್ಯಾಸಂಸ್ಥೆಗಳ ಕಾರ್ಯದರ್ಶಿಯಾಗಿದ್ದ ದಿವಂಗತ ಯಶೋವರ್ಮ ಅವರ ಸ್ಮರಣಾರ್ಥ ಇಲ್ಲಿನ ವಿಶ್ವವಿದ್ಯಾಲಯ ಕಾಲೇಜಿನ ರವೀಂದ್ರ ಕಲಾಭವನದಲ್ಲಿ ಮಂಗಳವಾರ ‘ಯಶೋಭಿವ್ಯಕ್ತಿ’ ಇಡೀ ದಿನ ಕಾರ್ಯಕ್ರಮ ನಡೆಯಿತು.

ಕಾರ್ಯಕ್ರಮಕ್ಕೆ ಚಾಲನೆ ನೀಡಿದ ಮೂಡುಬಿದಿರೆ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನದ ಅಧ್ಯಕ್ಷ ಡಾ. ಎಂ. ಮೋಹನ್ ಆಳ್ವ ಮಾತನಾಡಿ, ‘ಸಮಚಿತ್ತದ ಸಮದರ್ಶಿಯಾಗಿದ್ದ ಯಶೋವರ್ಮರು ಮೌಲ್ಯಾಧಾರಿತ ಬದುಕು ನಡೆಸಿದವರು. ಯೋಚನೆ ಮತ್ತು ಯೋಜನೆಗಳನ್ನು ಶಿಸ್ತುಬದ್ಧವಾಗಿ ಅನುಷ್ಠಾನಗೊಳಿಸುವ ಬದ್ಧತೆ ಅವರಲ್ಲಿತ್ತು. ಸ್ವಚ್ಛತೆಯೇ ದೇವರು ಎಂದು ನಂಬಿದ್ದ ಅವರು, ಎಸ್‌ಡಿಎಂ ವಿದ್ಯಾಸಂಸ್ಥೆಗಳ ಆವರಣದಲ್ಲಿ ಸ್ವಚ್ಛತೆಗೆ ಪ್ರಾಧಾನ್ಯತೆ ನೀಡಿದ್ದರು. ಸಾಹಿತ್ಯದ ಓದು ಅವರ ಬದುಕಿನ ಭಾಗವಾಗಿತ್ತು’ ಎಂದರು.

ಸಂಸ್ಮರಣ ನುಡಿಗಳನ್ನಾಡಿದ ಬೆಂಗಳೂರು ಉತ್ತರ ವಿಶ್ವವಿದ್ಯಾಲಯದ ಕುಲಪತಿ ನಿರಂಜನ ವಾನಳ್ಳಿ ಅವರು, ‘ಚುಂಬಕ ವ್ಯಕ್ತಿತ್ವದ ಯಶೋವರ್ಮರು ಪ್ರತಿಹಂತದಲ್ಲೂ ಹೊಸ ಸೃಷ್ಟಿಯನ್ನು ಕಟ್ಟುತ್ತ ಸಾಗಿದವರು. ಸೂಕ್ಷ್ಮಮತಿಯಾಗಿದ್ದ ಅವರಲ್ಲಿ ಒಳ್ಳೆಯತನ, ಹಾಸ್ಯಪ್ರಜ್ಞೆ, ಕಣ್ತುಂಬ ಕನಸು ಇತ್ತು. ಶೈಕ್ಷಣಿಕ, ಸಾಂಸ್ಕೃತಿಕವಾಗಿ ಬಹುದೊಡ್ಡ ಸಾಧನೆ ಮಾಡಿದವರು’ ಎಂದು ಅಭಿಮಾನದಿಂದ ಹೇಳಿದರು.

ಕನ್ನಡ ಸಾಹಿತ್ಯ ಪರಿಷತ್ತು ಜಿಲ್ಲಾ ಘಟಕದ ಅಧ್ಯಕ್ಷ ಎಂ.ಪಿ.ಶ್ರೀನಾಥ್ ಅಧ್ಯಕ್ಷತೆ ವಹಿಸಿದ್ದರು. ವಿವಿ ಕಾಲೇಜಿನ ಪ್ರಾಚಾರ್ಯೆ ಅನಸೂಯಾ ರೈ, ಯಶೋವರ್ಮರ ಪತ್ನಿ ಸೋನಿಯಾ ವರ್ಮ ಇದ್ದರು. ಕನ್ನಡ ಉಪನ್ಯಾಸಕ ಮಾಧವ ಎಂ.ಕೆ ಸ್ವಾಗತಿಸಿದರು. ಮಂಜುಳಾ ಶೆಟ್ಟಿ ನಿರೂಪಿಸಿದರು. ವಿಕಾಸದಾಸ್ ವಂದಿಸಿದರು. ‌

ಕನ್ನಡ ಸಾಹಿತ್ಯ ಪರಿಷತ್ತು, ವಿವಿ ಕಾಲೇಜಿನ ಕನ್ನಡ ಸಂಘದ ಆಶ್ರಯದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ವಿಲಾಸ್ ನಾಯಕ್ ಅವರ ಚಿತ್ರಕಲೆ ಪ್ರದರ್ಶನಗೊಂಡಿತು.

ಚಿತ್ರದಲ್ಲಿ ಮೂಡಿದ ಯಶೋವರ್ಮರು

ಕವಿಗೋಷ್ಠಿ ಚಿತ್ರಕಲೆಯಲ್ಲೂ ಯಶೋವರ್ಮರು ಮೂಡಿಬಂದರು. ಎಸ್‌ಡಿಎಂ ಕಾಲೇಜಿನ ವಿದ್ಯಾರ್ಥಿಗಳಿಂದ ಅವರ ಸಾಧನೆ ಸಾಹಿತ್ಯಾಭಿರುಚಿ ಕುರಿತ ರಂಗ ಪ್ರಸ್ತುತಿ ಪ್ರದರ್ಶನಗೊಂಡಿತು. ಎಲ್ಲೆಲ್ಲೂ ಯಶೋವರ್ಮರ ನೆನಪಿನ ಕಂಪು ಹರಡಿತು.