ರೋಡಲಬಂಡ (ಯುಕೆಪಿ) ಗ್ರಾ.ಪಂ: ಶಿವಮ್ಮ ಅಧ್ಯಕ್ಷೆ

ಲಿಂಗಸುಗೂರು: ‘ತಾಲ್ಲೂಕಿನ ರೋಡಲಬಂಡ (ಯುಕೆಪಿ) ಗ್ರಾಮ ಪಂಚಾಯಿತಿಯ ನೂತನ ಅಧ್ಯಕ್ಷರಾಗಿ ಶಿವಮ್ಮ ಹನುಮಂತಪ್ಪ ಆಯ್ಕೆಯಾಗಿದ್ದಾರೆ’ ಎಂದು ಚುನಾವಣಾಧಿಕಾರಿ ಅಮರೇಶ ಯಾದವ ಘೋಷಿಸಿದರು. ಹಿಂದಿನ ಅಧ್ಯಕ್ಷರ ರಾಜೀನಾಮೆಯಿಂದ ತೆರವಾದ ಸ್ಥಾನಕ್ಕೆ ಚುನಾವಣೆ ನಡೆಸಲಾಯಿತು.

ಮಂಗಳವಾರ ಚುನಾವಣಾ ಪ್ರಕ್ರಿಯೆ ಆರಂಭಗೊ ಳ್ಳುತ್ತಿದ್ದಂತೆ ಅಧ್ಯಕ್ಷ ಸ್ಥಾನಕ್ಕೆ ಶಿವಮ್ಮ ಹನುಮಂತಪ್ಪ ಮತ್ತು ನಾಗರಾಜ ಲಕ್ಕಪ್ಪ ನಾಮಪತ್ರ ಸಲ್ಲಿಸಿದ್ದರು. ಮಧ್ಯಾಹ್ನ 1ಕ್ಕೆ ಸಭೆ ಸೇರುತ್ತಿದ್ದಂತೆ ನಾಮಪತ್ರಗಳನ್ನು ಪರಿಶೀಲಿಸಿ ಕ್ರಮ ಬದ್ಧವಾಗಿರುವುದನ್ನು ಸಭೆ ಗಮನಕ್ಕೆ ತಂದು ನಾಮಪತ್ರ ವಾಪಸ್‌ ಪಡೆಯಲು ಅವಕಾಶ ಕಲ್ಪಿಸಲಾಗಿತ್ತು.

ನಾಮಪತ್ರ ವಾಪಸ್ ಪಡೆಯದ ಕಾರಣ ಮಧ್ಯಾಹ್ನ 1.30ಕ್ಕೆ ಮತದಾನ ನಡೆಸಲಾಯಿತು. ಮತದಾನ ಪ್ರಕ್ರಿಯೆಯಲ್ಲಿ 17 ಸದಸ್ಯರು ಭಾಗವಹಿಸಿದ್ದರು. ಶಿವಮ್ಮ ಹನುಮಂತಪ್ಪ 09, ನಾಗರಾಜ ಲಕ್ಕಪ್ಪ 07 ಮತ ಪಡೆದರು. ಒಂದು ಮತ ತಿರಸ್ಕೃತಗೊಂಡಿತು. ಮತ ಎಣಿಕೆ ನಂತರದಲ್ಲಿ ಶಿವಮ್ಮ 2 ಮತಗಳ ಅಂತರದ ಗೆಲುವು ಪಡೆದರು.