ಬೆಂಗಳೂರು: ಭಾರತದ ಚಂದ್ರಯಾನ–3, ರಷ್ಯಾದ ಲುನಾ–25, ಜಪಾನ್ನ ಸೆಲಿನ್, ಇಸ್ರೇಲ್ನ ಬೆರೆಶೀತ್ ಹೀಗೆ ಬಾಹ್ಯಾಕಾಶ ಸಂಶೋಧನಾ ಕ್ಷೇತ್ರದಲ್ಲಿ ಮುಂಚೂಣಿಯಲ್ಲಿರುವ ಹಲವು ರಾಷ್ಟ್ರಗಳ ಈ ಯೋಜನೆಗಳೆಲ್ಲವೂ ಚಂದ್ರನತ್ತಲೇ ನೆಟ್ಟಿವೆ.
ಚಂದ್ರಯಾನ–3 ಆಗಸ್ಟ್ 23ರಂದು ಚಂದ್ರನ ದಕ್ಷಿಣ ಧ್ರುವದಲ್ಲಿ ಇಳಿಯುವ ಸಾಧ್ಯತೆ ಇದೆ. ಆದರೆ ರಷ್ಯಾ ಅದಕ್ಕೂ ಎರಡು ದಿನ ಮುಂಚಿತವಾಗಿ ಅದೇ ಜಾಗದಲ್ಲಿ ತನ್ನ ನೌಕೆಯನ್ನು ಇಳಿಸಲು ಕಾರ್ಯಕ್ರಮ ರೂಪಿಸಿದೆ.
ರಷ್ಯಾ–ಚೀನಾ ಕೂಡಾ ಜಂಟಿ ಕಾರ್ಯಾಚರಣೆ ನಡೆಸುವ ಯೋಜನೆ ಹೊಂದಿದೆ. ಇದು ಚಂದ್ರನ ಚಿನ್ನದ ಬೇಟೆ ಎಂದು ನಾಸಾ ಬಣ್ಣಿಸಿರುವುದೂ ಚಂದ್ರನತ್ತ ಕುತೂಹಲದಿಂದ ನೋಡುವಂತಾಗಿದೆ. ಭೂಮಿಯ ಏಕೈಕ ನೈಸರ್ಗಿಕ ಉಪಗ್ರಹ ಚಂದ್ರನ ಅಂಗಳಕ್ಕಿಳಿಯಲು ಏಕೆ ಇಷ್ಟು ಪೈಪೋಟಿ...?
ಭೂಮಿಯ ಏಕೈಕ ನೈಸರ್ಗಿಕ ಉಪಗ್ರಹ ಚಂದ್ರ ನಮ್ಮಿಂದ 3,84,400 ಕಿ.ಮೀ. ದೂರದಲ್ಲಿದೆ. ಭೂಮಿಯ ಸುತ್ತ ಸುತ್ತುವ ಚಂದ್ರನಲ್ಲಿ ಹವೆ ಭೂಮಿಯಂತಿಲ್ಲ. ಇದರ ಗುರುತ್ವಾಕರ್ಷಣ ಶಕ್ತಿಯಿಂದ ಭೂಮಿ ಮೇಲಿನ ಕಡಲು ಉಕ್ಕುತ್ತದೆ.
ಸುಮಾರು 4.5 ಶತಕೋಟಿ ವರ್ಷಗಳ ಹಿಂದೆ ಬೃಹತ್ ಆಕಾಶಕಾಯವೊಂದು ಭೂಮಿಗೆ ಬಡಿದ ಪರಿಣಾಮ ಚಿಮ್ಮಿದ ತುಂಡುಗಳು ಸೇರಿ ದುಂಡಗಾಗಿ ಈಗ ಚಂದ್ರನಾಗಿ ಭೂಮಿಯ ಸುತ್ತ ಸುತ್ತುತ್ತಿದೆ ಎಂದು ತಜ್ಞರು ಹೇಳುತ್ತಾರೆ.
ಚಂದ್ರನ ಅಂಗಳದಲ್ಲಿ ಸೂರ್ಯ ಉದಯದ ನಂತರ ತಾಪಮಾನ 127 ಡಿಗ್ರಿ ಸೆಲ್ಶಿಯಸ್ಗೆ ಏರುತ್ತದೆ. ಕತ್ತಲಾದರೆ ಮೈನಸ್ 173 ಡಿಗ್ರಿ ಸೆಲ್ಶಿಯಸ್ಗೆ ಕುಸಿಯುತ್ತದೆ. ಸೂರ್ಯನ ಅತಿ ನೇರಳೆ ಕಿರಣ ಸೇರಿದಂತೆ ಯಾವುದೇ ಹಾನಿಕಾರಕ ಕಿರಣಗಳಿಗೆ ಚಂದ್ರನ ಅಂಗಳದಲ್ಲಿ ಯಾವುದೇ ರಕ್ಷಣೆ ಇಲ್ಲ.
ಚಂದ್ರನ ಅಂಗಳಕ್ಕಿಳಿಯಲು ಕಾನೂನು ಕುರಿತೂ ಬಹಳಷ್ಟು ಗೊಂದಲಗಳಿವೆ. ವಿಶ್ವ ಸಂಸ್ಥೆಯು 1966ರಲ್ಲಿ ರಚಿಸಿದ ಬಾಹ್ಯಾಕಾಶ ಒಪ್ಪಂದದ ಪ್ರಕಾರ, ಚಂದ್ರನ ಮೇಲೆ ಯಾವುದೇ ಭೂಮಿ ಮೇಲಿನ ರಾಷ್ಟ್ರಕ್ಕೂ ಹಾಗೂ ಹೊರಗಿನ ಯಾವುದೇ ವಸ್ತುಗೂ ಹಕ್ಕಿಲ್ಲ. ಚಂದ್ರನ ಕುರಿತ ಯಾವುದೇ ಸಂಶೋಧನೆ ಹಾಗೂ ಅಧ್ಯಯನ ಒಂದು ರಾಷ್ಟ್ರಕ್ಕೆ ಸೀಮಿತವಾಗದೆ, ಎಲ್ಲಾ ರಾಷ್ಟ್ರಗಳಿಗೂ ಸೇರಿದ್ದಾಗಿದೆ ಎಂದು ಹೇಳಲಾಗಿದೆ.
1979ರ ಒಪ್ಪಂದದ ಪ್ರಕಾರ, ಚಂದ್ರ ಯಾರ ಸ್ವತ್ತೂ ಅಲ್ಲ. ಯಾವುದೇ ಸರ್ಕಾರ ಅಥವಾ ಖಾಸಗಿಯವರಿಗೂ ಸೇರಿದ್ದಲ್ಲ ಎಂದು ಹೇಳಲಾಗಿದೆ.
2020ರಲ್ಲಿ ಅಮೆರಿಕದ ನಾಸಾ ಸಂಸ್ಥೆಯ ಚಂದ್ರಯಾನ ಯೋಜನೆಗಾಗಿ ಆರ್ಟೆಮಿಸ್ ಅಕಾರ್ಡ್ಸ್ ಎಂಬ ಸಂಸ್ಥೆಯನ್ನು ಹುಟ್ಟುಹಾಕಿತು. ಇದರ ಪ್ರಕಾರ ಚಂದ್ರನ ಅಂಗಳದಲ್ಲಿ ‘ಸುರಕ್ಷತಾ ವಲಯ’ ಸ್ಥಾಪಿಸುವ ಕುರಿತು ಉಲ್ಲೇಖಿಸಲಾಗಿದೆ. ಜತೆಗೆ ಅಂತರರಾಷ್ಟ್ರೀಯ ಬಾಹ್ಯಾಕಾಶ ಕಾನೂನು ರಚಿಸಲೂ ಪ್ರಯತ್ನ ನಡೆದಿದೆ. ಆದರೆ ಇದರಲ್ಲಿ ರಷ್ಯಾ ಮತ್ತು ಚೀನಾ ಇಲ್ಲ.
ಇದನ್ನೂ ಓದಿ: Chandrayaan-3ಕ್ಕೂ ಮೊದಲೇ ಚಂದ್ರನ ದಕ್ಷಿಣ ಧ್ರುವ ತಲುಪಲಿದೆ ರಷ್ಯಾದ ನೌಕೆ!
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.