ಸ್ಥಳೀಯ ಜನರು ಒಂದಾಗಿ ಕೆಲಸ ಮಾಡಿದರೆ ಪಶ್ಚಿಮಘಟ್ಟದ ಸಮೃದ್ಧ ಕಾಡನ್ನು ಯಶಸ್ವಿಯಾಗಿ ಸಂರಕ್ಷಿಸಲು ಸಾಧ್ಯ. ಅರಣ್ಯ ಇಲಾಖೆಯ ‘ಜಂಟಿ ಅರಣ್ಯ ನಿರ್ವಹಣೆ’ ಹಾಗೂ ’ಸಾಮಾಜಿಕ ಅರಣ್ಯ’ ಯೋಜನೆಗಳು ಜನರ ಸಹಯೋಗದಿಂದ ಕಾಡನ್ನು ರಕ್ಷಿಸಬಹುದು.

ಕಾಡನ್ನು ಅರಣ್ಯ ಇಲಾಖೆಯೊಂದೇ ರಕ್ಷಿಸುವುದಿಲ್ಲ. ಸ್ಥಳೀಯ ಗ್ರಾಮಸ್ಥರು ಕಾಡಂಚಿನಲ್ಲಿ ವಾಸವಿರುವ ಜನರಿಗೆ ಊರಿನ ಕಾಡಿನ ಬಗ್ಗೆ ಗೌರವ ಮತ್ತು ಹೆಮ್ಮೆ ಇದ್ದೇ ಇರುತ್ತದೆ. ಅವರು ಕೂಡ ಅರಣ್ಯ ಸಂರಕ್ಷಣೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ.

ಶಿವಮೊಗ್ಗ ಜಿಲ್ಲೆಯ ಕಂದಾಯ ಅರಣ್ಯಗಳು ವಿನಾಶದ ಅಂಚಿನಲ್ಲಿವೆ. ಅವುಗಳ ಸಂರಕ್ಷಣೆ ಜೊತೆಗೆ ಭದ್ರಾವತಿಯಲ್ಲಿರುವ ಎಂಪಿಎಂ ಕಾರ್ಖಾನೆ ಕೆಪಿಸಿ ಸುಪರ್ದಿಯಲ್ಲಿರುವ ಅರಣ್ಯ ಭೂಮಿಯನ್ನು ಸರ್ಕಾರ ವಶಕ್ಕೆ ಪಡೆದು ಜನರ ಸಹಭಾಗಿತ್ವದಲ್ಲಿ ಸಂರಕ್ಷಣೆ ಆಗಬೇಕು.

ಹಳಕಾರ ಗ್ರಾಮ ಅರಣ್ಯ ಪಂಚಾಯಿತಿಯ ಗಡಿ ಅಂತಿಮಗೊಳಿಸಲು ಸರ್ವೆ ನಡೆಸಿ ಅರಣ್ಯ ಅಂಚಿಗೆ ಸಂರಕ್ಷಣೆ ಉದ್ದೇಶದಿಂದ ಕಾಂಪೌಂಡ್ ನಿರ್ಮಿಸಲು ಸರ್ಕಾರ ಅನುದಾನ ನೀಡಬೇಕು. ಹಳೆಯ ಕಾಲುವೆಯಿಂದ ಸದ್ಯ ಅರಣ್ಯ ಒತ್ತುವರಿಗೆ ಅವಕಾಶ ಆಗುತ್ತಿಲ್ಲ.

ಮಂಚಿಕೇರಿ ವಲಯ ಅರಣ್ಯ ವ್ಯಾಪ್ತಿಯ ಭರಣಿ ಹೆಮ್ಮಾಡಿ ವ್ಯಾಪ್ತಿಯಲ್ಲಿ ಕಾಡಿನಲ್ಲಿ ಸಿಸಿಟಿವಿ ಅಳವಡಿಸಿ ಮರಕಳವು ನಡೆಯದಂತೆ ಕಣ್ಗಾವಲಿಡಲಾಗಿದೆ. ತಂತ್ರಜ್ಞಾನ ಬಳಕೆ ಮಾಡಿ ಕಾಡು ಸಂರಕ್ಷಣೆಗೆ ಇದು ಮುನ್ನುಡಿಯಾಗಿದೆ.

ಗ್ರಾಮ ಅರಣ್ಯವನ್ನು ಹಗಲು ರಾತ್ರಿ ಪಾಳಿ ಆಧಾರದಲ್ಲಿ ಕಾವಲು ಕಾಯುತ್ತೇವೆ. ಇದಕ್ಕಾಗಿ ಯಾವುದೇ ಹಣ ಪಡೆಯುವುದಿಲ್ಲ. ಮರಗಿಡಗಳ ಸಂರಕ್ಷಿಸುವುದು ಪೂರ್ವಜರಿಂದಲೂ ನಡೆದುಕೊಂಡು ಬಂದ ಜವಾಬ್ದಾರಿ.

ಮೂರು ದಶಕಗಳ ಹಿಂದೆ ದೊಡ್ಡ ಮರಗಳನ್ನೊಳಗೊಂಡ ಕಾಡಿನಲ್ಲಿ ನೀರುನೇರಳೆ ರಾಮಪತ್ರೆ ಮರಗಳು ವಿನಾಶದ ಅಂಚಿನಲ್ಲಿದ್ದವು. ಆಗ ಗ್ರಾಮಸ್ಥರೆಲ್ಲ ಸಂಘಟಿತಗೊಂಡು ಸಂರಕ್ಷಣೆ ಮಾಡಿದ ಫಲವಾಗಿ ಸಮೃದ್ಧ ಅರಣ್ಯ ಇಂದಿಗೂ ಉಳಿದುಕೊಂಡಿದೆ. ಇಡೀ ಗ್ರಾಮಕ್ಕೆ ವರ್ಷಾವಧಿ ಸಾಲುವಷ್ಟು ನೀರು ಕಾಡಿನಿಂದ ಹರಿಯುವ ತೊರೆಯಿಂದ ಸಿಗುತ್ತಿದೆ.