ವಿಜಯಪುರ | ದಶಕ ಕಳೆದರೂ ರಸ್ತೆಗೆ ದಕ್ಕಿಲ್ಲ ದುರಸ್ತಿ ಭಾಗ್ಯ

ಚಡಚಣ: ತಾಲ್ಲೂಕಿನ ಏಳಗಿ(ಪಿ.ಎಚ್‌) ಗ್ರಾಮದಿಂದ ಹಲಸಂಗಿ ಗ್ರಾಮದವರೆಗಿನ ಸುಮಾರು 3 ಕಿ.ಮಿ ರಸ್ತೆ ಸಂಪೂರ್ಣವಾಗಿ ಕಿತ್ತು ಹೋಗಿದ್ದು ಕೂಡಲೇ ದುರಸ್ತಿಗೊಳಿಸುವಂತೆ ಎರಡೂ ಗ್ರಾಮಗಳ ಜನರು ಆಗ್ರಹಿಸಿದ್ದಾರೆ.

ಸುಮಾರು 10 ವರ್ಷಗಳ ಹಿಂದೆ ಈಗಿನ ಶಾಸಕ ವಿಠ್ಠಲ ಕಟಕಧೊಂಡ ಅವರ ಅಧಿಕಾರವಧಿಯಲ್ಲಿ ವಿಶೇಷ ಮುತುವರ್ಜಿ ವಹಿಸಿ ಚಡಚಣದಿಂದ ಲೋಣಿ ಮಾರ್ಗವಾಗಿ ಏಳಗಿ, ಹಲಸಂಗಿ ವರೆಗಿನ 22 ಕಿ.ಮೀ ರಸ್ತೆ ದುರಸ್ತಿ ಹಾಗೂ ಡಾಂಬರೀಕರಣ ಮಾಡಲಾಗಿತ್ತು. ನಂತರ ಎರಡು ಸರ್ಕಾರಗಳೂ, ಇಬ್ಬರು ಶಾಸಕರು ಬಂದು ಹೋದರೂ ಈ ರಸ್ತೆ ದುರಸ್ತಿ ಬಗ್ಗೆ ಗಮನ ಹರಿಸಿಲ್ಲ.

ಲೋಣಿ(ಬಿ.ಕೆ) ಗ್ರಾಮದಿಂದ ಚಡಚಣವರೆಗಿನ ರಸ್ತೆಯನ್ನು ಲೋಣಿ ಗ್ರಾಮಸ್ಥರು 7 ಕೀ.ಮಿ.ಸುತ್ತಿ ಬಳಸಿ ಬರಡೋಲ ಮಾರ್ಗವಾಗಿ ಚಡಚಣ ತಲುಪುತ್ತಾರೆ. 3 ಕಿ.ಮೀ ಅಂತರದಲ್ಲಿರುವ ಏಳಗಿ (ಪಿ.ಎಚ್)‌ ಹಾಗೂ ಹಲಸಂಗಿ ಗ್ರಾಮಗಳ ನಡುವಿನ ರಸ್ತೆ ಹದಗೆಟ್ಟಿರುವುದರಿಂದ ವಾಹನ ಚಾಲಕರು 7 ಕಿಮೀ ಸುತ್ತಿ ಬಳಸಿ ಸಂಚರಿಸುವಂತಾಗಿದೆ.

ಆಸ್ಪತ್ರೆಗಳಿಗೆ, ತುರ್ತು ಕೆಲಸಗಳಿಗಾಗಿ ನಗರಕ್ಕೆ ಹೋಗುವಾಗ ವಿಳಂಬ ಆಗುತ್ತದೆ. ನಾಲ್ಕು ಕಿ.ಮೀ ಹೆಚ್ಚುವರಿ ಸಂಚರಿಸಿಕೊಂಡು ಹೋಗುವಷ್ಟರಲ್ಲಿ ಜನರು ಹೈರಾಣಾಗುತ್ತಾರೆ. ರೋಗಿಗಳು, ಗರ್ಭಿಣಿಯರು ಪಾಡು ಪಡುವಂತಾಗಿದೆ.

ಈ ಬಗ್ಗೆ ಹಲವು ಬಾರಿ ಭಾಗದ ಗ್ರಾಮಸ್ಥರು ಶಾಸಕರಿಗೂ, ಸಂಬಂದಿಸಿದ ಇಲಾಖೆ ಅಧಿಕಾರಿಗಳಿಗೂ ಮನವಿ ಸಲ್ಲಿಸಿ, ಅಳಲು ತೋಡಿಕೊಂಡರೂ ಯಾವುದೇ ಪ್ರಯೋಜನವಾಗಿಲ್ಲ.

ಇನ್ನಾದರೂ ಈ ಬಗ್ಗೆ ಕೂಡಲೇ ಈ ಬಗ್ಗೆ ಸಂಬಂಧಿಸಿದ ಇಲಾಕೆ ಅಧಿಕಾರಿಗಳು, ಶಾಸಕರು ಗಮನ ಹರಿಸಿ ವಾಹನ ಚಾಲಕರಿಗೆ ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಡಬೇಕು ಎಂಬುದು ಎರಡೂ ಗ್ರಾಮಸ್ಥರು ಆಗ್ರಹವಾಗಿದೆ.

ಚಡಚಣ ಲೋಣಿ ಮಾರ್ಗವಾಗಿ ಹಲಸಂಗಿ ಗ್ರಾಮದವರೆಗಿನ ರಸ್ತೆ ದುರಸ್ತಿ ಕಾಮಗಾರಿಗೆ ಶೀಘ್ರ ಕ್ರಮ ಕೈಗೊಳ್ಳಲಾಗುವುದು –ವಿಠ್ಠಲ ಕಟಕಧೋಂಡ ಶಾಸಕ

ಏಳಗಿ ಹಾಗೂ ಹಲಸಂಗಿ ಗ್ರಾಮಗಳ ನಡುವಿನ ರಸ್ತೆ ಸಂಪೂರ್ಣ ಹದಗೆಟ್ಟಿದೆ. ರಸ್ತೆಗಳ ಮಧ್ಯೆ ಗುಂಡಿಗಳಿಲ್ಲ. ಗುಂಡಿಗಳ ಮಧ್ಯೆ ರಸ್ತೆ ನಿರ್ಮಾಣವಾಗಿದೆ –ಮಡಿವಾಳಪ್ಪ ಪಾಟೀಲ ಏಳಗಿ(ಪಿ.ಎಚ್) ಗ್ರಾಮಸ್ಥ

ಲೋಣಿ ಗ್ರಾಮದಿಂದ ಚಡಚಣ ತಾಲ್ಲೂಕು ಕೇಂದ್ರಕ್ಕೆ ತೆರಳುವ ರಸ್ತೆ ದಶಕಗಳಿಂದ ದುರಸ್ತಿ ಭಾಗ್ಯ ಕಂಡಿಲ್ಲ. ಸಂಬಂಧಿಸಿದ ಅಧಿಕಾರಿಗಳು ಗಮನಹರಿಸಿ ಡಾಂಬರೀಕರಣಕ್ಕೆ ಮುಂದಾಗಬೇಕು –ಸಿದ್ದರಾಯ ಘಂಟಿ ಲೋಣಿ(ಬಿ.ಕೆ) ಗ್ರಾಮಸ್ಥ