ಬಿಳಿ ಉಡುಪು, ಗುಜರಾತ್ ಟವಲ್, ಗಿಡುಗನ ಕಾವಲು: ಕುತೂಹಲಕಾರಿ ವಿಂಬಲ್ಡನ್!

ವಿಂಬಲ್ಡನ್‌ನಲ್ಲಿ ಕಣಕ್ಕಿಳಿಯುವ ಪ್ರತಿಯೊಬ್ಬ ಆಟಗಾರನೂ ಸಂಪೂರ್ಣ ಬಿಳಿ ಬಣ್ಣದ ಉಡುಪುಗಳನ್ನೇ ಧರಿಸಬೇಕು. ಒಳ ಉಡುಪುಗಳೂ ಸೇರಿದಂತೆ ಯಾವುದರ ಬಣ್ಣವೂ ಚೂರೂ ವ್ಯತ್ಯಾಸವಾಗುವಂತಿಲ್ಲ.

ಯಾವುದೇ ಪಂದ್ಯವನ್ನು ವೀಕ್ಷಿಸಲು ರಾಜವಂಶಸ್ಥರು ಹಾಜರಿದ್ದರೆ, ಪ್ರತಿಯೊಬ್ಬ ಆಟಗಾರ ಕ್ರೀಡಾಂಗಣಕ್ಕೆ ಪ್ರವೇಶಿಸುವ ಮುನ್ನ ತಲೆ ಬಾಗಿ ನಮಿಸಬೇಕು

ರಾಜ ವಂಶಸ್ಥರಿಂದ ಆಹ್ವಾನ ಪಡೆದವರಷ್ಟೇ ರಾಯಲ್‌ ಬಾಕ್ಸ್‌ನಲ್ಲಿ ಕುಳಿತು ಪಂದ್ಯಗಳನ್ನು ವೀಕ್ಷಿಸಬಹುದು. ಇಲ್ಲದಿದ್ದರೆ, ಎಷ್ಟೇ ಹಣ ನೀಡಿದರೂ, ಆ ಬಾಕ್ಸ್‌ನ ಟಿಕೆಟ್‌ ಖರೀದಿಸಲು ಸಾಧ್ಯವಿಲ್ಲ.

ಪಂದ್ಯಗಳ ವೇಳೆ ಆಟಗಾರರು ಬಳಸುವ ನೇರಳೆ ಮತ್ತು ಹಸಿರು ಬಣ್ಣದ ಕಾಟನ್‌ ಟವಲ್‌ಗಳು ಗುಜರಾತ್‌ನ ವಾಪಿಯಲ್ಲಿ ತಯಾರಾಗುತ್ತವೆ.

ಎಷ್ಟು ದೊಡ್ಡ ಆಟಗಾರನೇ ಆದರೂ, ಯಾರಿಗೂ ಇಲ್ಲಿ ವಿಶೇಷ ಆತಿಥ್ಯ, ಉಪಚಾರವಿಲ್ಲ. ರೋಜರ್ ಫೆಡರರ್‌, ರಫೇಲ್‌ ನಡಾಲ್‌, ನೊವಾಕ್‌ ಜೊಕೊವಿಚ್‌, ಸರೇನಾ ವಿಲಿಯಮ್ಸ್‌ ಅವರಂತಹ ದಿಗ್ಗಜರೂ, ಲಾಕರ್‌ ರೂಮ್‌ಗಳು ಮತ್ತು ಸ್ನಾನಗೃಹಗಳನ್ನು ಯುವ ತಾರೆಯರೊಂದಿಗೆ ಹಂಚಿಕೊಳ್ಳುತ್ತಾರೆ.

ಪಂದ್ಯಗಳಿಗೆ ಪಾರಿವಾಳಗಳು ತೊಂದರೆ ನೀಡದಂತೆ 'ರುಫಸ್‌' ಗಿಡುಗ ಕಾವಲು ಕಾಯುತ್ತದೆ. ತರಬೇತಿ ಪಡೆದ ಈ ರುಫಸ್‌ ಬಳಿಯೂ ವಿಂಬಲ್ಡನ್‌ ಸೆಕ್ಯುರಿಟಿ ಪಾಸ್ ಇದೆ.

ಪ್ರಶಸ್ತಿ ಗೆದ್ದ ಆಟಗಾರರಿಗೆ ನೀಡುವ ಟ್ರೋಫಿ ಮೇಲೊಂದು ಪೈನಾಪಲ್‌ ಹಣ್ಣಿನ ಆಕೃತಿ ಇರುವುದನ್ನು ಗಮನಿಸಬಹುದು. ಈ ಹಣ್ಣು, 17ನೇ ಶತಮಾನದ ವೇಳೆ ಇಂಗ್ಲೆಂಡ್‌ನಲ್ಲಿ ಹಣ್ಣು ಸಂಸತ್ತು ಮತ್ತು ಅತಿಥಿ ಸತ್ಕಾರದ ಪ್ರತೀಕವಾಗಿತ್ತು. ಅದೇ ಕಾರಣಕ್ಕೆ ಟ್ರೋಫಿ ಮೇಲೆ ಸೇರಿಸಲಾಗಿದೆ ಎಂದು ಹೇಳಲಾಗುತ್ತದೆ. ಈ ಅದ್ಭುತ ಹಣ್ಣನ್ನು ಮರಳಿ ತಂದ ವಸಾಹತುಶಾಹಿ ಅನ್ವೇಷಕರಿಗೆ ನೀಡುವ ಗೌರವ ಎನ್ನುವುದು ಕೆಲವರ ಅಂಬೋಣ.

ಟೆನಿಸ್‌ ಅಂಗಳದಲ್ಲಿ ಬೆಳೆದಿರುವ ಹುಲ್ಲನ್ನು ನಿತ್ಯವೂ ನಿಖರವಾಗಿ 8 ಮಿ.ಮೀ. ಕತ್ತರಿಸಲಾಗುತ್ತದೆ. ಅದು ಒಂದಿಷ್ಟೂ ಆಚೀಚೆಯಾಗುವಂತಿಲ್ಲ. ಬಕ್ಕಿಂಗ್‌ಹ್ಯಾಮ್‌ ಅರಮನೆ ಮುಂಗಾದಲ್ಲಿರುವ ಹುಲ್ಲು ಹಾಸಿನಂತೆಯೇ ಕಾಣುವಂತೆ ಅಂಕಣವನ್ನು ನೋಡಿಕೊಳ್ಳಲಾಗುತ್ತದೆ.

ಪಂದ್ಯಗಳ ವೇಳೆ, ಆಟಗಾರರಿಗೆ ಚೆಂಡನ್ನು ಎತ್ತಿಕೊಡುವ ಬಾಲಕ – ಬಾಲಕಿಯರಿಗೆ ಫಿಟ್‌ನೆಸ್‌ ಕಾಪಾಡಿಕೊಳ್ಳಲು ನಿಕಟ ತರಬೇತಿ ನೀಡಲಾಗುತ್ತದೆ. ಅವರನ್ನು ಅಥ್ಲೀಟ್‌ಗಳಂತೆ ಸಜ್ಜುಗೊಳಿಸಲಾಗುತ್ತದೆ.

2013ರಲ್ಲಿ ಕಿತ್ತಳೆ ಬಣ್ಣದ ತಳ ಹೊಂದಿದ್ದ ಶೂ ಧರಿಸಿದ್ದಕ್ಕಾಗಿ ದಿಗ್ಗಜ ರೋಜರ್‌ ಫೆಡರರ್‌ ಅವರು ದಂಡ ಕಟ್ಟಿದ್ದರು.

ವಿಂಬಲ್ಡನ್‌ ಪಂದ್ಯಗಳು ನಡೆಯುವ ಸೆಂಟರ್‌ ಕೋರ್ಟ್‌ 'ರೇನ್‌ ಪ್ರೂಫ್‌' ಮೇಲ್ಛಾವಣಿ ಹೊಂದಿದೆ. ಮಳೆ ಬಂದರೆ ಈ ಮೇಲ್ಛಾವಣಿಯನ್ನು ಕೇವಲ 10 ನಿಮಿಷದಲ್ಲೇ ಮುಚ್ಚಬಹುದು.

ಪಂದ್ಯದ ಟಿಕೆಟ್‌ಗಳನ್ನು ಖರೀದಿಸಲು ಟೆನಿಸ್‌ ಪ್ರಿಯರು ಹಾತೊರೆಯುತ್ತಾರೆ. ಟಿಕೆಟ್‌ಗಾಗಿ ಹಿಂದಿನ ದಿನ ರಾತ್ರಿಯೇ ಕ್ರೀಡಾಂಗಣದ ಹೊರಗೆ ಟೆಂಟ್‌ಗಳನ್ನು ಹಾಕಿಕೊಂಡು ಕಾಯ್ದ ಉದಾಹರಣೆಗಳಿವೆ.

ಎರಡನೇ ಮಹಾಯುದ್ಧದ ಸಂದರ್ಭದಲ್ಲಿ ವಿಂಬಲ್ಡನ್‌ ಸೆಂಟರ್‌ ಕೋರ್ಟ್‌ ಮೇಲೆ ಬಾಂಬ್‌ ದಾಳಿಯಾಗಿತ್ತು. ಇದರಿಂದಾಗಿ, ಸುಮಾರು 1,200 ಆಸನಗಳು ಸಂಪೂರ್ಣ ಹಾನಿಯಾಗಿದ್ದವು.

ಪ್ರಾಯೋಜಕತ್ವಕ್ಕೆ ಸಂಬಂಧಿಸಿದ ಯಾವುದೇ ಬ್ರಾಂಡ್‌ನ ಬ್ಯಾನರ್‌ಗಳ ಪ್ರದರ್ಶನಕ್ಕೆ ಅವಕಾಶವಿಲ್ಲ.

ಪಂದ್ಯದ ವೇಳೆ ಆಟಗಾರರ ಪಾಯಿಂಟ್‌, ಫಲಿತಾಂಶ ಪ್ರದರ್ಶಿಸುವ ಸ್ಕೋರ್‌ಬೋರ್ಡ್‌ಗೆ ಈಗಲೂ ಸ್ಮಾರ್ಟ್‌ ಟಚ್‌ ಸಿಕ್ಕಿಲ್ಲ. ಸಾಂಪ್ರದಾಯಿಕ ಶೈಲಿಯನ್ನು ಉಳಿಸಿಕೊಳ್ಳಲಾಗಿದೆ. ಅಂಗಳದಲ್ಲಿನ ಸಿಬ್ಬಂದಿ ಕೈಗಳಿಂದಲೇ ಕ್ಷಣಕ್ಷಣಕ್ಕೂ ಅಪ್‌ಡೇಟ್‌ ಮಾಡುತ್ತಾರೆ.

ಸ್ಟ್ರಾಬೆರಿ ಮತ್ತು ಕ್ರೀಮ್‌ ವಿಂಬಲ್ಡನ್‌ನ ಅಧಿಕೃತ ಉಪಹಾರಗಳಾಗಿವೆ. ಪಂದ್ಯದ ಮುನ್ನಾದಿನ ಕೆಂಟ್‌ನಿಂದ ಆರಿಸಿದ ಉತ್ಕೃಷ್ಟ ಗುಣಮಟ್ಟದ ಸ್ಟ್ರಾಬೆರಿಗಷ್ಟೇ ಅವಕಾಶವಿದೆ. 1877ರಲ್ಲಿ ಆರಂಭವಾದ ಸಂಪ್ರದಾಯದಂತೆ, ಹಣ್ಣನ್ನು ಕ್ರೀಮ್‌ ಜೊತೆ ನೀಡಲಾಗುತ್ತದೆ. ಅಭಿಮಾನಿಗಳು ಪ್ರತಿವರ್ಷ ಸುಮಾರು 20 ಲಕ್ಷ ಸ್ಟ್ರಾಬೆರಿ ಸವಿಯುತ್ತಾರೆ.