ವಿಜಯಪುರ | ಜೋಡಿ ಕೊಲೆ: ಮೂವರ ಬಂಧನ

ವಿಜಯಪುರ: ನಿಡಗುಂದಿ ಪೊಲೀಸ್‌ ಠಾಣೆ ವ್ಯಾಪ್ತಿಯ ಆಕಳವಾಡಿ ಬಳಿ ಕಳೆದ ಸೋಮವಾರ (ಮಾರ್ಚ್‌ 18) ನಡೆದಿದ್ದ ಜೋಡಿ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಮೂವರನ್ನು ಬಂಧಿಸಿದ್ದಾರೆ.

ಗಣಿ ಗ್ರಾಮದ ಪಾರ್ವತವ್ವ ತಳವಾರ ಮತ್ತು ಸೋಮನಿಂಗಪ್ಪ ಕುಂಬಾರ ಎಂಬುವವರನ್ನು ಕೊಡಲಿಯಿಂದ ಕಡಿದು ಕೊಲೆ ಮಾಡಿ ಕಾಲುವೆಯಲ್ಲಿ ಎಸೆದು ಹೋಗಿದ್ದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೊಲೆಯಾದ ಮಹಿಳೆಯ ಮಗ ಲಕ್ಷ್ಮಣ ತಳವಾರ ಹಾಗೂ ಕೊಲೆಗೆ ಸಹಕರಿಸಿದ ಆರೋಪಿ ಲಕ್ಷ್ಮಣನ ಸ್ನೇಹಿತರಾದ ಶಶಿಕುಮಾರ ಮಣಗೂರ ಮತ್ತು ಬಸವರಾಜ ಹಡಪದ ಅವರನ್ನು ಪೊಲೀಸರು ಬಂಧಿಸಿದ್ದಾರೆ.

ತಾಯಿಯ ಅನೈತಿಕ ಸಂಬಂಧದಿಂದ ಬೇಸತ್ತು ಸ್ನೇಹಿತರೊಡಗೂಡಿ ಕೊಲೆ ಮಾಡಿರುವುದಾಗಿ ಆರೋಪಿ ಲಕ್ಷ್ಮಣ ತಳವಾರ ವಿಚಾರಣೆ ವೇಳೆ ಒಪ್ಪಿಕೊಂಡಿದ್ದಾನೆ ಎಂದು ಪೊಲೀಸರು ತಿಳಿಸಿದ್ದಾರೆ.