5.91 ಲಕ್ಷ ರೂ ದರೋಡೆ

ಶಹಾಬಾದ: ಇಲ್ಲಿನ ರೈಲ್ವೆ ನಿಲ್ದಾಣದ ಬಳಿಯ ಸ್ಟೇಟ್ ಬ್ಯಾಂಕ್ ಆಫ್ ಹೈದ್ರಾಬಾದ್‌ನ ಎ.ಟಿ.ಎಂ.ನಿಂದ ಮಂಗಳವಾರ ನಸುಕಿನ ಜಾವದಲ್ಲಿ ಸುಮಾರು 5.91 ಲಕ್ಷ ರೂಪಾಯಿ  ದರೋಡೆ ನಡೆದ ಘಟನೆ ಜರುಗಿದೆ.

ದುಷ್ಕರ್ಮಿಗಳು ಎ.ಟಿ.ಎಂ. ಯಂತ್ರವನ್ನು ಒಡೆದು ಹಣ ಕದ್ದಿದ್ದಾರೆ. ಬೆಳಿಗ್ಗೆ ಬ್ಯಾಂಕ್ ಅಧಿಕಾರಿಗಳಿಗೆ ಈ ವಿಷಯ ಗೊತ್ತಾಗಿ ತಕ್ಷಣವೆ ವಾಡಿ ರೈಲ್ವೆ ಪೊಲೀಸರಿಗೆ ದೂರು ನೀಡಿದ್ದಾರೆ.  ರೈಲ್ವೆ ನಿಲ್ದಾಣದ ಬಳಿ ಸದಾಕಾಲ ಜನಜಂಗುಳಿ ಇರುತ್ತದೆ.

ಆದರೂ ಈ ದರೋಡೆ ಸಾರ್ವಜನಿಕರಲ್ಲಿ ಅಚ್ಚರಿ ಮೂಡಿಸಿದೆ. ಕೆಲ ತಿಂಗಳ ಹಿಂದೆ ಎ.ಟಿ.ಎಂ. ಗಾಜು ಒಡೆದು ವಿಕಾರಗೊಳಿಸಲಾಗಿತ್ತು.

ಎಟಿಎಂಒಳಗಡೆ ಬೀಡಿ, ಸಿಗರೇಟು ಸೇದುವುದು, ಗುಟಕಾ ತಿಂದು ಉಗುಳುವ ಚಟುವಟಿಕೆಗಳು ನಡೆದಿದ್ದರೂ ಭದ್ರತಾ ಸಿಬ್ಬಂದಿಯನ್ನು ನೇಮಿಸಿರಲಿಲ್ಲ. ವಾಡಿ ರೈಲ್ವೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.