ಕೋಲಾರ | ಅಕ್ಷಯ ತೃತೀಯ; ಚಿನ್ನ ಖರೀದಿ ಜೋರು

ಕೋಲಾರ: ಅಕ್ಷಯ ತೃತೀಯ ದಿನದಂದು ಚಿನ್ನ ಖರೀದಿಸಿದರೆ ಒಳ್ಳೆಯದಾಗುತ್ತದೆ ಎಂಬ ಭಾವನೆಯಲ್ಲಿ ಹಲವರು ಬುಧವಾರ ಆಭರಣ ಅಂಗಡಿಗಳತ್ತ ಮುಗಿಬಿದ್ದಿದ್ದರು.

ಚಿನ್ನದ ಬೆಲೆ ದುಬಾರಿಯಾಗಿದ್ದರೂ ಲೆಕ್ಕಿಸದ ಸಾರ್ವಜನಿಕರು ಸಣ್ಣ ಪ್ರಮಾಣದಲ್ಲಿ ಚಿನ್ನ ಖರೀದಿಯಲ್ಲಿ ತೊಡಗಿದ್ದರು. ಹೀಗಾಗಿ, ನಗರದ ಆಭರಣ ಅಂಗಡಿಗಳಲ್ಲಿ ಜನಜಂಗುಳಿ ಕಂಡು ಬಂತು. ಮಹಿಳೆಯರೇ ಹೆಚ್ಚಿನ ಸಂಖ್ಯೆಯಲ್ಲಿ ಇದ್ದರು.

ಕೆಲವು ಅಂಗಡಿ ಮಾಲೀಕರು ಮಳಿಗೆ ಮುಂದೆ ಪೆಂಡಾಲ್ ನಿರ್ಮಿಸಿದ್ದರು. ತಂಪು ಪಾನೀಯ, ನೀರು, ಕಾಫಿ, ಟೀ, ಸಿಹಿ ವ್ಯವಸ್ಥೆ ಮಾಡಿದ್ದರು. ಜೊತೆಗೆ ವಿವಿಧ ಕೊಡುಗೆ ಮೂಲಕ ಗ್ರಾಹಕರನ್ನು ಸೆಳೆಯಲು ಪೈಪೊಟಿಗೆ ಬಿದ್ದಿದ್ದರು

‘ಪ್ರತಿ ವರ್ಷವೂ ಅಕ್ಷಯ ತೃತೀಯ ದಿನದಂದು ಖರೀದಿ ವಹಿವಾಟು ಹೆಚ್ಚಿರುವುದು ಮಾಮೂಲಿಯಾಗಿದೆ. ಈ ವರ್ಷ ಇನ್ನೂ ಹೆಚ್ಚಿನ ಜನ ಬಂದಿದ್ದಾರೆ’ ಎಂದು ಆಭರಣ ಮಳಿಗೆ ಸಿಬ್ಬಂದಿ ತಿಳಿಸಿದರು.