ವಲಸಿಗ ಸ್ನೇಹಿ ನೀತಿ

ಬೃಹತ್‌ ಬೆಂಗಳೂರು ಮಹಾನಗರಪಾಲಿಕೆಯಲ್ಲಿ (ಬಿಬಿಎಂಪಿ) ಹೊಸ ಸಹಾಯವಾಣಿ ಆರಂಭಿಸಿರುವುದು ಒಳ್ಳೆಯ ಬೆಳವಣಿಗೆ. ಇದರಿಂದ ದೂರು ನೀಡುವುದಕ್ಕೆ, ಕಸ ವಿಲೇವಾರಿ ಕುರಿತು ಮಾಹಿತಿ ಪಡೆಯುವುದಕ್ಕೆ ಸುಲಭವಾಗುತ್ತದೆ. ಆದರೆ ಹಿಂದೆ ಕನ್ನಡ ಹಾಗೂ ಇಂಗ್ಲಿಷ್‌ನಲ್ಲಿ ಮಾತ್ರ ಇದ್ದ ಸಹಾಯವಾಣಿಯನ್ನು ಈಗ ಹಿಂದಿ, ತಮಿಳು, ತೆಲುಗು ಹಾಗೂ ಮಲಯಾಳಂ ಭಾಷೆಗಳಲ್ಲಿ ಕೊಡಲು ಯೋಜಿಸಲಾಗಿದೆ.

ಈ ಸಹಾಯವಾಣಿಯನ್ನು ಬಳಸುವ ಬಹುಪಾಲು ಮಂದಿ ಕನ್ನಡದವರು. ಆದ್ದರಿಂದ ಕನ್ನಡದಲ್ಲಿ ಸೇವೆ ನೀಡುವುದು ಸರಿ. ಹಾಗೆಯೇ ಇತರ ಭಾಷಿಕರಿಗೆ ಇಂಗ್ಲಿಷ್‌ನಲ್ಲಿ ಮಾಹಿತಿ ಕೊಡುವುದು ಸಾಕಲ್ಲವೇ? ಪರಭಾಷಿಗರು ಕರ್ನಾಟಕಕ್ಕೆ ಬಂದಾಗ ಅವರಿಗೆ ಕನ್ನಡ ಕಲಿಸಿ ಮುಖ್ಯವಾಹಿನಿಗೆ ತರಬೇಕಾದ ನಮ್ಮ ಸರ್ಕಾರವೇ ಅವರವರ ಭಾಷೆಯಲ್ಲಿ ಸೇವೆ ಕೊಟ್ಟರೆ ಅವರೆಲ್ಲ ಕನ್ನಡ ಕಲಿಯುವುದಾದರೂ ಹೇಗೆ?

ಬೇರೆ ರಾಜ್ಯಗಳಿಗೆ ವಲಸೆ ಹೋಗಿರುವ ಕನ್ನಡಿಗರಿಗೆ ಅಲ್ಲಿ ಕನ್ನಡದಲ್ಲಿ ಸೇವೆ ಸಿಗುತ್ತಿದೆಯೇ? ಹೆಚ್ಚು ವಲಸಿಗರು ಇರುವ ಮುಂಬೈ ಹಾಗೂ ದೆಹಲಿಯಲ್ಲೂ ಇಷ್ಟೊಂದು ಭಾಷೆಗಳಲ್ಲಿ ಸೇವೆ ಸಿಗುವುದು ಕಾಣುವುದಿಲ್ಲ. ಇನ್ನಾದರೂ ರಾಜ್ಯ ಸರ್ಕಾರ ಇಂತಹ ‘ವಲಸಿಗ ಸ್ನೇಹಿ’ ಯೋಜನೆಗಳನ್ನು ಕೈಬಿಟ್ಟು ಪರಭಾಷಿಗರನ್ನು ಕರ್ನಾಟಕದ ಮುಖ್ಯವಾಹಿನಿಗೆ ತರುವ ಕೆಲಸ ಮಾಡಲಿ.