ನೀಲಿಮಳೆ
Published 8 ಏಪ್ರಿಲ್ 2017, 19:30 IST
ನೀಲಿಮಳೆ
ಕಗ್ಗತ್ತಲ ಹಾದಿಯಲ್ಲಿ
ಬೆಳಕಿನೆಡೆಗೆ ಬೆರಳ ದೊಂದಿ
ತೋರಿಸುತ್ತಾ ನಿಂತೇ
ಇರುವ ಸಂತ
ಸಮಾನತೆಗಾಗಿ
ವ್ಯವಸ್ಥೆಯೊಡನೆ ಹೋರಾಡುತ್ತಲೇ
ಇರುವ ಸಂವಿಧಾನ
ಹುಟ್ಟಿಗೇ ಹುಣ್ಣು ಅಂಟಿ
ಮಾಯದ ಗಾಯವಾಗಿ
ನರಳುತ್ತಿದ್ದ ಜೀವಗಳಿಗೆ ಮದ್ದು
ತೋರಿದ ಸಂಜೀವಿನಿ
ಯುಗಾಂತರ ದಮನಿತ ಆದಿಮ
ಕಣ್ಣುಗಳಲ್ಲಿ ಉರಿಯುತ್ತಲೇ
ಇರುವ ಉಲ್ಕೆ
ದಿಕ್ಕೆಟ್ಟ ಸಾವಿರಾರು ನದಿಗಳಿಗೆ
ನೆಲೆಯಾದ ಸ್ವಾಭಿಮಾನದ
ಅನಂತ ಕಡಲು
ನೆಲದಮರೆಯ ಬೇರುಗಳಿಗೂ
ಬೆಳಕ ಕಾಣಿಸಿದ
ಕಪ್ಪು ಸೂರ್ಯ
ಶತ ಶತಮಾನ ಹೆಪ್ಪುಗಟ್ಟಿದ ದುಃಖ
ಊರು ಕೆರೆ ಗುಡಿಗಡಿಯಾಚೆ ಉಳಿದವರ
ಹಟ್ಟಿಮೊಹಲ್ಲಾಗಳ ಮೇಲೆ
ಕಡಲಹನಿ ಹೊತ್ತುತಂದು ಸುರಿದ
ನೀಲಿಮಳೆ
ಸನಾತನ ಸ್ಥಾವರಗಳ ಬಿರುಕಿನಲ್ಲಿ
ಚಿಗುರಿದ ಬೋಧಿವೃಕ್ಷ
ಬೇಲಿಸಾಲಿನ ಹೂಗಳ ತಂದು
ಬುದ್ಧನಿಗೆ ಅರ್ಪಿಸಿದ ಮಹಾಯಾನಿ
–ಹಂದಲಗೆರೆ ಗಿರೀಶ್
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.
