ಸಿಂಧನೂರು: ಜೋಳದ ಬೀಜಕ್ಕೆ ನೂಕುನುಗ್ಗಲು

ಸಿಂಧನೂರು: ಹೈಟೆಕ್-3201 ಕಂಪನಿಯ ಜೋಳದ ಬೀಜಕ್ಕಾಗಿ ನಗರದ ರಾಯಚೂರು ರಸ್ತೆಯಲ್ಲಿರುವ ಅಂಬಿಕಾ ಟ್ರೇಡಿಂಗ್ ಕಂಪನಿಯ ಅಂಗಡಿ ಮುಂದೆ ಶನಿವಾರ ನೂಕುನುಗ್ಗಲು ಉಂಟಾಯಿತು.

ಕಳೆದ ವರ್ಷದಂತೆ ಈ ಬಾರಿಯೂ ಹೈಟೆಕ್-3201 ಜೋಳದ ಬೀಜಕ್ಕೆ ಬೇಡಿಕೆ ಹೆಚ್ಚಾಗಿದೆ. ಈ ಬಿತ್ತನೆ ಬೀಜ ಅಂಬಿಕಾ ಟ್ರೇಡಿಂಗ್ ಕಂಪನಿಯಲ್ಲಿ ಮಾತ್ರ ಸಿಗುತ್ತಿದೆ. ಶನಿವಾರ ಬೆಳಿಗ್ಗೆಯಿಂದ ನಿರಂತರ ಜಿಟಿಜಿಟಿ ಮಳೆ ಸುರಿಯುತ್ತಿದ್ದರೂ ನೂರಾರು ರೈತರು ವಿವಿಧ ಗ್ರಾಮಗಳಿಂದ ಬೆಳಿಗ್ಗೆ 9 ಗಂಟೆಯಿಂದಲೇ ಬಂದು ಅಂಗಡಿಯ ಮುಂದೆ ಸರದಿ ಸಾಲಿನಲ್ಲಿ ನಿಂತು ನೂಕುನುಗ್ಗಲು ನಡೆಸಿ 3 ಕೆಜಿಯ ಒಂದು ಪ್ಯಾಕೇಟ್‍ಗೆ ₹1,300 ನೀಡಿ ಖರೀದಿಸಿದ್ದು ಕಂಡುಬಂತು.

ಹೈಟೆಕ್-3201 ಜೋಳದ ಬೀಜ ಮಳೆಯ ಪ್ರಮಾಣ ಕಡಿಮೆಯಾದರೂ ಉತ್ತಮವಾಗಿ ಬೆಳೆ ಬಂದು ರೈತರ ಕೈ ಸೇರುತ್ತದೆ ಎಂಬುದು ರೈತರ ಅಭಿಪ್ರಾಯವಾಗಿದೆ.