ಸಿರುಗುಪ್ಪ | ಹದಗೆಟ್ಟ ರಾಷ್ಟ್ರೀಯ ಹೆದ್ದಾರಿ: ತೊಂದರೆ

ಸಿರುಗುಪ್ಪ: ನಗರದ ರಾಷ್ಟ್ರೀಯ ಹೆದ್ದಾರಿ ಹದಗೆಟ್ಟು ಪ್ರಯಾಣಿಕರು ಓಡಾಡದ ಪರಿಸ್ಥಿತಿ ನಿರ್ಮಾಣವಾಗಿದೆ. ಮಳೆಗಾಲದಲ್ಲಿ ಗುಂಡಿಗಳ ನರ್ತನ, ಬೇಸಿಗೆಯಲ್ಲಿ ಧೂಳಿನ ಮಜ್ಜನ ಎಂಬಂತಾಗಿದೆ. ಜನರು ನಿತ್ಯ ಸಂಚಾರಕ್ಕೆ ಪರದಾಡುವಂತಾಗಿದೆ.

ವೈಷ್ಣವಿ ಹೋಟೆಲ್, ಬಸ್ ಡಿಪೋ, ಕೋರ್ಟ್, ಬಜಾಜ್ ಶೋರೂಮ್, ಎಪಿಎಂಸಿ, ಶಿವಶಕ್ತಿ ಕಲ್ಯಾಣ ಮಂಟಪ, ಟ್ರೆಂಡ್ಸ್, ಗ್ರಾಮೀಣ ಬ್ಯಾಂಕ್, ಪೊಲೀಸ್ ಠಾಣೆಯ, ಮಹಾತ್ಮ ಗಾಂಧೀಜಿ ವೃತ್ತ, ನಗರಸಭೆ, ಅಂಬೇಡ್ಕರ್ ವೃತ್ತ, ಬಾಬು ಜಗಜೀವನ್ ರಾಂ ವೃತ್ತ, ಟಿಪ್ಪು ಸುಲ್ತಾನ್ ವೃತ್ತ, ಅಂಕಲಿ ಮಠದ ಮುಂದೆ 1ರಿಂದ2 ಅಡಿಗಳಷ್ಟು ತಗ್ಗು ನಿರ್ಮಾಣವಾಗಿದ್ದು, ದಾರಿ ಹುಡುಕುತ್ತಾ ಪ್ರಯಾಣ ನಡೆಸುವಂತಹ ಸ್ಥಿತಿ ಉದ್ಭವಿಸಿದೆ.

ಮಳೆಯ ನೀರು ಗುಂಡಿಯಲ್ಲಿ ತುಂಬಿಕೊಂಡು ರಸ್ತೆಯಲ್ಲಿ ಹೊಂಡಗಳ ನಿರ್ಮಾಣದಿಂದ ವಾಹನ ಸವಾರರು ರಸ್ತೆ ದಾಟಲು ಹರಸಾಹಸ ಪಡುವಂತಾಗಿದೆ. ಬೈಕ್ ಸವಾರರು ಬಿದ್ದು ಕೈಕಾಲು ಮುರಿದುಕೊಳ್ಳುವುದು ನಿತ್ಯ ಸಾಮಾನ್ಯ ಎನ್ನುವಂತಾಗಿದೆ. ಅಪಘಾತಗಳು ಸಂಭವಿಸಿದ ನಿದರ್ಶನಗಳೂ ಸಾಕಷ್ಟಿವೆ. 

ತಾಲ್ಲೂಕಿನ ಇಬ್ರಾಹಿಂಪುರ ಗ್ರಾಮದ ಮಾರೆಮ್ಮ ದೇವಸ್ಥಾನದಿಂದ ಹಳೆಕೋಟೆ ಗ್ರಾಮದ ಮಾರೆಮ್ಮ ದೇವಸ್ಥಾನದವರೆಗೆ ಕಳೆದ 2, 3 ವರ್ಷಗಳಿಂದ ₹130ಕೋಟಿ ವೆಚ್ಚದಲ್ಲಿ ರಾಷ್ಟ್ರೀಯ ಹೆದ್ದಾರಿ ಕಾಮಗಾರಿಯು ಆಮೆಗತಿಯಲ್ಲಿ ಸಾಗಿದೆ. ಭತ್ತದ ನಾಡು ಎಂದು ಪ್ರಸಿದ್ಧಿ ಪಡೆದ ತಾಲ್ಲೂಕು ಕೇಂದ್ರಕ್ಕೆ ರಾಜ್ಯ ಮತ್ತು ಅಂತರರಾಜ್ಯದಿಂದ ನಿತ್ಯ ನೂರಾರು ಭತ್ತ ಮತ್ತು ಅಕ್ಕಿಯ ಸರುಕು ತುಂಬಿದ ಭಾರಿ ಗಾತ್ರದ ವಾಹನಗಳು ಓಡಾಟದಿಂದಾಗಿ ರಸ್ತೆಯು ಸಂಪೂರ್ಣ ಹಾಳಾಗಿದೆ.

ರಾಷ್ಟ್ರೀಯ ಹೆದ್ದಾರಿ ಅಧಿಕಾರಿಗಳು ತಾತ್ಕಾಲಿಕವಾಗಿ ಗುಂಡಿಗಳನ್ನು ಮುಚ್ಚಲು ಕಲ್ಲು ಸಿಮೆಂಟ್ ಮಿಶ್ರಿತ ಮಣ್ಣನ್ನು ತಗ್ಗುಗಳಿಗೆ ತುಂಬಿಸಿದ್ದಾರೆ. ಇದರಿಂದ ವಾಹನಗಳು ಸಂಚರಿಸುವಾಗ ವಿಪರೀತ ಧೂಳು ಏಳುತ್ತಿದೆ. ತಾಲ್ಲೂಕು ಕೇಂದ್ರದಿಂದ ರಾಜ್ಯ ಮತ್ತು ಅಂತರರಾಜ್ಯಗಳಿಗೆ ಸಂಪರ್ಕ ಕಲ್ಪಿಸುವ ರಾಷ್ಟ್ರೀಯ ಹೆದ್ದಾರಿಯಾಗಿದೆ. ನೂರಾರು ಅಕ್ಕಿಗಿರಣಿಗಳಿಗೆ ಸಾವಿರಾರು ಕೂಲಿ ಕಾರ್ಮಿಕಕರು ಕೆಲಸ ಕಾರ್ಯಗಳಿಗೆ ದ್ವಿಚಕ್ರ ವಾಹನಗಳಲ್ಲಿ ಸಂಚಾರ ನಡೆಸುತ್ತಿದ್ದಾರೆ.

ಸಿರುಗುಪ್ಪ ನಗರದ ರಾಷ್ಟ್ರೀಯ ಹೆದ್ದಾರಿ ಮುಕ್ತಿ ಯಾವಾಗ ಎಂದು ನಿತ್ಯ ಸಾವಿರಾರು ಜನರು ಅಧಿಕಾರಿಗಳಿಗೆ ಹಾಗೂ ಜನಪ್ರತಿನಿಧಿಗಳಿಗೆ ಹಿಡಿ ಶಾಪ ಹಾಕುತ್ತಿದ್ದಾರೆ.