ಶೃಂಗೇರಿ: ಧಾರಾಕಾರ ಮಳೆ, ವಿದ್ಯುತ್‌ ವ್ಯತ್ಯಯ

ಶೃಂಗೇರಿ: ತಾಲ್ಲೂಕಿನ ಪಟ್ಟಣ ಮತ್ತು ಗ್ರಾಮೀಣ ಭಾಗದಲ್ಲಿ ಸೋಮವಾರ ಆಲಿಕಲ್ಲು ಸಹಿತ ಧಾರಾಕಾರ ಮಳೆಯಾಗಿದೆ.

ರಭಸದ ಗಾಳಿಯಿಂದ ಹಲವು ಕಡೆ ಅಡಿಕೆ, ತೆಂಗಿನ ಮರಗಳು ನೆಲಕ್ಕೆ ಉರುಳಿದೆ. ಮನೆಯ ಮೇಲೆ ಮರಗಳು ಬಿದ್ದು, ಮನೆಗಳಿಗೆ ಹಾನಿ ಸಂಭವಿಸಿದೆ.

15ಕ್ಕೂ ಹೆಚ್ಚು ವಿದ್ಯುತ್ ಕಂಬಗಳು ಧರೆಗುರುಳಿವೆ. ಕೆಲವು ಕಡೆ ವಿದ್ಯುತ್ ತಂತಿಯ ಮೇಲೆ ಮರ ಬಿದ್ದು, ತಂತಿ  ತುಂಡಾಗಿದೆ. ಕೊಚ್ಚವಳ್ಳಿ, ಗುಂಡ್ರೇ, ಹಾಲಂದೂರು, ಹೊನ್ನವಳ್ಳಿ, ಮಸಿಗೆ, ಹುಲಗಾರು ಸಮೀಪ ಮರಗಳು ಬಿದ್ದಿವೆ. ಕಚಿಗೆಯಲ್ಲಿ  33 ಕೆ.ವಿ ವಿದ್ಯುತ್ ತಂತಿಯ ಮೇಲೆ ಮರ ಬಿದ್ದು ವಿದ್ಯುತ್ ವ್ಯತ್ಯಯ ಉಂಟಾಗಿದೆ.