ಕೃಷ್ಣೆ, ಉಪನದಿ: ನೀರಿನ ಮಟ್ಟ ಏರಿಕೆ

ಚಿಕ್ಕೋಡಿ: ಮಹಾರಾಷ್ಟ್ರದ ಘಟ್ಟ ಪ್ರದೇಶದಲ್ಲಿ ಮಳೆ ಪ್ರಮಾಣ ಮತ್ತೆ ಹೆಚ್ಚಾಗಿದ್ದರಿಂದ ಗುರುವಾರ, ಚಿಕ್ಕೋಡಿ ಉಪ ವಿಭಾಗ ವ್ಯಾಪ್ತಿಯ ಕೃಷ್ಣಾ ಹಾಗೂ ಉಪನದಿಗಳಲ್ಲಿ ಒಂದು ಅಡಿಯಷ್ಟು ನೀರಿನ ಪ್ರಮಾಣ ಏರಿಕೆಯಾಗಿದೆ.

ಮಹಾರಾಷ್ಟ್ರದ ಕೃಷ್ಣಾ ಜಲಾನಯನ ಪ್ರದೇಶ ಮಹಾಬಳೇಶ್ವರದಲ್ಲಿ 12.4 ಸೆಂ.ಮೀ, ನವಜಾದಲ್ಲಿ 7.3 ಸೆಂ.ಮೀ, ಕೊಯ್ನಾದಲ್ಲಿ 9 ಸೆಂ.ಮೀ. ಮಳೆ ದಾಖಲಾಗಿದೆ.

ಮಹಾರಾಷ್ಟ್ರದ ಕೊಲ್ಹಾಪುರ ಜಿಲ್ಲೆಯ ರಾಜಾಪೂರೆ ಬ್ಯಾರೇಜಿನಿಂದ ಕೃಷ್ಣಾ ನದಿಗೆ 74,292 ಕ್ಯೂಸೆಕ್ ನೀರಿನ ಹರಿವಿದ್ದು, ಸದಲಗಾ ಬಳಿಯ ದೂಧಗಂಗಾ ನದಿಯಲ್ಲಿ 17,600 ಕ್ಯೂಸೆಕ್ ಹೊರಹರಿವು ಇದೆ. ತಾಲ್ಲೂಕಿನ ಕಲ್ಲೋಳ–ಯಡೂರ ಸೇತುವೆ ಬಳಿ ಕೃಷ್ಣಾ ನದಿಯಲ್ಲಿ 91,892 ಕ್ಯೂಸೆಕ್ ಹೊರಹರಿವು ಇದೆ. ಬುಧವಾರಕ್ಕೆ ಹೋಲಿಸಿದರೆ 1,459 ಕ್ಯೂಸೆಕ್ ಹೊರ ಹರಿವು ಹೆಚ್ಚಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.