ಶ್ರೀರಾಂಪುರದಲ್ಲಿ ಶೈಲಾ ಮೋಹನ್ ಸುತ್ತಾಟ

ಬೆಂಗಳೂರು: ಚುನಾವಣೆಯ ಬಹಿ­ರಂಗ ಪ್ರಚಾರಕ್ಕೆ ಕೊನೆಯ ದಿನವಾದ ಮಂಗಳವಾರ ಕೇಂದ್ರ ಲೋಕಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಪಿ.ಸಿ.­ಮೋಹನ್‌ ಅವರ ಪತ್ನಿ ಶೈಲಾ ಮೋಹನ್‌ ನಗರದ ವಿವಿಧೆಡೆ ಬಿರುಸಿನ ಪ್ರಚಾರ ನಡೆಸಿದರು.

ಶಿವಾಜಿನಗರ, ಚಿಕ್ಕಪೇಟೆ, ಓಕಳಿ­ಪುರ, ಶ್ರೀರಾಂಪುರ,  ಬಡಾವಣೆಗಳಲ್ಲಿ ಪಾದಯಾತ್ರೆ  ನಡೆಸುವ ಮೂಲಕ ಮತದಾರರ ಗಮನ ಸೆಳೆದರು.

ಪ್ರಚಾರ ಕಾರ್ಯಕ್ಕಾಗಿ ಬೆಳಿಗ್ಗೆ 7ಕ್ಕೆ ಮನೆಯಿಂದ ಹೊರಟ ಶೈಲಾ ಮೋಹನ್‌ ಅವರು ನೇರವಾಗಿ ಶಿವಾಜಿ­ನಗರದ ಹಲವು ಬಡಾವಣೆ­ಗಳನ್ನು ಸುತ್ತಿ, ಮತದಾರರಿಗೆ ‘ಮೋಹನ್‌ಗೆ ಮತ ನೀಡಿ’ ಎಂದು ಮನವಿ ಮಾಡಿದರು.

ಅಚ್ಚ ಬಿಳಿಯ ಸಲ್ವಾರ್ ಕಮೀಜ್‌ಗೆ ಕೇಸರಿ ಬಣ್ಣದ ದುಪ್ಪಟ್ಟ ತೊಟ್ಟಿದ್ದ ಶೈಲಾ ಅವರ ಪ್ರಚಾರ ಕಾರ್ಯಕ್ಕೆ ಮಗಳು ಋತಿಕಾ ಜತೆಯಾದರು. ಇವರಿಬ್ಬರು  ಮಹಿಳಾ ಕಾರ್ಯಕರ್ತೆ­ಯರ ಜತೆಗೂಡಿ ಮನೆ ಮನೆಗೆ ಕರಪತ್ರಗಳನ್ನು ಹಂಚಿದರು.

9ಕ್ಕೆ ಮಲ್ಲೇಶ್ವರದಲ್ಲಿರುವ ‘ಶಾಂತಿ­ಸಾಗರ’ದಲ್ಲಿ ‘ಪುಲಾವ್‌’ ತಿಂದು, ಚಹಾ ಹೀರಿದರು.  ನಂತರ ಆಗಷ್ಟೆ ತೆರೆ­ದಿದ್ದ ಶಿವಾಜಿ ನಗರದ ಅಂಗಡಿ ಮುಂಗಟ್ಟುಗಳಲ್ಲಿ ಮತಯಾಚಿಸಿದರು.

ಬೆಳಿಗ್ಗೆ 11.30ರ ಸುಮಾರಿಗೆ ಶ್ರೀರಾಂಪುರದ ಕಿಷ್ಕಿಂಧೆಯಂತಹ ಗಲ್ಲಿ­ಗಲ್ಲಿ­ಗಳಲ್ಲಿ ಪ್ರಚಾರ ಕೈಗೊಂಡರು. ಆಟೊವೊಂದರಲ್ಲಿ ‘ಪಿ.ಸಿ.ಮೋಹನ್‌ ಅವರ ಪತ್ನಿ ಶೈಲಾ ಮೋಹನ್‌ ಅವರು ಮತ ಕೇಳಲು ಮನೆ–ಮನೆಗೆ ಬರು­ತ್ತಿದ್ದಾರೆ’ ಎಂದು ಧ್ವನಿವರ್ಧಕ ಮೂಲಕ

ಪ್ರಚಾರ ಮಾಡಲಾಯಿತು.  ಶೈಲಾ ಮೋಹನ್‌ ತಂಡ ಈ ಆಟೊವನ್ನು ಹಿಂಬಾಲಿಸಿತು.

ತಮಿಳು, ತೆಲುಗು ಸೇರಿದಂತೆ ಅನ್ಯ­ಭಾಷಿಕರು ಹೆಚ್ಚಿರುವ ಈ ಬಡಾವಣೆ­ಗಳಲ್ಲಿ ಶೈಲಾ ಅವರು ಕನ್ನಡದಲ್ಲಿಯೇ ಮತಯಾಚಿಸಿದರು.   ಮನೆ ಮಾತು ತೆಲುಗು ಆಗಿದ್ದರೂ  ಅಪ್ಪಟ ಕನ್ನಡದಲ್ಲಿ ಮಾತನಾಡಿ ಚಕಿತಗೊಳಿಸಿದರು. ‘ಮನೆ ಮಂದಿಯೆಲ್ಲ ಮೋಹನ್‌ಗೆ ಮತ ನೀಡಬೇಕು. ಈ ಬಾರಿಯೂ ಅವರಿಗೆ ಜನ ಸೇವೆ ಮಾಡುವ ಅವಕಾಶವನ್ನು ಒದಗಿಸಬೇಕು’ ಎಂದು ಮನವಿ ಮಾಡಿದರು.

ಮಧ್ಯಾಹ್ನ 3ರ ವರೆಗೂ ಓಕಳಿಪುರ ಬಡಾವಣೆಗಳು ಸೇರಿದಂತೆ ಚಿಕ್ಕಪೇಟೆ­ಯವರೆಗೂ ಕಾಲ್ನಡಿಗೆಯಲ್ಲಿ ಮನೆಗ-­ಳಿಗೆ ತೆರಳಿ ಭರ್ಜರಿ ಮತಯಾಚಿಸಿದರು. 

ನಂತರ ಶಿವಾನಂದ ವೃತ್ತದಲ್ಲಿರುವ ‘ರುಚಿ ರಿಚಿ’ಯಲ್ಲಿ ಸೇವ್‌ ಪೂರಿ ಹಾಗೂ ವಡಪಾವ್‌ ಸೇವಿಸಿ, ಪ್ರಚಾರಕ್ಕೆ ಅಂತ್ಯ ಹಾಡಿದರು.
ಇದೇ ಸಂದರ್ಭದಲ್ಲಿ  ‘ಪ್ರಜಾವಾಣಿ’ ಯೊಂದಿಗೆ ಮಾತನಾ­ಡಿದ ಅವರು, ‘ವಿಧಾನಸಭೆ ಹಾಗೂ ಲೋಕಸಭೆ ಚುನಾವಣೆಯ ಸಂದರ್ಭದಲ್ಲಿ ಮೋಹನ್‌ ಪರ ನಗರದಾದ್ಯಂತ ಪ್ರಚಾರ ಕೈಗೊಂಡಿದ್ದೇನೆ. ಇದೇನೂ ನನಗೆ ಹೊಸತಲ್ಲ. ಈ ಬಾರಿಯೂ  ಮೋಹನ್‌ ಬಹುಮತದಿಂದ ಆಯ್ಕೆಯಾಗುವ ತುಂಬು ವಿಶ್ವಾಸವಿದೆ’ ಎಂದು ಭರವಸೆ ವ್ಯಕ್ತಪಡಿಸಿದರು.

‘ಒಂದು ತಿಂಗಳಿನಿಂದ ನಗರದ ನಾನಾ ಕಡೆಗಳಲ್ಲಿ ಸುತ್ತಾಡಿದ್ದೇನೆ. ಮಹಿಳಾ  ಮತದಾರರು ಉತ್ತಮ ರೀತಿಯಲ್ಲಿ ಸ್ಪಂದಿಸಿದ್ದಾರೆ. ಪತಿ ರಾಜಕಾರಣದಲ್ಲಿರುವುದು ನನಗೆ ಹೆಚ್ಚಿನ ಸಂತೋಷ ತಂದಿದೆ’ ಎಂದು ತಿಳಿಸಿದರು.