ಸೇಡಂ: ಕಲಿಯೋಕೆ ನಮಗೆ ಬಸ್‌ನದ್ದೇ ಸಮಸ್ಯೆ! ಶಾಲಾ ವಿದ್ಯಾರ್ಥಿಗಳ ಅಳಲು

ಸೇಡಂ-ಕಲಬುರಗಿ ಮಾರ್ಗ ಮಧ್ಯದ ಹೂಡಾ(ಬಿ) ಗ್ರಾಮದ ರಸ್ತೆಗೆ ಬಸ್ ತಡೆದು ಸೋಮವಾರ ವಿದ್ಯಾರ್ಥಿಗಳು ಪ್ರತಿಭಟನೆ ನಡೆಸುತ್ತಿದ್ದರು. ಈ ಸಂದರ್ಭದಲ್ಲಿ ಪ್ರಜಾವಾಣಿ ವರದಿಗಾರ ಭೇಟಿ ನೀಡಿದಾಗ, ‘ನಮ್ಮೂರಿಂದ ದಿನಾಲು ಸುಮಾರು 30 ರಿಂದ 40ಕ್ಕೂ ಅಧಿಕ ವಿದ್ಯಾರ್ಥಿಗಳು ಶಾಲಾ-ಕಾಲೇಜಿಗೆ ಸೇಡಂ ಸೇರಿದಂತೆ ಮಳಖೇಡ ತೆರಳುತ್ತೇವೆ. ಆದರೆ ನಮ್ಮೂರಿಗೆ ಸಮಯಕ್ಕೆ ಸರಿಯಾಗಿ ಬಸ್ ಬರ್ತಿಲ್ಲ. ಕಲಿಯೋಕೆ ದೊಡ್ ಸಮಸ್ಯೆ ಆಗ್ತಿದೆ’ ಎಂದು ವಿದ್ಯಾರ್ಥಿ ರೇಖಾ ಬೇಸರ ವ್ಯಕ್ತಪಡಿಸಿದರು.

‘ನಾವು ಅನೇಕ ಬಾರಿ ಬಸ್ ಘಟಕ ವ್ಯವಸ್ಥಾಪಕರಿಗೆ ಮನವಿ ಪತ್ರ ಕೊಟ್ಟು ಸಾಕಾಗಿದೆ. ಬಸ್ ತಡೆದು ಮೂರ್ನಾಲ್ಕು ಬಾರಿ ರಸ್ತೆಗಿಳಿದು ಪ್ರತಿಭಟನೆ ಮಾಡಿದಿವಿ. ಆದ್ರೂ ಸಹ ಸರಿಯಾಗಿ ಬರ್ತಿಲ್ಲ’ ಸರ್ ಎಂದಳು ಐಶ್ವರ್ಯ.

‘ಬೆಳಿಗ್ಗೆ 9 ಗಂಟೆಗೆ ಬರಬೇಕಾದ ಬಸ್ಸು ನಿತ್ಯವು 11 ಗಂಟೆಗೆ ಬರುತ್ತಿದೆ. ಸಂಜೆ 5ಗಂಟೆಯಿಂದ ಸೇಡಂನಿಂದ ಬರಬೇಕಾದ ಬಸ್ 7 ಗಂಟೆಗೆ ಬರುತ್ತಿದೆ. ನಮಗೆ ಯಾವುದೇ ರೀತಿಯಲ್ಲಿ ಅನುಕೂಲವಾಗುತ್ತಿಲ್ಲ. ಪ್ರತಿಭಟನೆ ನಡೆಸಿದಾಗ ಮಾತ್ರ ಎರಡ್ಮೂರು ದಿನ ಸಮಯಕ್ಕೆ ಬಸ್ ಬರುತ್ತದೆ. ನಂತ್ರ ಮತ್ತೆ ಅದೇ ಗೋಳು. ಶಾಲೆಗೆ ಲೇಟಾಗಿ ಹೋದ್ರೆ ಶಿಕ್ಷಕರು ಬೈತಾರೆ, ತರಗತಿ ಪಾಠ ಕೇಳೋಕೆ ಆಗ್ತಿಲ್ಲ’ ಎಂದು ವಿದ್ಯಾರ್ಥಿಗಳಾದ ಭಗವಂತ ಮತ್ತು ರಮೇಶ.

ಸರಿಯಾಗಿ ಬಸ್ ಬರಬೇಕಾದ್ರೆ ರಸ್ತೆಗಿಳಿಬೇಕು!

ನಾವು ಈಗಾಗಲೇ ನಮ್ಮೂರಿನ ಜನರ ಜೊತೆಗೆ ರಾಜ್ಯ ಹೆದ್ದಾರಿ-10 ಕಲಬುರಗಿ ಮತ್ತು ರಿಬ್ಬನಪಲ್ಲಿ ರಸ್ತೆ ತಡೆದು ಪ್ರತಿಭಟನೆ ಮಾಡಿದ್ದೇವೆ. ಆಗ ತಿಂಗಳು ಚೆನ್ನಾಗಿ ಬಂತು ನಂತರ ಸರಿಯಾಗಿ ಬರ್ತಿಲ್ಲ. ಮತ್ತೆ ಪ್ರತಿಭಟನೆ ಮಾಡಿದ್ವಿ. ಆಗ ಮೂರ್ನಾಲ್ಕು ದಿನ ಬಂತು. ಸರಿಯಾಗಿ ಬಸ್ ನಮ್ಮೂರಿಗೆ ಬರಬೇಕಾದ್ರೆ ರಸ್ತೆಗಿಳಿಬೇಕಾಗಿದೆ’ ನಾವು ಎಂದು ವಿದ್ಯಾರ್ಥಿಗಳು ಬೇಸರ ವ್ಯಕ್ತಪಡಿಸಿದರು. ಬೆಳಿಗ್ಗೆ 9ಗಂಟೆಗೆ ನಮ್ಮೂರಲ್ಲಿರಬೇಕು ಮಧ್ಯಾಹ್ನ 2.30ಕ್ಕೆ ಮತ್ತು ಸಂಜೆ 5ಕ್ಕೆ ಸೇಡಂನಿಂದ ಬಿಟ್ಟು 5.30ಕ್ಕೆ ನಮ್ಮೂರಲ್ಲಿರಬೇಕು ಅಂದ್ರೆ ಅನುಕೂಲವಾಗುತ್ತದೆ’ ಎಂದು ಮನವಿ ಮಾಡಿದರು.