ಅಪಾಯ: ಶಾಲೆಗಳಿಗೆ ಮಾರ್ಗಸೂಚಿ

ನವದೆಹಲಿ (ಪಿಟಿಐ): ಉಗ್ರರ ದಾಳಿ­ಯಂತಹ ತುರ್ತು ಸನ್ನಿವೇಶವನ್ನು ಯಾವ ರೀತಿಯಲ್ಲಿ ಎದುರಿಸಬೇಕು ಎನ್ನುವ ಬಗ್ಗೆ ದೇಶದಾದ್ಯಂತ ಶಾಲೆಗಳಿಗೆ ಸಮಗ್ರ ಮಾರ್ಗಸೂಚಿ ಕಳುಹಿಸಲಾಗಿದೆ.

ಪಾಕಿಸ್ತಾನದ ಪೆಶಾವರದ ಸೇನಾ ಶಾಲೆಯಲ್ಲಿ ತಾಲಿಬಾನ್‌ ಬಂಡು­ಕೋರರು ಮಕ್ಕಳ ಹತ್ಯಾಕಾಂಡ ನಡೆಸಿದ ಕಾರಣ ಸರ್ಕಾರ ಈ ಮುನ್ನೆಚ್ಚರಿಕೆ ಕ್ರಮಗಳನ್ನು ತೆಗೆದುಕೊಂಡಿದೆ. ಗೃಹ ಸಚಿವಾಲಯ ಈ ಮಾರ್ಗಸೂಚಿ ಹೊರಡಿಸಿದೆ.

ಅಪಹರಣ ಯತ್ನ, ಮನಬಂದಂತೆ ಗುಂಡಿನ ದಾಳಿ­ಯಂತಹ ಸನ್ನಿವೇಶವನ್ನು ಎದುರಿಸಲು ಮಕ್ಕಳು, ಶಿಕ್ಷಕರು ಹಾಗೂ ಭದ್ರತಾ ಸಿಬ್ಬಂದಿಗೆ ತರಬೇತಿ ಕೊಡಬೇಕು ಎಂದೂ ಹೇಳಲಾಗಿದೆ.

ಈ ಮಾರ್ಗಸೂಚಿಯನ್ನು  ಓದಿ ಶಾಲಾ ಸಿಬ್ಬಂದಿ ಹಾಗೂ ಶಿಕ್ಷರ ಗಮನಕ್ಕೆ ತರಬೇಕು. ಇದನ್ನು ಕಾರ್ಯ­ಗತಗೊಳಿ­ಸುವುದಕ್ಕೆ  ಸಮಗ್ರ ಕ್ರಿಯಾ ಯೋಜನೆ ಸಿದ್ಧಪಡಿಸಬೇಕು ಎಂದು ಶಾಲಾ ಪ್ರಾಂಶುಪಾಲರಿಗೆ ಸೂಚಿಸಲಾಗಿದೆ.

ಮಾರ್ಗಸೂಚಿಯಲ್ಲಿ ಏನಿದೆ?
*ಪ್ರತಿ ಶಾಲೆಯಲ್ಲೂ ಮೂರರಿಂದ ನಾಲ್ಕು ಗೇಟುಗಳನ್ನು ಒಳಗೊಂಡ ಕಾಂಕ್ರೀಟ್‌ ಕಾಂಪೌಂಡ್‌ ಇರಬೇಕು ಪ್ರತಿ ಗೇಟಿನಲ್ಲಿಯೂ ಮೂವರು ಭದ್ರತಾ ಸಿಬ್ಬಂದಿ ದಿನದ 24 ಗಂಟೆಯೂ ಕಾವಲು ಕಾಯಬೇಕು

*ಕಾಂಪೌಂಡ್‌ ಮೇಲಿನ ಕಬ್ಬಿಣದ ಗ್ರಿಲ್‌ ಮೇಲೆ ಮುಳ್ಳು ತಂತಿಗಳನ್ನು ಅಳವಡಿಸುವ ಬಗ್ಗೆ ಚಿಂತಿಸಬೇಕು

*ಶಾಲೆ ಅಧಿಕಾರಿಗಳ ಬಳಿ ಪೊಲೀಸ್‌ ನಿಯಂತ್ರಣ ಕೊಠಡಿ ಹಾಗೂ ಸ್ಥಳೀಯ ಪೊಲೀಸ್‌ ಠಾಣೆಯ ದೂರವಾಣಿ ಸಂಖ್ಯೆಯ ಮಾಹಿತಿ ಇರಬೇಕು

*ಶಾಲಾ ಕಾಂಪೌಂಡ್‌ ಗೋಡೆಗಳಲ್ಲಿ ಹಾಗೂ ಶಾಲೆಯ ಒಳಗೆ ಕೆಲವು ಕಡೆ ಸಿಸಿಟಿವಿಗಳನ್ನು ಅಳವಡಿಸಬೇಕು

*ಶಸ್ತ್ರಧಾರಿ ಉಗ್ರರು ಶಾಲೆಯೊಳಗೆ ಪ್ರವೇಶಿಸಿ ಶಿಕ್ಷಕರು, ವಿದ್ಯಾರ್ಥಿಗಳನ್ನು ಒತ್ತೆಯಿರಿಸಿಕೊಂಡಲ್ಲಿ ಕೂಡಲೇ ಪೊಲೀಸರಿಗೆ ಮಾಹಿತಿ ನೀಡಬೇಕು. ಶಿಕ್ಷಕರು ಹಾಗೂ ಮಕ್ಕಳು ತಾವಿರುವ ಸ್ಥಳದಲ್ಲಿಯೇ ಇರಬೇಕು. ಭಯದಿಂದ ಬಾಗಿಲ ಬಳಿಗೆ ಓಡಿಹೋಗಬಾರದು. ಒಳಗಿನಿಂದಲೇ ಬಾಗಿಲು ಹಾಕಿಕೊಂಡು  ಆದಷ್ಟೂ ನೆಲಮಟ್ಟಕ್ಕೆ ಬಾಗಿ ಗುಂಡಿನ ದಾಳಿಯಿಂದ ತಪ್ಪಿಸಿಕೊಳ್ಳಬೇಕು