Video Shoot: ಸ್ನೇಹಕ್ಕೊಂದು ಸುಂದರ ಫ್ರೇಮ್

ಶಿವಮೊಗ್ಗದ ಕಾವ್ಯಶ್ರೀ ಹಾಗೂ ನಂದಿನಿ ಹೆಗ್ಡೆ ಕೂಡ ಈ ರೀತಿ ಥೀಮ್ ಆಧಾರಿತ ವಿಡಿಯೊ ಶೂಟ್ ಮಾಡಿಸಿದ್ದಾರೆ. ತಮ್ಮ ಸ್ನೇಹದ ಪರಿಯನ್ನು ವಿಡಿಯೊ ಮೂಲಕ ತೆರೆದಿಟ್ಟಿದ್ದಾರೆ. ಅವರು ಹೇಳುವಂತೆ: ನಾನು ನನ್ನ ಗೆಳತಿ ಕಾವ್ಯಾ ಚಿಕ್ಕವಯಸ್ಸಿನಿಂದಲೂ ಸ್ನೇಹಿತರು. ಸುಮಾರು ಇಪ್ಪತ್ತು ವರ್ಷಗಳ ಗೆಳೆತನದ ನಂಟನ್ನು ಹಂಚಿಕೊಳ್ಳಬೇಕು ಈ ಬಂಧವನ್ನು ಜೀವನವಿಡೀ ನೆನಪಿಟ್ಟುಕೊಳ್ಳುವಂತೆ ಏನಾದರೂ ಹೊಸತನ್ನು ಮಾಡಬೇಕು ಎಂದು ಇಬ್ಬರೂ ಆಲೋಚಿಸುತ್ತಿದ್ದೆವು. ಈ ಥೀಮ್ ಆಧಾರಿತ ವಿಡಿಯೊಗಳನ್ನು ನೋಡುತ್ತಲೇ ನಾವೂ ಹೀಗೇ ವಿಡಿಯೊ ಮಾಡಿಸಬೇಕು ಎನ್ನಿಸಿತು. ನಮ್ಮ ಸ್ನೇಹದ ಅನುಬಂಧವನ್ನು ವ್ಯಕ್ತಪಡಿಸಲು ಒಂದು ದಾರಿಗಾಗಿ ಹುಡುಕಾಡುತ್ತಿದ್ದ ನಮಗೆ ಈ ಮಾದರಿ ಸೂಕ್ತ ಎನಿಸಿತು. ಇಬ್ಬರೂ ಒಂದೇ ಬಗೆಯ ಸೀರೆ ಉಟ್ಟು ‘ನಗೂ ಎಂದಿದೇ...’ ಹಾಡಿಗೆ ವಿಡಿಯೊ ಮಾಡಿಸಿದೆವು. ಎಲ್ಲಿಯೂ ನಟನೆ ಎನಿಸಬಾರದು ನೈಜವಾಗಿರಬೇಕು ಎಂಬ ಕಾರಣಕ್ಕೆ ಸುಮ್ಮನೆ ಬೀದಿಯಲ್ಲಿ ತಿರುಗಾಡುವಂತೆ ಶಾಪಿಂಗ್ ಮಾಡುವಂತೆ ಹರಟುತ್ತಿರುವಂತೆ ಇರುವ ದೃಶ್ಯಗಳನ್ನು ಒಟ್ಟುಗೂಡಿಸಿ ವಿಡಿಯೊ ಮಾಡಿಸಿದೆವು. ಈ ವಿಡಿಯೊವನ್ನು ತುಂಬಾ ಜನ ಇಷ್ಟಪಟ್ಟರು. ನಮ್ಮಿಬ್ಬರಿಗೂ ಬಹಳ ಖುಷಿಯಾಯಿತು.

ಬೆಂಗಳೂರಿನ ಮಮತಾ ಶೆಟ್ಟಿ ತಮ್ಮ ಸ್ನೇಹಿತೆಯರ ಪುಟ್ಟದೊಂದು ವಲಯವನ್ನೇ ಹೊಂದಿದ್ದಾರೆ. ಸದಾ ನಗು ನಗುತ್ತಾ ಇರಬೇಕು ಎಂದು ಬಯಸುವ ಈ ಸ್ನೇಹಿತೆಯರ ಗುಂಪು ತಮ್ಮ ಸಂತೋಷಕೂಟಗಳ ವಿಡಿಯೊಗಳನ್ನು ಮಾಡುತ್ತಾ ಖುಷಿಪಡುತ್ತದೆ. ‘ನಮ್ಮ ಸ್ನೇಹವನ್ನು ಅಭಿವ್ಯಕ್ತಪಡಿಸಲು ವಿಡಿಯೊ ಒಂದು ನೆಪವಷ್ಟೇ. ಹಳೆಯ ವಿಡಿಯೊಗಳನ್ನು ನೋಡುವಾಗ ಸುಮಧುರ ನೆನಪುಗಳು ಖುಷಿ ನೀಡುತ್ತವೆ, ಮನಕ್ಕೆ ಉತ್ಸಾಹ ತುಂಬುತ್ತವೆ’ ಎನ್ನುತ್ತಾರೆ ಮಮತಾ.