ಮಸಾಜ್ ಮಾಡ್ತಾವೆ ಹಾವುಗಳು

ದೇಹ ತುಂಬಾ ದಣಿವಾದಾಗ ಸ್ಪಾಗೆ ಹೋಗಿ ಮಸಾಜ್‌ ಮಾಡಿಸಿಕೊಂಡು ದಣಿವಾರಿಸಿಕೊಳ್ಳುವುದು ಈಗ ಸಾಮಾನ್ಯ. ಆದರೆ ಹಾವುಗಳಿಂದ ಮಸಾಜ್‌ ಮಾಡಿಸಿಕೊಂಡರೆ ಹೇಗಿರಬಹುದು?

ಅಂಥಾದ್ದೊಂದು ಅನುಭವ ಪಡೆಯುವ ಆಸೆಯಿದ್ದರೆ ಇಂಡೊನೇಷ್ಯಾ ಮತ್ತು ಫಿಲಿಪ್ಪೀನ್ಸ್‌ಗೆ ಹೋಗಿಬನ್ನಿ. ಇಂಡೋನೇಷ್ಯಾದ ಮಸಾಜ್‌ ಪಾರ್ಲರ್‌ಗಳಲ್ಲಿ ಮತ್ತು ಫಿಲಿಪ್ಪೀನ್ಸ್‌ನ ಸಿಬು ಸಿಟಿ ಮೃಗಾಲಯದಲ್ಲಿ ಗ್ರಾಹಕರು ಹಾವುಗಳಿಂದ ಮಸಾಜ್‌ ಮಾಡಿಸಿಕೊಳ್ಳುತ್ತಾರೆ.

ವಿಷಮುಕ್ತವಾದ ಈ ಹಾವುಗಳು ದೇಹದೆಲ್ಲೆಡೆ ಹರಿದಾಡುವುದರಿಂದ ಕೆಲವೇ ನಿಮಿಷಗಳಲ್ಲಿ ದಣಿವಾರಿಸಿಕೊಂಡು, ವಿಶ್ರಾಂತಿ ಪಡೆಯುತ್ತಾರೆ. ನೋವು ನಿವಾರಣೆಗೂ ಈ ಮಸಾಜ್ ಸಹಕಾರಿಯಾಗಿದೆ. ದೇಹ ಮತ್ತು ಮನಸ್ಸಿಗೆ ವಿಶ್ರಾಂತಿ ನೀಡುವ ಈ ಅನನ್ಯ ಅನುಭವಕ್ಕಾಗಿ ಜನರು ಸಾಲುಸಾಲಾಗಿ ನಿಲ್ಲುತ್ತಾರಂತೆ.

ಪಂಜರದಲ್ಲಿರುವ ಹೆಬ್ಬಾವುಗಳನ್ನು ಹೊರತೆಗೆದು, ಮೊದಲು ಗ್ರಾಹಕರ ಕಾಲಿನ ಮೇಲೆ ಹರಿಬಿಡುತ್ತಾರೆ. ನಂತರ ಬಿದಿರು ಹಾಸಿನ ಮೇಲೆ ಮಲಗಿಸಿ, ಮೈಮೇಲೆ ಬಗೆಬಗೆಯ ಹಾವುಗಳನ್ನು ಬಿಡುತ್ತಾರೆ. 250 ಕೆ.ಜಿ. ತೂಕದ ಹಾವುಗಳನ್ನು ಬಿಟ್ಟುಕೊಳ್ಳುವವರೂ ಇದ್ದಾರೆ. ಹಾವುಗಳು ದೇಹದ ಮೇಲೆ ನಿಧಾನಗತಿಯಲ್ಲಿ ಚಲಿಸುತ್ತವೆ. ಈ ಚಲನೆ ಮನುಷ್ಯನನ್ನು ಶಾಂತ ಸ್ಥಿತಿಗೆ ತರುತ್ತದೆ ಎಂಬುದು ಮಸಾಜ್‌ ಮಾಡಿಸಿಕೊಳ್ಳುವವರ ನಂಬಿಕೆ.