ಹತ್ತಿ ಉತ್ಪಾದನೆ ಇಳಿಕೆ ಸಂಭವ

ನವದೆಹಲಿ: 2019ರ ಹತ್ತಿ ವರ್ಷದಲ್ಲಿ (ಅಕ್ಟೋಬರ್‌–ಸೆಪ್ಟೆಂಬರ್‌) ಬಿತ್ತನೆ ಪ್ರದೇಶದಲ್ಲಿ ಇಳಿಕೆಯಾಗಿದೆ. ಇದರಿಂದಾಗಿ ಉತ್ಪಾದನೆ ತಗ್ಗಲಿದ್ದು ಬೆಲೆಯಲ್ಲಿ ಶೇ 10ರಷ್ಟು ಏರಿಕೆಯಾಗುವ ಅಂದಾಜು ಮಾಡಲಾಗಿದೆ.

ರೇಟಿಂಗ್ಸ್‌ ಸಂಸ್ಥೆ ‘ಇಕ್ರಾ’ ನೀಡಿರುವ ವರದಿಯ ಪ್ರಕಾರ, 2018ರ ಹತ್ತಿ ವರ್ಷದಲ್ಲಿ 122 ಲಕ್ಷ ಹೆಕ್ಟೇರ್‌ಗಳಲ್ಲಿ ಹತ್ತಿ ಬಿತ್ತನೆ ಕಾರ್ಯ ನಡೆದಿತ್ತು. ಆದರೆ 2019ರ ಬೆಳೆ ವರ್ಷದಲ್ಲಿ 114 ಲಕ್ಷ ಹೆಕ್ಟೇರ್‌ ಪ್ರದೇಶಗಳಲ್ಲಿ ಮಾತ್ರವೇ ಬಿತ್ತನೆಯಾಗಿದೆ.

2018ರಲ್ಲಿ 3.6 ಕೋಟಿ ಬೇಲ್ಸ್‌ನಷ್ಟು (ಒಂದು ಬೇಲ್ಸ್‌ 170 ಕೆ.ಜಿ) ಹತ್ತಿ ಉತ್ಪಾದನೆ ಆಗಲಿದೆ ಎಂದು ಭಾರತೀಯ ಹತ್ತಿ ಉತ್ಪಾದಕರ ಒಕ್ಕೂಟ ಹೇಳಿದೆ. ಇದಕ್ಕೆ ಹೋಲಿಸಿದರೆ ಈ ಬಾರಿ 3.5 ಕೋಟಿ ಬೇಲ್ಸ್‌ನಷ್ಟು ಮಾತ್ರವೇ ಉತ್ಪಾದನೆ ಆಗಲಿದೆ ಎಂದು ‘ಇಕ್ರಾ’ ತಿಳಿಸಿದೆ.

ಪಂಜಾಬ್‌, ಹರಿಯಾಣ ಮತ್ತು ರಾಜಸ್ಥಾನ ಭಾಗಗಳಲ್ಲಿ ಹತ್ತಿ ಬಿತ್ತೆ ಕಾರ್ಯ ನಿಧಾನಗತಿಯಲ್ಲಿ ಆರಂಭವಾಗಿದೆ ಎಂದು ಮಾಹಿತಿ ನೀಡಿದೆ.