ಚೀನಾ ಸಂಚಿನ ಬಗ್ಗೆ ಎಚ್ಚರ: ವಿದೇಶಾಂಗ ಸಚಿವ ಎಸ್‌. ಜೈಶಂಕರ್‌

ಉಭಯ ದೇಶಗಳ ಸಂಬಂಧವನ್ನು ‘ಸಮತೋಲನ’ ಸ್ಥಿತಿಗೆ ತರಲು ಜಾಗತಿಕವಾಗಿ ಲಭ್ಯವಿರುವ ಇತರ ಅವಕಾಶಗಳನ್ನು ಭಾರತವು ಬಿಟ್ಟುಕೊಡಬಾರದು ಎಂದು ಸಂವಾದ ಕಾರ್ಯಕ್ರಮವೊಂದರಲ್ಲಿ ಅವರು ಅಭಿಪ್ರಾಯಪಟ್ಟರು.

ಸಂಬಂಧದಲ್ಲಿ ‘ಸಮತೋಲನದ ಸ್ಥಿತಿ’ ಕಂಡುಕೊಳ್ಳುವುದು ಮತ್ತು ಅದನ್ನು ಕಾಪಾಡಿಕೊಂಡು ಹೋಗುವುದು ಉಭಯ ದೇಶಗಳ ಮುಂದಿರುವ ‘ಆತಿದೊಡ್ಡ ಸವಾಲು’ ಎಂದು ಹೇಳಿದರು. 

ಪೂರ್ವ ಲಡಾಖ್‌ ಗಡಿಯಲ್ಲಿ ಶಾಂತಿ ಕಾಪಾಡುವ ಸಂಬಂಧ ಇದ್ದ ಒಪ್ಪಂದದಿಂದ ಚೀನಾ ದೂರ ಸರಿದಿರುವುದರಿಂದ ಗಡಿ ವಿವಾದ ಉಲ್ಬಣಿಸಿರುವುದು, ತಕ್ಷಣದಲ್ಲೇ ಬಗೆಹರಿಯಬೇಕಾದ ಪ್ರಮುಖ ಸಮಸ್ಯೆಯಾಗಿದೆ ಎಂದು ಪ್ರತಿಪಾದಿಸಿದರು.

‘1980ರ ದಶಕದ ಕೊನೆಯಿಂದಲೂ ಪೂರ್ವ ಲಡಾಖ್‌ ಗಡಿಗೆ ಸಂಬಂಧಿಸಿದಂತೆ ನಮ್ಮ ನಡುವೆ ಸ್ಪಷ್ಟ ತಿಳಿವಳಿಕೆಯಿತ್ತು. ಅದರಿಂದಾಗಿ ಗಡಿಯಲ್ಲಿ ಶಾಂತಿ ನೆಲೆಸಿತ್ತು. ಇದೀಗ ಸುಮಾರು 30 ವರ್ಷಗಳ ಬಳಿಕ ಚೀನಾ ಆ ಒಪ್ಪಂದದಿಂದ ದೂರ ಸರಿದಿರುವುದರಿಂದ ಗಡಿಯಲ್ಲಿ ಸಂಘರ್ಷದ ಸ್ಥಿತಿ ನೆಲೆಸಿದೆ’ ಎಂದರು.

ವಿವಾದಗಳನ್ನು ‘ಕೇವಲ ನಮ್ಮಿಬ್ಬರ ನಡುವಿನ ವಿಚಾರ’ ಎಂದು ಬಿಂಬಿಸುವ ಮೂಲಕ ಇತರ ದೇಶಗಳನ್ನು ಹೊರಗಿಡಲು ಚೀನಾ ಪ್ರಯತ್ನಿಸುತ್ತಿದೆ. ಜಗತ್ತಿನಲ್ಲಿರುವ ಇತರ 190ಕ್ಕೂ ಅಧಿಕ ದೇಶಗಳಿಗೆ ನಮ್ಮಿಬ್ಬರ ನಡುವಣ ಸಂಬಂಧದಲ್ಲಿ ಯಾವುದೇ ಪಾತ್ರವಿಲ್ಲ ಎನ್ನುತ್ತಿದೆ. ಅದು ಚೀನಾದ ಸಂಚಿನ ಭಾಗವಷ್ಟೆ. ಏಕೆಂದರೆ, ಉಭಯ ದೇಶಗಳ ನಡುವಣ ಸಂಬಂಧ ಸುಧಾರಣೆಗೆ ಜಾಗತಿಕವಾಗಿ ಲಭ್ಯವಿರುವ ಇತರ ಅವಕಾಶಗಳನ್ನೂ ನಮಗೆ ಬಳಸಿಕೊಳ್ಳಬಹುದು. ನಾವು ಆ ಹಕ್ಕನ್ನು ಏಕೆ ತ್ಯಜಿಸಬೇಕು’ ಎಂದು ಅವರು ಪ್ರಶ್ನಿಸಿದರು.