ಸೂತಕದ ಮನೆಯಾದ ಹಾಬಾಳ(ಟಿ) ಗ್ರಾಮ

ಸೇಡಂ: ತಾಲ್ಲೂಕಿನ ಹಾಬಾಳ(ಟಿ) ಗ್ರಾಮವು ಎರಡು ದಿನಗಳಿಂದ ಸೂತಕದ ಮನೆಯಂತಾಗಿದ್ದು, ದುರಂತದ ಆಘಾತದಿಂದ ಇನ್ನೂ ಹೊರಬಂದಿಲ್ಲ. ಮಕ್ಕಳನ್ನು ಕಳೆದುಕೊಂಡವರ ದುಃಖ, ರೋಧನೆ, ಕಣ್ಣೀರು ಒರೆಸಿ ಸಮಾಧಾನ ಪಡಿಸುತ್ತಿರುವ ದೃಶ್ಯಗಳು ಶೋಕವನ್ನು ಇಮ್ಮಡಿಗೊಳಿಸುವಂತಿವೆ.

ಚಿಕ್ಕವರಿಂದ ಹಿಡಿದು, ಹಿರಿಯರವರೆಗೆ ಎಲ್ಲರೂ ಕಣ್ಣೀರು ಹಾಕಿ ದುಃಖ ವ್ಯಕ್ತಪಡಿಸಿದರು. ಹಲವು ಮನೆಯಲ್ಲಿ ಅಡುಗೆ ಮಾಡದೆ, ಮೃತ ಕುಟುಂಬದ ದುಃಖದಲ್ಲಿ ಕಣ್ಣೀರಾದರು.

‘ನಮ್ಮೂರಿಗೆ ಇಂಥ ಪರಿಸ್ಥಿತಿ ಬರಬಾರದಿತ್ತು...ಅಂತ ಹಣೆಯನ್ನು ನೆಲಕ್ಕೊತ್ತಿ ತಾಯಂದಿರು ಚಚ್ಚಿಕೊಂಡ ದೃಶ್ಯವು ಕಣ್ಣಾಲಿಗಳನ್ನು ತೇವಗೊಳಿಸಿತು. ಊರಿಗೆ ಬಂದವರೆಲ್ಲ ಬೈಕ್ ಮೇಲೆ ನಾಲ್ಕು ಹುಡುಗ್ರು ಸಾಯೋದಾ! ಮರುಕ ವ್ಯಕ್ತಪಡಿಸಿದರು. ಸಾಯೋ ವಯಸ್ಸೇನ್ರಿ ಅವರದ್ದು ಎಂಬುದು ಇನ್ನು ಹಲವರ ಮಾತು.

ಮೃತ ಯುವಕರ ತಾಯಿ-ತಂದೆ, ತಂಗಿ, ಅಕ್ಕ, ಚಿಕ್ಕಮ್ಮ, ದೊಡ್ಡಮ್ಮ... ಹೀಗೆ ಸಂಬಂಧಿಕರ ಆಕ್ರಂದನ ಗ್ರಾಮದಲ್ಲಿ ಮುಗಿಲು ಮುಟ್ಟಿತ್ತು. ಯಾಕ್‌ ಹೀಗ್ ಮಾಡಿದಿ ಮಗಾ, ಮನಿಗೆ ಬರ್ತಿನಿ ಅಂದಿದ್ದೆಲ್ಲೋ.. ಎಂಬ ತಾಯಂದಿರ ದುಃಖದ ನುಡಿಗಳು ನೆರೆದವರ ಕರುಳನ್ನು ಹಿಂಡುವಂತಿದ್ದವು.

ಮದುವೆ ಆಗಿಲ್ಲ: ಬೈಕ್ ಅಪಘಾತದಲ್ಲಿ ಮೃತಪಟ್ಟ ನಾಲ್ವರಿಗೂ ಮದುವೆಯಾಗಿರಲಿಲ್ಲ. ಎಲ್ಲರೂ 20ರ ಆಸುಪಾಸಿನ ಯುವಕರು. ಜೀವನದ ಸತ್ವವನ್ನು ಅರಿಯದವರು. ಪಿಯುಸಿ ಮುಗಿಸಿ ಕೂಲಿ ಕೆಲಸ ಮಾಡಿಕೊಂಡು ಉಪಜೀವನ ಮಾಡುತ್ತ, ಕುಟುಂಬಕ್ಕೆ ಆಸರೆಯಾಗಿದ್ದರು. ಉನ್ನತ ಶಿಕ್ಷಣ ದೂರವಾಗಿತ್ತು.

ಕಂಬನಿ ಮಿಡಿದ ಶಿಕ್ಷಕರು: ಮೃತ ಯುವಕರ ಕುಟುಂಬಕ್ಕೆ ಗ್ರಾಮದ ಸರ್ಕಾರಿ ಪ್ರೌಢಶಾಲೆ ಮುಖ್ಯಶಿಕ್ಷಕಿ ಆರತಿ ಬಳಗಾರ ಸೇರಿದಂತೆ ಶಾಲಾ ಸಿಬ್ಬಂದಿ ದುಃಖದಲ್ಲಿ ಪಾಲ್ಗೊಂಡರು. ಶನಿವಾರ ಶಾಲೆಯಲ್ಲಿ ಮೌನ ಆಚರಿಸಿ ಶಾಲಾವಧಿ ಮೊಟುಕಗೊಳಿಸಿದರು.