ಇಲಿಗಳು ಇದ್ದವು ಹಡಗಿನ ಒಳಗಡೆ,
ಹಡಗು ಮುಳುಗುತಿತ್ತು;
ಇಲಿಗಳ ಸಂಕಟ, ತಳಮಳ, ಕಂಟಕ
ಕಡಲಿಗೇನು ಗೊತ್ತು!
'ಕಡಲಿಗೆ ಹಾರಿ ಈಜುವುದೊಳಿತು'
ಹೇಳಿತು ಇಲಿಯೊಂದು;
'ಈಜಲು ತಿಳಿಯದು, ಮಾಡುವುದೇನು?'
ಕೇಳಿತು ಮತ್ತೊಂದು.
'ಬದುಕುವ ಯತ್ನವ ಮಾಡಿಯೆ ಸಿದ್ಧ'
ದೊಡ್ಡಿಲಿ ಕಡಲಿಗೆ ಧುಮುಕಿತ್ತು;
ಅಪ್ಪಿಲಿ ಅಮ್ಮಿಲಿ ಅಣ್ಣಿಲಿ ಸಣ್ಣಿಲಿ-
ಅರಿತವು ಒದಗಿದ ಆಪತ್ತು.
ಅಣ್ಣಿಲಿ ಬಾಲವ ಸಣ್ಣಿಲಿ ಹಿಡಿಯಿತು;
ಅಕ್ಕಿಲಿ ಬಾಲವ ತಮ್ಮಿಲಿ ಹಿಡಿಯಿತು;
ಅಪ್ಪಿಲಿ ಬಾಲವ ಅಮ್ಮಿಲಿ ಹಿಡಿಯಿತು;
ಬಾಲವೆ ಬಳ್ಳಿಯ ಹಾಗಿತ್ತು;
ಈಜುವ ಸಾಹಸ ನಡೆದಿತ್ತು.
ಉಕ್ಕುವ ಕಡಲಿನ ತೆರೆಗಳ ಮೇಲೆ
ಸವಾರಿ ಮಾಡಿತು ಇಲಿಸಾಲು;
ಬದುಕುವ ಛಲದಲಿ ಬಾಲವು ಸೇರಿ
ಜಯದಲಿ ಪಡೆಯಿತು ಸಮಪಾಲು
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.