ಬಾವಿಗೆ ಬಿದ್ದ ಚಿರತೆ: ಪ್ರಾಣಾಪಾಯದಿಂದ ಪಾರು

ಕಾರವಾರ: ಆಹಾರ ಅರಸಿ ಬಂದ ಚಿರತೆಯೊಂದು ಬಾವಿಯಲ್ಲಿ ಬಿದ್ದು, ಏಣಿ ಸಹಾಯದಿಂದ ಕಾಡಿಗೆ ಮರಳಿದ ಘಟನೆ ತಾಲ್ಲೂಕಿನ ಗೋಪಶಿಟ್ಟಾ ಸಮೀಪದ ಆಮ್ಲೆಯಲ್ಲಿ ಮಂಗಳವಾರ ನಡೆದಿದೆ.

ಮಾಳಸಾ ತಳವೇಕರ ಎನ್ನುವವರ ಮನೆಯ ಹಿಂದಿನ ಬಾವಿಯಲ್ಲಿ ಚಿರತೆ ಬಿದ್ದಿತ್ತು. ಇದನ್ನು ಗಮನಿಸಿದ ಗ್ರಾಮಸ್ಥರು ತಕ್ಷಣ ಅರಣ್ಯ ಇಲಾಖೆಗೆ ಮಾಹಿತಿ ತಿಳಿಸಿದರು. ಅರಣ್ಯ ಇಲಾಖೆ ಸಿಬ್ಬಂದಿ ಚಿರತೆಯನ್ನು ಮೇಲೆತ್ತಲು ಹರಸಾಹಸ ಪಟ್ಟರು. ಬಳಿಕ ಅಗ್ನಿಶಾಮಕದಳದ ಸಹಕಾರ ಕೋರಲಾಯಿತು.

ಚಿರತೆಯನ್ನು ನೋಡಲು ಬಾವಿಯ ಸುತ್ತಲೂ ಜನರು ನಿಂತಿದ್ದರಿಂದ ಚಿರತೆ ಹೆದರಿತ್ತು. ಕೊನೆಗೆ ಅದನ್ನು ಮೇಲೆತ್ತಲು ಸಾಧ್ಯವಾಗದೇ ಇದ್ದಾಗ ಬಾವಿಗೆ ಏಣಿ ಹಾಕಿ ಇಡಲಾಯಿತು. ಕೆಲ ಸಮಯದ ಬಳಿಕ ಚಿರತೆ ಬಾವಿಯಿಂದ ಎದ್ದು ಮರಳಿ ಕಾಡು ಸೇರಿದೆ ಎಂದು ಎಸಿಎಪ್‌ ಮೋಹನ ಕಣಗಿಲ್‌ ’ಪ್ರಜಾವಾಣಿ’ಗೆ ತಿಳಿಸಿದರು. ಚಿತ್ತಾಕುಲ ಪೊಲೀಸ್‌ರು ಸ್ಥಳದಲ್ಲಿದ್ದರು.