ಮೂರು ತಿಂಗಳ ಬಳಿಕ ₹ 1 ಲಕ್ಷ ಕೋಟಿ ದಾಟಿದ ಜಿಎಸ್‌ಟಿ ಸಂಗ್ರಹ
ನವದೆಹಲಿ: ಸರಕು ಮತ್ತು ಸೇವಾ ತೆರಿಗೆಯ (ಜಿಎಸ್‌ಟಿ) ಸಂಗ್ರಹವು ಮೂರು ತಿಂಗಳ ಬಳಿಕ ಮತ್ತೆ ₹ 1 ಲಕ್ಷ ಕೋಟಿಯನ್ನು ದಾಟಿದೆ.
ನವೆಂಬರ್‌ನ ಹಬ್ಬದ ಸಂದರ್ಭದಲ್ಲಿ ಖರೀದಿ ಚಟುವಟಿಕೆ ಹೆಚ್ಚಾಗಿ ನಡೆದಿದ್ದರಿಂದ ಜಿಎಸ್‌ಟಿ ಸಂಗ್ರಹದಲ್ಲಿ ಶೇ 6ರಷ್ಟು ಏರಿಕೆಯಾಗಿದ್ದು ₹ 1.03 ಲಕ್ಷ ಕೋಟಿಗೆ ತಲುಪಿದೆ.
2018ರ ನವೆಂಬರ್‌ನಲ್ಲಿ ₹ 97,637 ಕೋಟಿ ಸಂಗ್ರಹವಾಗಿತ್ತು. 2019ರ ಅಕ್ಟೋಬರ್‌ನಲ್ಲಿನ ಸಂಗ್ರಹವು ₹ 95,380 ಕೋಟಿ ಇತ್ತು.
ಜಿಎಸ್‌ಟಿ ಜಾರಿಗೆ ಬಂದ ಬಳಿಕ ಮೂರನೇ ಬಾರಿಗೆ ತಿಂಗಳೊಂದರ ಅತಿ ಗರಿಷ್ಠ ತೆರಿಗೆ ಸಂಗ್ರಹ ಇದಾಗಿದೆ. ಈ ಹಿಂದೆ 2019 ಏಪ್ರಿಲ್‌ ಮತ್ತು 2019ರ ಮಾರ್ಚ್‌ ಸಂಗ್ರಹವೂ ಗರಿಷ್ಠ ಮಟ್ಟದಲ್ಲಿತ್ತು.
2017ರ ಜುಲೈನಲ್ಲಿ ಜಿಎಸ್‌ಟಿ ಜಾರಿಯಾದ ಬಳಿಕ ಎಂಟನೇ ಬಾರಿಗೆ ಜಿಎಸ್‌ಟಿ ಸಂಗ್ರಹವು ₹ 1 ಲಕ್ಷ ಕೋಟಿ ಮೊತ್ತವನ್ನು ದಾಟಿದಂತಾಗಿದೆ.
ಅಕ್ಟೋಬರ್ ತಿಂಗಳ ಜಿಎಸ್‌ಟಿಆರ್‌–3ಬಿ ಸಲ್ಲಿಕೆಯು 77.83 ಲಕ್ಷಕ್ಕೆ ತಲುಪಿದೆ.
‘₹ 1 ಲಕ್ಷ ಕೋಟಿ ದಾಟಿರುವುದು ಉತ್ತೇಜನಕಾರಿ ಬೆಳವಣಿಗೆಯಾಗಿದೆ. ವಿತ್ತೀಯ ಕೊರತೆ ನಿಯಂತ್ರಿಸಲು ನೆರವಾಗಲಿದೆ. ಮುಂದಿನ ತಿಂಗಳುಗಳಲ್ಲಿಯೂ ತೆರಿಗೆ ಸಂಗ್ರಹವು ಇದೇ ಪ್ರಮಾಣದಲ್ಲಿರುವ ವಿಶ್ವಾಸವಿದೆ’ ಎಂದು ಡೆಲಾಯ್ಟ್‌ ಇಂಡಿಯಾದ ಪಾಲುದಾರ ಎಂ.ಎಸ್‌. ಮಣಿ ಅವರು ಪ್ರತಿಕ್ರಿಯೆ ನೀಡಿದ್ದಾರೆ.
ತೆರಿಗೆ ಸಂಗ್ರಹ
ಆಗಸ್ಟ್‌; ₹ 98,202 ಕೋಟಿ
ಸೆಪ್ಟೆಂಬರ್; ₹ 91,916 ಕೋಟಿ
ಅಕ್ಟೋಬರ್; ₹ 95,380 ಕೋಟಿ
