ರಷ್ಯಾದ ಅಣು ದಾಳಿ ಎದುರಿಸಲು ಸಿದ್ಧತೆ ಅತ್ಯಗತ್ಯ: ಝೆಲೆನ್‌ಸ್ಕಿ
ಅಕ್ಷರ ಗಾತ್ರ :ಆ |ಆ |ಆ
ಕೀವ್‌: ‘ರಷ್ಯಾ ಪರಮಾಣು ಶಸ್ತ್ರಾಸ್ತ್ರಗಳನ್ನು ಬಳಸಲು ನಿರ್ಧರಿಸುವ ಕ್ಷಣಕ್ಕಾಗಿ ವಿಶ್ವ ಕಾಯುತ್ತಾ ಕೂರುವಂತಿಲ್ಲ. ಸಂಭವನೀಯ ಅಣು ದಾಳಿ ಎದರಿಸಲು ಎಲ್ಲ ಸಿದ್ಧತೆ ಮಾಡಿಕೊಳ್ಳುವುದು ಅತ್ಯಗತ್ಯ’ ಎಂದು ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್‌ ಝೆಲೆನ್‌ಸ್ಕಿ ಹೇಳಿದ್ದಾರೆ.
ಶನಿವಾರ ಸುದ್ದಿಮಾಧ್ಯಮಗಳ ಸಂದರ್ಶನದಲ್ಲಿ ಮಾತನಾಡಿರುವ ಝೆಲೆನ್‌ಸ್ಕಿ, ರಷ್ಯಾದಿಂದ ಅಣುದಾಳಿಯ ಸಾಧ್ಯತೆ ಇದೆ ಎಂದು ಪುನರುಚ್ಚರಿಸಿದ್ದಾರೆ.
‘ರಷ್ಯನ್ನರು ನಮ್ಮ ವಿರುದ್ಧ ಯಾವುದೇ ಅಸ್ತ್ರ ಬಳಸಬಹುದು, ಅದು ನನಗೆ ಮನದಟ್ಟಾಗಿದೆ. ಸದ್ಯ ನಮಗೆ ವಿಕಿರಣ ನಿವಾರಕ ಔಷಧ ಮತ್ತು ವಾಯುದಾಳಿಯಿಂದ ರಕ್ಷಣೆ ಪಡೆಯುವ ಆಶ್ರಯ ತಾಣಗಳ ಅಗತ್ಯವಿದೆ’ ಎಂದು ಅವರು ಹೇಳಿದರು.
ಯುದ್ಧಭೂಮಿಯಲ್ಲಿ ರಷ್ಯಾದ ಹಿನ್ನಡೆಗೆ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಕಾರ್ಯತಂತ್ರದ ಅಥವಾ ಕಡಿಮೆ ಪರಿಣಾಮದ ಅಣ್ವಸ್ತ್ರ ಬಳಸುವ ಅಪಾಯ ಹೆಚ್ಚಿದೆ ಎಂದು ಸಿಐಎ ನಿರ್ದೇಶಕ ವಿಲಿಯಂ ಬರ್ನ್ಸ್ ಗುರುವಾರ ಹೇಳಿದ್ದರು. ಬರ್ನ್ಸ್ ಅವರ ಈ ಹೇಳಿಕೆ ಉಲ್ಲೇಖಿಸಿ, ‘ಪುಟಿನ್ ಒಡ್ಡಿರುವ ಬೆದರಿಕೆಯ ಬಗ್ಗೆ ಜಗತ್ತು ಚಿಂತಿಸಬೇಕು’ ಎಂದು ಝೆಲೆನ್‌ಸ್ಕಿ ಶುಕ್ರವಾರ ಎಚ್ಚರಿಸಿದ್ದರು.
ಝೆಲೆನ್‌ಸ್ಕಿ ಅವರ ಸಂದರ್ಶನವನ್ನು ಉಕ್ರೇನಿನ ಆರು ಸುದ್ದಿ ವೆಬ್‌ಸೈಟ್‌ಗಳು ಮತ್ತು ಅಧ್ಯಕ್ಷರ ಟೆಲಿಗ್ರಾಮ್‌ ಖಾತೆಯಲ್ಲಿ ಪ್ರಸಾರ ಮಾಡಲಾಗಿದೆ.
ತಾಜಾ ಮಾಹಿತಿ ಪಡೆಯಲು ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ
ತಾಜಾ ಸುದ್ದಿಗಳಿಗಾಗಿ ಪ್ರಜಾವಾಣಿ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ: ಆಂಡ್ರಾಯ್ಡ್ ಆ್ಯಪ್ | ಐಒಎಸ್ ಆ್ಯಪ್
ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನುಫಾಲೋ ಮಾಡಿ.
