ಆಸ್ತಿ ಮಾಲೀಕರಿಗೆ ಬಿ ಖಾತಾ ವಿತರಣೆ

ಕಲಘಟಗಿ: ನಿವೇಶನ ಹಾಗೂ ಕಟ್ಟಡಗಳನ್ನು ಹೊಂದಿರುವ ಆಸ್ತಿ ಮಾಲೀಕರಿಗೆ ಮತ್ತು ಅನುಭೋಗದಾರರಿಗೆ ಪಟ್ಟಣ ಪಂಚಾಯಿತಿಯಿಂದ ಬಿ ಖಾತಾ ಉತಾರಗಳನ್ನು ವಿತರಣೆ ಮಾಡಲಾಯಿತು.

ಪಟ್ಟಣ ಪಂಚಾಯಿತಿ ಸಭಾಭವನದಲ್ಲಿ ಬುಧವಾರ ಹಮ್ಮಿಕೊಳ್ಳಲಾದ ಸಾಮಾನ್ಯ ಸಭೆಯಲ್ಲಿ ಸಾಂಕೇತಿಕವಾಗಿ ಉತಾರ ವಿತರಿಸಲಾಯಿತು.

ಅಧ್ಯಕ್ಷೆ ಶಿಲ್ಪಾ ಪಾಲ್ಕರ ಮಾತನಾಡಿ, ‘1976ಕ್ಕಿಂತ ಮೊದಲು ಬಿನ್‍ಶೇತ್ಕಿಯಾದ (ಭೂ ಪರಿವರ್ತನೆ) ನಿವೇಶನಗಳಿಗೆ ಎ ಖಾತಾ ನಮೂನೆ–3 ನೀಡಲಾಗುತ್ತದೆ. 1976ರ ನಂತರ ಬಿನ್‍ಶೇತ್ಕಿಯಾದ ಭೂಮಿಯಲ್ಲಿ ನಗರ ಯೋಜನಾ ಇಲಾಖೆಯಿಂದ ಅನುಮೋದನೆ ಪಡೆಯದೆ ನಿವೇಶನ, ಕಟ್ಟಡ ನಿರ್ಮಿಸಿದ ಗ್ರಾಹಕರಿಗೆ ಬಿ ಖಾತಾ ಮಾಡಿಕೊಳ್ಳಲು ಸುವರ್ಣ ಅವಕಾಶವಿದೆ’ ಎಂದರು.

ಮುಖ್ಯಾಧಿಕಾರಿ ಬಿ. ಚಂದ್ರಶೇಖರ ಮಾತನಾಡಿ, ‘ಬಾಕಿ ಉಳಿದ ಬಿ ಖಾತಾಗಳನ್ನು ಆದ್ಯತೆಯ ಮೇಲೆ ನೀಡಲಾಗುವುದು’ ಎಂದು ತಿಳಿಸಿದರು.

‘ಪಟ್ಟಣದಲ್ಲಿ 400 ಬಿ ಖಾತಾ ದಾಖಲೆಗಳಿದ್ದು, ಅವುಗಳ ಪೈಕಿ 275 ಅರ್ಜಿಗಳು ಸ್ವೀಕೃತವಾಗಿದ್ದವು. ಅದರಲ್ಲಿ ನಮೂನೆ 3–ಎ ಅಡಿ 103 ಬಿ ಖಾತಾಗಳನ್ನು ಪ್ರಾರಂಭಿಕ ಹಂತದಲ್ಲಿ ಸ್ಥಿರಗೊಳಿಸಲಾಗಿದೆ’ ಎಂದರು.