ಹುಂಡಿಯಲ್ಲಿ ರದ್ದಾದ ಹಳೇ ನೋಟುಗಳು ಪತ್ತೆ

ಹುಬ್ಬಳ್ಳಿ: ನಗರದ ಸಿದ್ಧಾರೂಢಸ್ವಾಮಿ ಮಠದ ಕಾಣಿಕೆ ಪೆಟ್ಟಿಗೆಯಲ್ಲಿ ರದ್ದಾದ ಹಳೇ ನೋಟುಗಳು ಪತ್ತೆಯಾಗಿವೆ. ಮಠದ ಟ್ರಸ್ಟ್‌ನ ವ್ಯವಸ್ಥಾಪಕರು ಮತ್ತು ಸಿಬ್ಬಂದಿ ಸಮ್ಮುಖದಲ್ಲಿ ಇದೇ 17ರಂದು ಹುಂಡಿಯಲ್ಲಿ ಸಂಗ್ರಹವಾಗಿದ್ದ ಕಾಣಿಕೆ ಹಣವನ್ನು ಎಣಿಕೆ ಮಾಡುವಾಗ ₹1000ದ 15 ನೋಟುಗಳು ಮತ್ತು ₹500ರ 12 ಹಳೇ ನೋಟುಗಳು ಪತ್ತೆಯಾಗಿವೆ.

32 ದಿನದಲ್ಲಿ ₹14.23 ಲಕ್ಷ ಸಂಗ್ರಹವಾಗಿದ್ದು, ₹6,840 ಮೌಲ್ಯದ ಚಿನ್ನ–ಬೆಳ್ಳಿ ಪದಾರ್ಥಗಳು ಅದರಲ್ಲಿ ಇದ್ದವು. ಟ್ರಸ್ಟ್‌ ಅಧ್ಯಕ್ಷ ಧರಣೇಂದ್ರ ಜವಳಿ, ಉಪಾಧ್ಯಕ್ಷರಾದ ಜ್ಯೋತಿ ಸಾಲಿಮಠ, ಗೌರವ ಕಾರ್ಯದರ್ಶಿ ಎಸ್.ಜಿ. ಗೀತಾ, ಹಣಕಾಸು ಉಪ ಸಮಿತಿ ಕಾರ್ಯಾಧ್ಯಕ್ಷ ವೈ.ಎ. ದೊಡ್ಡಮನಿ, ಧರ್ಮದರ್ಶಿ ಎನ್.ಟಿ. ಮೆಹರವಾಡೆ, ಮಹೇಂದ್ರ ಸಿಂಘಿ, ವಾಸುದೇವ ಸಿದ್ದಪ್ಪ ಘೋಡಕೆ ಇದ್ದರು.