ಗಂಡ ಸಿ.ಎಂ ಆದರೂ ಕೆಲಸ ಬಿಡಲ್ಲ

ಮುಂಬೈ: ಗಂಡ ರಾಜ್ಯದ ಮುಖ್ಯಮಂತ್ರಿ­ಯಾದರೂ ತನ್ನ ಕೆಲಸವನ್ನು ಬಿಡಲು ಇಷ್ಟಪಡುವುದಿಲ್ಲ ಎಂದು ಮಹಾರಾಷ್ಟ್ರ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್‌ ಅವರ ಪತ್ನಿ ಅಮೃತಾ ರಾನಡೆ ಫಡ್ನವೀಸ್‌ ಹೇಳಿದ್ದಾರೆ.

‘ಮಹಿಳೆಯರು ಸ್ವತಂತ್ರರಾಗಿರ­ಬೇಕು. ಈ ಹಂತಕ್ಕೆ ತಲುಪಲು ನಾನು ಬಹಳ ಕಷ್ಟಪಟ್ಟಿದ್ದೇನೆ’ ಎಂದು ನಾಗ­ಪುರ­­ದಲ್ಲಿ ಆ್ಯಕ್ಸಿಸ್‌ ಬ್ಯಾಂಕ್‌ನ ಸಹ ಉಪಾ­ಧ್ಯಕ್ಷೆ­ಯಾಗಿ­ರುವ ಅಮೃತಾ ಹೇಳಿ­ದ್ದಾರೆ. ಮುಂಬೈಗೆ ವರ್ಗಾ­ವಣೆ ಕೋರಿ ಅವರು ಈಗಾಗಲೇ ಮನವಿ­ಯನ್ನೂ ಸಲ್ಲಿಸಿ­ದ್ದಾರೆ. ‘ಫಡ್ನವೀಸ್‌ ಅವರಿಗೆ ಉತ್ತಮ ಜ್ಞಾನ ಇದೆ.

ಅವರು ವಿವಿಧ ವಿಷಯ­ಗಳನ್ನು ಅದರಲ್ಲೂ ವಿಶೇಷ­ವಾಗಿ ಬಜೆಟ್‌ ಸಂಬಂಧಿ ವಿಷಯಗಳನ್ನು ಅಧ್ಯ­ಯನ ಮಾಡುತ್ತಾರೆ. ಓದಿನ ಮೂಲಕ ಅವರು ತಮ್ಮ ಜ್ಞಾನವನ್ನು ಪರಿಷ್ಕರಿಸು­ತ್ತಲೇ ಇರು­ತ್ತಾರೆ. ಎಲ್ಲಕ್ಕಿಂತ ಹೆಚ್ಚಾಗಿ ಹಲವು ವರ್ಷಗಳಿಂದ ಭ್ರಷ್ಟಾಚಾರ­ದಿಂದ ನಲುಗಿ ಹೋಗಿ­ರುವ ಮಹಾ­ರಾಷ್ಟ್ರದ ಅಭಿ­ವೃದ್ಧಿಗೆ ಬೇಕಾದ ವ್ಯಕ್ತಿತ್ವ­ವನ್ನು ಅವರು ಹೊಂದಿ­ದ್ದಾರೆ’ ಎಂದು ಗಂಡನ ಬಗ್ಗೆ ಅಮೃತಾ ಹೇಳಿದ್ದಾರೆ.

ಮೊದಲ ದಿನದಿಂದಲೇ ಕೆಲಸಕ್ಕೆ ತೊಡಗಬೇಕು ಎಂಬುದು ಗಂಡನಿಗೆ ಅಮೃತಾ ನೀಡುವ ಸಲಹೆಯಾಗಿದೆ. ‘ಅವರು ತಪ್ಪು ಮಾಡುತ್ತಿದ್ದಾರೆ ಎಂದು ಅನಿಸಿದರೆ ಅವರನ್ನು ತಿದ್ದಲು ಹಿಂದೇಟು ಹಾಕುವುದಿಲ್ಲ’ ಎಂದೂ ಅಮೃತಾ ತಿಳಿಸಿದ್ದಾರೆ.