ಮೃತ ಅಪರಿಚಿತ ವ್ಯಕ್ತಿ ಗುರುತಿಸಲು ಪ್ರಯತ್ನ

ತಿಪಟೂರು: ಮೈಸೂರು ಜಿಲ್ಲೆಯ ಬನ್ನೂರು ಠಾಣೆ ವ್ಯಾಪ್ತಿಯಲ್ಲಿ ಮೃತಪಟ್ಟು ಪತ್ತೆಯಾಗಿರುವ ಸುಮಾರು 55 ವರ್ಷ ವಯಸ್ಸಿನ ಅಪರಿಚಿತ ವ್ಯಕ್ತಿಯನ್ನು ಗುರುತಿಸಲು ನೆರವಾಗುವಂತೆ ತಿಪಟೂರಿಗೆ ಸಂಬಂಧಿಸಿದವರ ಸಾಮಾಜಿಕ ಜಾಲತಾಣಗಳಲ್ಲಿ ಫೋಟೋ ಹರಿದಾಡುತ್ತಿದೆ.

ಬನ್ನೂರು ಠಾಣೆಯಿಂದ ಬಂದಿದ್ದ ಛಾಯಾಚಿತ್ರ ಹಂಚಿಕೊಂಡಿರುವ ಸ್ಥಳೀಯ ಪೊಲೀಸ್ ಇಲಾಖೆಯವರು ಆತ ತೊಟ್ಟಿದ್ದ ಅಂಗಿಯಲ್ಲಿದ್ದ ಟೈಲರ್ ಲೇಬಲ್ ಕೂಡ ಹಾಕಿದ್ದಾರೆ. ಆತನನ್ನು ಗುರುತಿಸಲು ಅದು ನೆರವಾಗಬಹುದಾ ಎಂಬುದು ಪೊಲೀಸರ ಪ್ರಯತ್ನವಾಗಿದೆ.

ಅಂಗಿಯಲ್ಲಿದ್ದ ಲೇಬಲ್‍ನಲ್ಲಿ ‘ಪರಮೇಶ್ ಟೈಲರ್-ತಿಪಟೂರು’ ಎಂದಿದೆ. ಸ್ಥಳೀಯ ಪೊಲೀಸರು ದೊಡ್ಡಪೇಟೆಯಲ್ಲಿರುವ ಪರಮೇಶ್ ಟೈಲರ್ ಮಾಲಿಕರನ್ನು ಈ ಬಗ್ಗೆ ವಿಚಾರಿಸಿ ವ್ಯಕ್ತಿಯ ಗುರುತಿಗೆ ಪ್ರಯತ್ನಿಸಿದ್ದಾರೆ. ಯಾರಾದರೂ ಪರಿಚಯದವರಿದ್ದರೆ ಮಾಹಿತಿ ನೀಡುವಂತೆ ವ್ಯಾಟ್ಸ್‌ಆ್ಯಪ್ ಮೂಲಕ ಸಾರ್ವಜನಿಕರಲ್ಲಿ ಕೋರಿದ್ದಾರೆ.